༢༠༡༢ ཟླ་ ༣ ཚེས་ ༢༨  རེས་གཟའ་ལྷག་པ།
༄༅། །༸གོང་ས་མཆོག་གིས་ཧན་རྒྱ་རིགས་རྣམས་བོད་རིགས་གནས་སྡོད་ཀྱི་ས་ཁུལ་ནས་ཕྱིར་འབུད་བྱ་རྒྱུའི་སྲིད་བྱུས་འཛིན་བཞིན་ཡོད་པར་བསྙད་འདོགས་བྱས་ཏེ་རྒྱ་ནག་གཞུང་གིས་དྲ་རྒྱའི་བརྒྱུད་ལམ་(China Tibet Online)དང་(Xinhua News Agency)ཐོག་༸གོང་ས་༸སྐྱབས་མགོན་ཆེན་པོ་མཆོག་ཇར་མན་གཅིག་བསྡུས་དབང་འཛིན་པ་ཧི་ཊི་ལར་(Hitler)དང་མཚུངས་བསྡུར་བྱས་པའི་ཆེད་རྩོམ་སྤེལ་ཏེ་མཚན་སྨད་ཞུས་པར། ཕྱི་ལོ་ ༢༠༡༢ ཟླ་ ༣ ཚེས་ ༢༥ ཉིན་ཇིའུ་འགྲོ་བ་མིའི་ཐོབ་ཐང་ལྷན་ཚོགས་སི་མོན་ཝེ་སིན་ཐལ་(Simon Wiesenthal Center)ཞེས་པའི་འགན་འཛིན་ལས་རོགས་སྐུ་ཞབས་རབ་བྷི་ཨེ་བྷ་ར་ཧིན་ཀུ་པར་(Rabbi Abrahim Cooper)མཆོག་གིས་གསུང་དོན། རྒྱ་ནག་གཞུང་གི་དྲ་རྒྱའི་བརྒྱུད་ལམ་ཐོག་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཚན་སྨད་ཞུ་ཆེད། ཧི་ཊི་ལར་དང་མཚུངས་བསྡུར་བྱས་པའི་འཁྱོག་བཤད་ཀྱི་ཆེད་རྩོམ་སྤེལ་བ་དེ་ནི་ནཱ་ཛིའི་གདུག་རྩུབ་འོག་(Nazi Holocaust)རྐྱེན་འདས་སུ་གྱུར་བའི་ཇིའུ་མི་རིགས་ཚོ་དང་། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གཉིས་ཀར་དམའ་འབེབས་འགྲོ་རྒྱུ་ཡིན་པར་བརྟེན་དམའ་འབེབས་ཉིས་བརྩེགས་ཆགས་ཡོད། བྱ་སྤྱོད་དེ་ནི་ཧང་སངས་དགོས་པ་ཙམ་མ་ཟད། མི་འཚམ་པ་ཞིག་ཡིན་སྟབས་ང་ཚོས་ངོས་ལེན་བྱ་ཐབས་རྩ་བ་ནས་མེད། ང་ཚོས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་གུས་བརྩི་དང་ཆེ་མཐོང་ཧ་ཅང་ཞུ་བཞིན་ཡོད་པར་བརྟེན་ཕྱི་ལོ་ ༡༩༩༦ ལོར་སི་མོན་ཝེ་སིན་ཐལ་ལྷན་ཚོགས་ཀྱིས་༸གོང་ས་ཏཱ་ལའི་བླ་མ་མཆོག་གིས་མི་མང་གི་བདེ་དོན་ཆེད་ཐུགས་བརྩོན་ལྷོད་མེད་མཛད་པའི་མཛད་རྗེས་ལ་ངོས་འཛིན་གྱི་ཆེ་བསྟོད་ཞུ་ཆེད་(Humanitarian Prize)གཟེངས་རྟགས་འབུལ་ལམ་ཞུས་ཡོད།
བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ལོ་ངོ་བཅུ་ཕྲག་རིང་འཚེ་བ་མེད་པ་དང་གྲོས་མོལ་གྱི་ལམ་ནས་དཀའ་ངལ་སེལ་ཐབས་མཛད་བཞིན་པའི་མཛད་བཟང་ལ་འཛམ་གླིང་ནང་གུས་བརྩི་ཧ་ཅང་ཞུ་བཞིན་ཡོད། དེར་བརྟེན་༸གོང་ས་ཏཱ་ལའི་བླ་མ་མཆོག་ནི་འཛམ་གླིང་འདིའི་སྟེང་ཆེད་མཐོང་ལྡན་པའི་ཐོག་ནས་རང་གི་ཐོབ་ཐང་རྩོད་མཁན་རྣམས་ལ་མིག་དཔེར་འོས་པ་ཞིག་ཆགས་ཡོད།
དོན་དངོས་ཐོག་ཧི་ཊི་ལར་ནཱ་ཛིའི་རིང་ལུགས་ཀྱིས་རྩ་མེད་བཟོ་རྒྱུའི་རིན་ཐང་དེ་དག་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་སྲུང་སྐྱོབས་མཛད་བཞིན་ཡོད། དེར་བརྟེན་འབྲེལ་ཡོད་རྒྱ་ནག་གཞུང་གི་དྲ་རྒྱའི་བརྒྱུད་ལམ་གཉིས་ནས་དགོངས་སེལ་ཞུ་དགོས་པ་ང་ཚོས་འབོད་སྐུལ་ཞུ་རྒྱུ་ཡིན། ཞེས་སོགས་འཁོད་འདུག་པ་བཅས། །