༢༠༡༢ ཟླ་ ༣ ཚེས་ ༣༠ རེས་གཟའ་པ་སངས།
༄༅། །ཉེ་ཆར་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱིས་རྒྱ་ནག་གཞུང་གི་བོད་མིའི་ཐོག་བཟུང་བའི་གདུག་རྩུབ་ཅན་གྱི་སྲིད་བྱུས་སྤྱི་དང་ཡང་སྒོས་རྒྱ་ནག་གི་སྲིད་འཛིན་ཧུའུ་ཅིན་ཐའོ་རྒྱ་གར་ནང་ཚོང་དོན་གྱི་གྲོས་མོལ་སླད་འབྱོར་བཞིན་ཡོད་པར་ངོ་རྒོལ་ཆེད་རྒྱ་གར་རྒྱལ་ས་ལྡི་ལིའི་ཇན་ངྷར་མ་ངྷར་ས་གནས་སུ་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་ཡོད་པར་བརྟེན། ཕྱི་ལོ་ ༢༠༡༢ ཟླ་ ༣ ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་མང་གཙོའི་ཀ་བ་གསུམ་མཛད་གཙོ་རྣམ་པ་དང་བོད་མི་མང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། སྲི་ཞུའི་ལས་བྱེད་རྣམ་པ། བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་རྣམ་པ། གཞན་ཡང་གཉུག་མར་གནས་པ་དང་གློ་བུར་ལྷགས་པའི་དགེ་བཙུན་སྔགས་གསུམ། དེ་བཞིན་སློབ་ཕྲུག་དང་མི་མང་། ཕྱི་རྒྱལ་བ་བཅས་ཁྱོན་མི་གྲངས་ ༣༠༠༠ བརྒལ་བ་འདུ་འཛོམས་གནང་བའི་དབུས་སུ་རྒྱལ་གཅེས་པ་ཁོང་གི་སྐུ་ཕུང་གདན་འདྲེན་ཞུས་གྲུབ་མཚམས་བོད་རྒྱལ་ཁབ་ཆེན་པོ་རྒྱལ་གླུ་བཏང་སྟེ་རྒྱལ་གཅེས་པ་ཁོང་དང་འདི་ཟླའི་ཕྱི་ཚེས་ ༢༨ ཉིན་རྔ་པ་རྫོང་གཅའ་ཞང་རྭ་རུ་བའི་སྤེན་པ་ཚང་གི་དགེ་འདུན་པ་བློ་བཟང་ཤེས་རབ་ལགས་དམ་པ་ཁོང་རྣམ་གཉིས་ཀྱིས་གཙོས་རྒྱལ་གཅེས་དཔའ་བོ་འདས་གསོན་ཡོངས་ལ་གདུང་སེམས་མཉམ་སྐྱེ་མཚོན་ཆེད་མྱ་ངན་གུས་འདུད་དང་ངག་བཅད་སྐར་མ་གཅིག་གནང་།
དེ་རྗེས་བཀའ་ཁྲིའི་སྐུ་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མར་མེའི་ཞལ་ཕྱེ་གནང་གྲུབ་མཚམས་རྡ་ས་མཚན་ཉིད་གྲྭ་ཚང་གི་དགེ་འདུན་བཞིས་སྨོན་ལམ་གསུང་བསྐུལ་ཐོག་དེར་བསྡུས་མི་མང་ཚང་མས་མཉམ་འདོན་གནང་ཡོད། དེ་ནས་ཆོས་རིག་བཀའ་བློན་མཆོག་གིས་གསུང་བཤད་གནང་དོན། མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་འདིར་བསྡུས་རྣམ་པ་ལྷན་རྒྱས་ལ་ཞུ་རྒྱུར། ཕྱི་ཟླ་ ༣ ཚེས་ ༢༦ ཉིན་རྒྱལ་གཅེས་པ་འཇམ་དཔལ་ཡེ་ཤེས་ལགས་ཀྱིས་བོད་བསྟན་སྲིད་ཆེད་མ་བསྐུལ་དང་བླང་ཐོག་རང་ལུས་མེར་སྲེག་བཏང་བ་རེད།
བཀའ་ཁྲི་མཆོག་གིས་འཇམ་དཔལ་ཡེ་ཤེས་ལགས་ཀྱི་སྐུ་ཕུང་ལ་མཇལ་དར་གཡོགས་ཆེད་ཉི་ཧོང་དུ་བསྐྱོད་རྒྱུ་དེ་ཡང་ཉིན་གཅིག་གི་དུས་ཚོད་འཕར་འགྱངས་གནང་ཡོད་ཀྱང་ཕུང་པོ་དུས་ཐོག་ཏུ་འབྱོར་མི་ཐུབ་པ་རེད། བཀའ་ཁྲི་མཆོག་ཉི་ཧོང་དུ་ལས་དོན་མང་དག་ཅིག་བང་སྒྲིག་ཡོད་སྟབས་བསྐྱོད་དགོས་ཐུག་ཡོད། དེར་བརྟེན་བཀའ་ཁྲི་མཆོག་གིས་ང་འདི་གར་བཀའ་ཤག་གི་ཚབ་ཞུས་ནས་བཅར་དགོས་སྐོར་གསུང་དོན་ལྟར་བཅར་བ་ཡིན། རྒྱལ་གཅེས་པ་འཇམ་དཔལ་ཡེ་ཤེས་ལགས་ཀྱིས་ཁ་ཆེམས་དོན་ཚན་ལྔ་ལྡན་ཞིག་བཞག་ཡོད་པའི་ནང་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་དང་བོད་ནང་རང་དབང་དགོས། བོད་མི་རྣམས་ནས་རང་མི་རིགས་ཀྱི་ལ་རྒྱ་བརྟན་བཟུང་བྱེད་དགོས་ཞེས་གསུངས་ཡོད་པ་དེ་ང་ཚོས་གལ་ཆེན་རྩིས་དགོས། ང་ཚོ་བོད་མི་རྣམས་ནས་ས་གནས་གང་ཞིག་ཏུ་ལས་འགུལ་སྤེལ་ཡང་བཀའ་ཤག་གིས་ལམ་སྟོན་གནང་བ་གཞིར་བཟུང་ཐོག་ལས་འགུལ་སྤེལ་རོགས་ཞུ་རྒྱུ་ཡིན། དེ་བཞིན་རྒྱལ་གཅེས་དཔའ་བོ་རྣམས་ཀྱི་ཤུལ་ལུས་ནང་མི་ཚོར་གདུང་སེམས་མཉམ་སྐྱེ་ཞུ་རྒྱུ་ཡིན་ཞེས་གསུང་བཤད་གནང་ཡོད།
དེ་ནས་སྤྱི་འཐུས་ཚོགས་གཙོ་མཆོག་གིས་གསུང་བཤད་གནང་དོན། དེ་རིང་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱི་རྗེས་དྲན་ཉིན་མོ་འདིར་ང་ཚོ་ཡིད་སྐྱོ་བ་དང་སེམས་ནང་ཚོར་ཤུགས་ཆེན་པོའི་གནས་སྟངས་ཤིག་ཆགས་ཡོད། ཉེ་ཆར་རྒྱ་ནག་གི་སྲིད་འཛིན་ཧུའུ་ཅིན་ཐའོ་རྒྱ་གར་དུ་བྷི་རིག་(BRICS)ཚོགས་འདུར་བཅར་བའི་ཉེར་ལེན་ལ་བརྟེན་ནས་བོད་མི་གཉིས་ཀྱི་ཚེ་སྲོག་ཤོར་ཡོད།
ཚེ་སྲོག་ཤོར་བའི་ནུས་པ་ཞིག་ཐོན་ཡོད་དམ་ཞེ་ན། ད་ལྟའི་རྒྱ་ནག་འགོ་ཁྲིད་ཚོའི་ཡ་ལན་བྱེད་སྟངས་དེར་བལྟས་པ་ཡིན་ན་གསལ་པོ་ཤེས་ཀྱི་རེད། གང་ལྟར་ད་རེས་རྒྱ་གར་རྒྱལ་ས་ལྡི་ལིར་ཧུའུ་ཅིང་ཐའོ་ཚོགས་འདུར་སླེབས་ཡོད། དངོས་གནས་བྱས་ནས་རྒྱལ་ཁབ་གཅིག་གི་སྲིད་འཛིན་ཕེབས་སྐབས་སྤོབས་པ་ལྡན་པའི་ཐོག་ནས་ཡོང་དགོས་རྒྱུ་དང་མི་མང་གི་དགའ་བསུ་ཞུ་རྒྱུའི་གནས་སྟངས་ཤིག་ཆགས་ཀྱི་ཡོད། དེར་བརྟེན་རྒྱལ་ཁབ་གཞན་གྱི་སྲིད་འཛིན་སླེབས་སྐབས་སྤོབས་པའི་ཐོག་ནས་སླེབས་ཡོད་ཀྱང་། དེ་ལས་ལྡོག་སྟེ་རྒྱ་ནག་སྲིད་འཛིན་སླེབས་སྐབས་བོད་མིས་རང་ལུས་མེར་སྲེག་གི་ལམ་ནས་ཕེབས་བསུ་ཞུས་པ་རེད། དེ་རིང་རྒྱ་ནག་གི་སྲིད་འཛིན་ཕྱིར་ལོག་འགྲོ་བའི་སྐབས་སུ་ཡང་ཕུང་པོ་མེར་སྲེག་བཏང་བའི་དུ་བས་ཕེབས་སྐྱེལ་ཞུ་བའི་གནས་སྟངས་ཤིག་ཆགས་ཡོད། དེ་བཞིན་བོད་མདོ་སྨད་རྔ་བ་རྫོང་དུ་དགེ་འདུན་པ་བློ་བཟང་ཤེས་རབ་ལགས་ཀྱིས་ཕྱི་ཚེས་ ༢༨ ཉིན་གྱི་ཕྱི་དྲོ་ཆུ་ཚོད་ ༧ པ་ཙམ་ལ་རང་ལུས་མེར་སྲེག་བཏང་སྟེ་དེ་མ་ཐག་འདས་གྲོངས་སུ་གྱུར་ཡོད། རྒྱ་ནག་གི་ཉེན་རྟོག་པས་ཁོང་གི་སྐུ་ཕུང་འཁྱེར་ནས་དེ་སྔ་བྱུང་བ་ལྟར་རུས་ཐལ་ཞིག་མ་གཏོགས་ནང་མིར་སྤྲོད་རྒྱུ་མེད་པ་རེད་བསམ་གྱི་འདུག དེ་རིང་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱིས་བོད་བསྟན་སྲིད་ཆེད་རང་ལུས་མེར་སྲེག་བཏང་བའི་རྐྱེན་གྱིས་འདིར་མང་ཚོགས་མང་དག་ཅིག་འདུ་འཛོམས་བྱུང་བ་ལྟར་རྒྱལ་སྤྱིའི་ཁྱོན་ནས་བོད་པར་གདུང་སེམས་མཉམ་སྐྱེ་བྱེད་ཀྱི་ཡོད། བོད་ནང་ད་ལྟ་བར་བོད་མི་སུམ་ཅུ་སོ་གཅིག་གིས་ ༣༡ རང་ལུས་མེར་སྲེག་བཏང་བ་དང་བོད་མི་ ༨ ཙམ་ཞིག་རྒྱ་ནག་གཞུང་གི་མེ་མདའི་འོག་རྐྱེན་འདས་སུ་གྱུར་ཡོད། རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་དང་རྒྱལ་གཅེས་དཔའ་བོ་བློ་བཟང་ཤེས་རབ་ལགས་གཉིས་ཀར་སྙིང་ཐག་པ་ནས་ཡི་རངས་བསྔགས་བརྗོད་ཞུ་རྒྱུ་དང་། ད་ལྟའི་གནས་སྟངས་ལ་བལྟས་པ་ཡིན་ན་རྒྱ་ནག་གི་ཇི་སྲིད་ཡ་ལན་མ་བྱས་བར་དུ་བོད་ནང་གི་གནས་སྟངས་ཞི་འཇམ་ཡོང་རྒྱུ་ཧ་ཅང་ཁག་པོ་ཆགས་ཡོད་ཅེས་སླར་ཡང་ཞུ་འདོད་བྱུང་།
ང་ཚོས་ལས་འགུལ་གང་འདྲ་སྤེལ་ཡང་མི་མང་གི་མཉམ་ཞུགས་གནང་ཐོག་རྒྱལ་སྤྱིའི་ཡོངས་ལ་ཁྱབ་ཐུབ་རྒྱུའི་ལས་འགུལ་སྤེལ་རྒྱུ་ཧ་ཅང་གལ་ཆེན་པོ་རེད། ཅེས་སོགས་ཀྱི་གསུང་བཤད་གནང་ཡོད། དེ་རྗེས་བོད་ཀྱི་ཟློས་གར་ཚོགས་པས་བདེན་ཚིགས་སྨོན་ལམ་གསུང་གནང་ཡོད། དེ་ནས་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་གཙོས་ཁྲིམས་ཞིབ་པ་གཞན་གཉིས་མཆོག་དང་། ལྷན་ཁང་ཁག་གཅིག་གི་བཀའ་བློན་རྣམ་པ་མཆོག སྤྱི་འཐུས་ཚོགས་གཙོ་མཆོག་དང་ཚོགས་གཞོན་མཆོག དེ་བཞིན་སྤྱི་འཐུས་རྣམ་པ། སྲི་ཞུའི་དྲུང་གཞོན་ཡན་གྱི་ལས་བྱེད་རྣམ་པ་སོགས་ཀྱིས་རྒྱལ་གཅེས་པ་ཁོང་གི་སྐུ་ཕུང་ལ་རིམ་བཞིན་དཀར་གཙང་མཇལ་དར་གཡོགས་ཡོད། དེ་ནས་དམ་པ་ཁོང་གི་སྐུ་ཕུང་ཚེ་མཆོག་གླིང་གི་ཉེ་འགྲམ་དུར་ཁྲོད་དུ་གདན་ཞུས་ཐོག་རྒྱུད་སྟོད་དང་གནས་ཆུང་གི་དགེ་འདུན་པས་སྦྱིན་སྲེག་ཆོ་ག་འདོན་མུར་ཞུགས་འབུལ་གནང་ཡོད། དེ་བཞིན་སྤྱི་འཐུས་ཚོགས་གཙོ་མཆོག་དང་ཚོགས་གཞོན་མཆོག་སོགས་ཀྱང་དུར་ཁྲོད་དུ་ཆེད་བཅར་གནང་འདུག ཕྱོགས་མཚུངས་ཉིན་རྒྱབ་བཀའ་ཤག་གི་བཀའ་འབྲེལ་འོག་ཆོས་རིག་ལས་ཁུངས་ཀྱིས་གོ་སྒྲིག་ཐོག་རྔ་པ་རྫོང་གཅའ་ཞང་རྭ་རུ་བའི་སྤེན་པ་ཚང་གི་རྒྱལ་གཅེས་པ་དགེ་འདུན་བློ་བཟང་ཤེས་རབ་ལགས་ཀྱིས་གཙོས་རྒྱལ་གཅེས་དཔའ་བོ་ཕོ་མོ་འདས་གསོན་ཡོངས་ལ་གདུང་སེམས་མཉམ་སྐྱེ་མཚོན་ཆེད་མཆོད་འབུལ་སྨོན་ལམ་ཞིག་ཀྱང་ཚོགས་ཡོད་པ་བཅས། །
