༢༠༡༢ ཟླ་ ༣ ཚེས་ ༩ རེས་གཟའ་པ་སངས།
༄༅། །འདི་གར་སུད་སི་དོན་གཅོད་ལས་ཁུངས་ཀྱི་ཟླ་བ་རྒྱ་མཚོ་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༣ ཚེས་ ༦ ་ཉིན་རྒྱབ་ཇི་ནི་ཝར་འཚོགས་བཞིན་པའི་རྒྱལ་ཚོགས་བགྲོ་གླེང་ནང་མཉམ་འབྲེལ་རྒྱལ་ཚོགས་ཀྱི་བཟའ་ཆའི་ཐོག་ཞིབ་འཇུག་གནང་མཁན་མཁས་དབང་སྐུ་ཞབས་ཨོ་ལི་ཝར་དི་ཤུ་ཌར་ནས་རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་འབྲོག་པ་གཞིས་སྤོས་སྲིད་བྱུས་ལ་རྩོད་གླེང་གནང་འདུག
དེ་ཡང་ཁོང་གིས།   ངའི་བསམ་པར་རྒྱ་ནག་ནང་དཀའ་ངལ་ཚབས་ཆེན་མང་པོ་ཡོད་པ་དང་།   བོད་ནང་ཞིང་འབྲོག་ཚོའི་གནས་སྟངས་ནི་དཀའ་ངལ་ཆེ་གྲས་ཤིག་ཡིན། མཁས་དབང་ཨོ་ལི་ཝར་མཆོག་གིས་རྒྱ་ནག་དང་འབྲེལ་བའི་ཞིབ་འཇུག་སྙན་ཐོ་ཞིག་ཕྱི་ལོ་  ༢༠༡༢  ཟླ   ༡  ཚེས་ ༢༠  ཉིན་བཏོན་ཡོད།  སྙན་ཐོའི་ནང་བོད་མི་ཞིང་འབྲོག་རྣམས་རང་འདོད་མེད་པར་སྲོལ་རྒྱུན་ས་ཁུལ་ནས་གཞིས་སྤོས་བྱེད་རྒྱུ་དེ་མཚམས་འཇོག་བྱེད་དགོས་ཞེས་གསུངས་ཡོད་པ་མ་ཟད།   རྒྱ་གཞུང་ནས་གཞིས་སྤོས་བྱ་ཡུལ་སྤྱི་ཚོགས་རིང་ལུགས་ཀྱི་གྲོང་གསེབ་གསར་པ་ཞེས་པའི་ནང་ནང་ལས་ཀའི་གོ་སྐབས་དང་།  ཤེས་ཡོན།  འཕྲོད་བསྟེན་བཅས་ཀྱི་ཞབས་ཞུ་མཐུན་རྐྱེན་བསྐྲུན་ཏེ་གྲོང་གསེབ་ནང་གི་གནས་སྡོད་མི་མང་རྣམས་ལ་བཟའ་བཅའ་འདང་ངེས་སྤྲོད་ཐུབ་པ་དགོས་ཞེས་འཁོད་ཡོད་འདུག   ཁོང་ཕྱི་ལོ་༢༠༡༠ ཟླ་ ༢ ནང་རྒྱ་ནག་ཏུ་ཕེབས་ཡོད།  ཡང་སྙན་ཐོ་ནང་རྒྱ་ནག་གཞུང་ནས་གཞིས་སྤོས་ཟིན་པའི་ཚོགས་སྡེ་ཁག་མཉམ་རྩྭ་ཐང་རྒྱུན་གནས་ཐུབ་པའི་གསོ་ཉར་གྱི་ཐབས་བྱུས་ཐོག་དོན་འབྲས་སོན་པའི་གྲོས་བསྡུར་གནང་དགོས་ཞེས་རྒྱ་གཞུང་ལ་བསྐུལ་མ་གནང་འདུག
གནད་དོན་དེའི་ཐོག་བགྲོ་གླེང་གནང་སྐབས་ཡུ་རོབ་སྤྱི་མཐུན་ཚོགས་པས་ང་ཚོས་གཞིས་སྤོས་ལས་གཞི་དེས་བོད་མི་ཞིང་འབྲོག་དང་གྲོང་གསེབ་ནང་གནས་སྡོད་བྱེད་མཁན་རྣམས་ཀྱི་ཐོག་དོ་ཕོག་དང་མཇུག་འབྲས་ལ་བློ་འཚབ་ཆེན་པོ་ཡོང་བཞིན་འདུག་པས་གནད་དོན་དེའི་ཐོག་ཞིབ་འཇུག་མཁས་དབང་ནས་སྙན་ཐོ་ནང་གསལ་རྒྱབ་གཉེར་ཁག་ལག་ལེན་འཁེལ་ཐབས་ཆེད་རྒྱ་ནག་གཞུང་དང་འབྲེལ་ལམ་བྱུང་ཐུབ་ཡོད་མེད་སྐོར་ཤེས་འདོད་བྱུང་ཞེས་གསུངས་འདུག
རྒྱ་ནག་གཞུང་གི་སྐུ་ཚབ་ནས་མཉམ་འབྲེལ་རྒྱལ་ཚོགས་ཀྱི་ཞིབ་འཇུག་མཁས་དབང་གི་སྙན་ཐོའི་ནང་དོན་ལ་བློ་འཚབ་ཡོད་སྐོར་དང་།  འགྲོ་བ་མིའི་རྟོག་ཞིབ་ཚོགས་པ་ (Human Rights Watch)  དང་ཧེལ་སེང་གི་འགྲོ་བ་མིའི་ཐོབ་ཐང་ཚོགས་པ་ (Helsinki Foundation for Human Right)  ནས་སྐྱོན་བརྗོད་གཏམ་བཤད་གནང་བ་དེར་མཐའ་གཅིག་ཏུ་མོས་མཐུན་དང་ངོས་ལེན་མེད་ཅེས་ལན་འདེབས་བྱས་འདུག
དེ་ཡང་རྒྱ་ནག་སྐུ་ཚབ་ཀྱིས།   ཞིང་འབྲོག་རྣམས་གཞིས་སྤོ་བྱས་པ་དེ་དག་གི་ས་ཁུལ་ནང་གི་དཔལ་འབྱོར་ཡར་རྒྱས་རྒྱུན་གནས་ཐུབ་པ་དང་སྤྱི་ཚོགས་ཡར་རྒྱས་གཏོང་ཕྱིར་ཡིན།  ལས་གཞི་དེ་དག་ཞིང་འབྲོག་མི་མང་ནས་རྒྱབ་སྐྱོར་ཤུགས་ཆེ་ཡོད།  བོད་ཚུད་པའི་རྒྱ་ནག་གི་ནུབ་ཕྱོགས་ཀྱི་ས་ཁུལ་ནང་གཞིས་སྤོ་ལས་གཞི་དེ་དག་ལ་དགའ་མོས་བྱེད་པའི་སྲིད་བྱུས་ཤིག་ཡིན།
དེའི་ལན་དུ།  བཟའ་བཅའི་ཐོག་ཞིབ་འཇུག་མཁས་དབང་གིས།   ༢༠༡༡  ཟླ  ༩  པའི་རྒྱ་གཞུང་གི་བརྒྱུད་ལམ་ཤིང་ཧྭའི་ནང་ཐོན་པའི་གནས་ཚུལ་ཞིག་ལུང་འདྲེན་གནང་སྟེ།  གཞིས་སྤོས་ཟིན་པའི་མི་མང་ཕལ་ཆེ་བས་འབྲོག་པའི་མི་ཚེ་དྲན་ཞིང་།  གཡག་སྐད་ཐོས་འདོད་ཆེ་ཞིང།  རྩ་ཐང་ཐོག་རྐང་འགྲོས་བྱེད་འདོད་ཡོད་པ་སྟོན་ཡོད།
ཡང་ཁོང་གིས་མུ་མཐུད་ཤིང་ཧྭའི་གསར་འགྱུར་གཞན་ཞིག་ལུང་འདྲེན་གནང་སྟེ།  བོད་པ་ཞིག་གི་གསུང་དོན་ལ།  ཁོང་གི་ནང་མི་རྣམས་རྒྱ་གཞུང་གི་ལོ་རེའི་རོགས་དངུལ་ཐོག་འཚོ་བཞིན་ཡོད་པ་དང་དེའི་ལོ་རེ་ཐོབ་འབབ་ནི་གཡག་གཉིས་ཀྱི་རིན་འབབ་ལས་ཉུང་བ་ཡིན།  གྲོང་བརྡལ་ནང་དགོས་མཁོ་རྣམས་རིན་གོང་ཆེ་བ་ཡོད་སྐོར་བཤད་འདུག མཁས་དབང་ཁོང་གིས་མཚོ་སྔོན་ཞིང་ཆེན་རང་ནས་ཕྱི་ལོ་ ༢༠༠༩ ནས་བཟུང་འབྲོག་པ་མི་གྲངས་འབུམ་གཉིས་དང་།  དུད་ཚང་རྩིས་ན་ ༦༤༠༠༠ ཙམ་གཞིས་སྤོས་བྱས་ཟིན་ཡོད་པ་དང་།  རྒྱ་གཞུང་གསར་ལམ་ཤིང་ཝ་ནང་ཐོན་གསལ་ལྟར་ན་ཕྱི་ལོ་ ༢༠༡༢ ལོ་མཇུག་བར་འབྲོག་པ་མི་གྲངས་ ༥༠༠༠༠ གཞིས་སྤོ་གནང་འཆར་ཡོད་འདུག་པ་འཁོད་ཡོད་འདུག  དེས་གཞིས་སྤོས་སྲིད་བྱུས་དེ་གཞི་རྒྱ་ཆེན་པོ་ཡིན་པ་སྟོན་གྱི་ཡོད་ཅེས་ལན་གནང་།
མཁས་དབང་ཨོ་ལི་ཝར་ཤུ་ཌར་ལགས་ཀྱིས་མུ་མཐུད་གསུང་དོན།    རྒྱ་གཞུང་གི་གཞིས་སྤོ་སྲིད་བྱུས་དེ་དམིགས་ཡུལ་བཞིན་ལམ་ལྷོང་ཡོང་གི་མེད་གང་ལ་ཞེ་ན་ཕྱི་ལོ་ ༢༠༡༡ ཟླ་ ༣ ནས་ད་བར་བོད་མི་གྲངས་ ༢༥ རང་ལུས་མེར་སྲེག་བཏང་སྟེ་རྒྱ་གཞུང་གི་སྲིད་བྱུས་དག་ལ་ངོ་རྒོལ་གནང་ཡོད།  དེའི་ཁོངས་མི་གྲངས་ ༡༨ གཞིས་སྤོས་ཟིན་པའི་སྤྱི་ཚོགས་རིང་ལུགས་ཀྱི་གྲོང་གསེབ་གསར་བའི་ནང་གནས་སྡོད་བྱེད་མཁན་འབྲོག་པ་རྣམས་ཡིན།  དེར་བརྟེན་རྒྱ་གཞུང་ནས་སྒྲོག་བཞིན་པའི་༼དགའ་མོས་སྲིད་བྱུས་༽དེ་དོན་དུ་ཇི་བཞིན་གནས་མེད།
རྒྱ་གཞུང་སྐུ་ཚབ་ནས་ཞིབ་འཇུག་མཁས་དབང་ཁོང་བོད་ནང་ཕེབས་མེད་པར་བརྟེན་བོད་དོན་ཐོག་དགོངས་འཆར་གནང་མི་ཆོག་པའི་སྐྱོན་བརྗོད་གནང་བྱུང་ཞེས་གསུངས།
མཁས་དབང་ཁོང་གིས་མཇུག་བསྡོམས་གསུང་བཤད་ནང་།  བོད་ནང་རྒྱུན་དུ་ནས་འབྲེལ་ལམ་དང་།  དྲ་རྒྱ།  ཁ་པར།  སོགས་བཀག་བསྡོམས་དང།  ད་ལྟ་བོད་ནང་རང་དབང་ལྡན་པའི་ཞིབ་འཇུག་པ་དང་གསར་འགོད་པ་བཅས་ལ་རྒྱ་གཞུང་ནས་སྒོ་བརྒྱབ་སྟེ་འགྲོ་འོང་གཏོང་གི་མེད།  ཉེ་ལམ་བི་བི་སི་རླུང་འཕྲིན་ཁང་གི་གསར་འགོད་པ་ཞིག་ལ་རྒྱ་གཞུང་ནས་གལ་ཏེ་བོད་ཐོག་གསར་འགྱུར་འགོད་གཏོང་གནང་ཚེ་ཕྱིར་འབུད་བྱ་རྒྱུའི་སྡིགས་བསྐུལ་བྱས་འདུག་ཅེས་གསུངས་ཡོད་འདུག