༢༠༡༢ ཟླ་ ༣ ཚེས་ ༢༣ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༢༣ ཉིན་རྡ་ས་བཞུགས་སྒར་བོད་ཀྱི་སྨན་རྩིས་ཁང་གི་མཐོ་སློབ་ཚོགས་ཁང་དུ་བོད་ཀྱི་སྨན་རྩིས་ཁང་དབུ་བརྙེས་ནས་མི་ལོ་ ༥༡ འཁོར་བའི་ལོ་འཁོར་ཚོགས་ཆེན་རྒྱས་པ་དང་ལྔ་བཅུའི་དུས་དྲན་གྱི་མཇུག་བསྡོམས་མཛད་སྒོ་སྲུང་བརྩི་གཟབ་རྒྱས་ཞུས་པ།
དེ་ཉིན་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་བཀའ་ཁྲི་བློ་བཟང་སེང་གེ་མཆོག་དང་། ཆེས་མཐོའི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་གཙོས་ཁྲིམས་ཞིབ་པ་གཞན་ངག་དབང་ཐུབ་བསྟན་མཆོག བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག སྨན་རྩིས་ཁང་གི་འགན་འཛིན་རྟ་མགྲིན་ལགས། སྨན་པའི་ལྷན་ཚོགས་ཀྱི་འགན་འཛིན་ཚེ་རིང་ཐག་གཅོད་ལགས། དེ་བཞིན་སྐུའི་བླ་སྨན་པ་རྣམ་གཉིས། སྡེ་ཚན་ཁག་གི་འགན་འཛིན་རྣམ་པ། ཕྱོགས་མཐའི་ཡན་ལག་ཁག་གི་སྨན་པ་རྣམ་པ། ལས་བྱེད་དང་དགེ་ལས་སློབ་ཕྲུག་བཅས་བརྒྱ་ཕྲག་བརྒལ་བ་ལྷན་འཛོམས་ཐོག་སྐུ་མགྲོན་གཙོ་བོ་མཆོག་གིས་སྣང་གསལ་ཞལ་ཕྱེ་གནང་རྗེས་བོད་བསྟན་སྲིད་ཆེད་རང་ལུས་མེར་སྲེག་གཏོང་མཁན་རྣམས་ཀྱིས་གཙོས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེ་མཚོན་སླད་མྱ་ངན་གུས་འདུད་དང་ངག་བཅད་སྐར་མ་གཅིག་གནང་གྲུབ་བསྟུན་གཡུ་ཐོག་གསོལ་འདེབས་གསུང་འདོན་གནང། དེ་ནས་བོད་ཀྱི་སྨན་རྩིས་ཁང་གི་ཆེེས་མཐོའི་སྨན་རྩིས་ལྷན་ཚོགས་ཀྱི་ཚོགས་གཙོ་རྟ་མགྲིན་ལགས་ཀྱིས་དུས་དྲན་ངོ་སྤྲོད་དང་འབྲེལ་བའི་གསུང་བཤད་གནང་མཚམས་སྤྱི་འཐུས་ཚོགས་གཞོན་མཆོག་གིས་ཞབས་ལོ་ཉི་ཤུ་དང་སུམ་ཅུ་འཁོར་བའི་ལས་བྱེད་རྣམས་ལ་ལེགས་སྐྱེས་དང་ཕྱག་འཁྱེར་གནང་གྲུབ་བསྟུན་ཕྱི་ལུགས་སྐུའི་བླ་སྨན་ཚེ་བརྟན་ལགས་ཀྱིས་སྨན་སྦྱོར་འགན་འཛིན་སྨན་རམས་པ་འཇམ་དབྱངས་བཀྲིས་ལགས་སུ་རིན་ཆེན་བཙོ་ཐལ་ཐེངས་དྲུག་པའི་ལག་ལེན་དམར་ཁྲིད་འགན་འཁུར་བའི་ཕྱག་འཁྱེར་གནང་། དེ་རྗེས་འཕྲོད་བསྟེན་བཀའ་བློན་མཆོག་གིས་སྨན་རམས་པ་འབྲིང་བ་དང་འབྲིང་བ་ཚོར་སློབ་ཁྲིད་གནང་མཁན་དང་སྨན་རྩིས་སློབ་མ་རྒྱུགས་འབྲས་ལེགས་སོན་ཁག་བཅས་ལ་ཕྱག་འཁྱེར་དང་བྱ་དགའ་གནང་རྗེས་ལྔ་བཅུའི་གོ་སྒྲིག་གི་ཚོགས་གཙོ་དགེ་བཤེས་བསྟན་པ་བཀྲིས་ལགས་ཀྱིས་ལས་བསྡོམས་སྒྲོགས་སྦྱང་གནང་མཚམས་སྐུ་མགྲོན་གཙོ་བོ་མཆོག་གིས་གསོ་རིག་བླ་བརྒྱུད་ཚོགས་ཞིང་དང་ལྔ་བཅུའི་ལོ་རྒྱུས་དེབ་ཕྲེང་དབུ་འབྱེད་གནང་གྲུབ་བསྟུན་སྨན་རྩིས་ཁང་གི་འགན་འཛིན་རྟ་མགྲིན་ལགས་ཀྱིས་ལྔ་བཅུའི་ལས་དོན་ཐོག་རམ་འདེགས་གནང་མཁན་དང་གོ་སྒྲིག་ཚོགས་ཆུང་ཚོགས་མི་རྣམས་ལ་ཐུགས་རྗེ་ལེགས་འབུལ་གྱི་ཕྱག་རྟགས་དང་ཕྱག་འཁྱེར་གནང་། དེ་ནས་ཆེས་མཐོའི་ཁྲིམས་ཞིབ་པ་ཆེ་བ་མཆོག་གིས་དབུས་དང་ཕྱོགས་མཐའི་ཡན་ལག་སྨན་ཁང་ཁག་ལ་བླ་བརྒྱུད་ཀྱི་ཚོགས་ཞིང་དང་ལོ་རྒྱུས་དེབ་ཕྲེང་གནང་རྗེས་བོད་མི་མང་སྤྱི་འཐུས་ཚོགས་གཞོན་མཆོག་གིས་དང་བཀའ་ཁྲི་མཆོག་གི་གསུང་བཤད་གནང་། དེ་ནས་བོད་ཀྱི་སྨན་རྩིས་ཁང་གི་དྲུང་ཆེ་ཚེ་རིང་ཕུན་ཚོགས་ལགས་ཀྱི་ཐུགས་རྗེ་ཆེ་ཞུས་ཏེ་མཛད་སྒོ་གྲོལ་ཡོད་པ་བཅས། །