༢༠༡༢  ཟླ་ ༣ ཚཻས་ ༡༣ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༡༠ བོད་མིའི་གསུམ་བཅུའི་དུས་དྲན་ཐེངས་ ༥༣ དང་སྟབས་བསྟུན་ཅེཀ་སྤྱི་མཐུན་རྒྱལ་ཁབ་གྲོས་ཚོགས་གོང་མའི་ཚོགས་མི་དྲུག་ལས་བསྡུས་པའི་བོད་དོན་རྒྱབ་སྐྱོར་གྱི་ཚོགས་པ་གསར་འཛུགས་གནང་ཡོད། སྐབས་དེར་ཁོང་རྣམ་པས་གསར་འགོད་གསལ་བསྒྲགས་ཤིག་སྤེལ་བའི་ནང་འཁོད་དོན་གཙོ་བོ་ནི། རྒྱ་ནག་གཞུང་གིས་བོད་མི་རྩོམ་པ་པོ་དང་སྒྱུ་རྩལ་བ། དེ་བཞིན་དྲ་ལམ་ཐོག་ཟིན་བྲིས་འགོད་མཁན་སོགས་གང་བྱུང་འཛིན་བཟུང་བྱེད་བཞིན་པ་དེར་སེམས་འཚབ་ཤུགས་ཆེ་ཡོད་པ་དང། བོད་མི་རྣམས་དམ་བསྒྲགས་འོག་དཀའ་ངལ་ཇེ་ཆེར་འགྲོ་བཞིན་ཡོད་པ་ནི་ད་བར་བོད་མི་ ༢༦ གིས་རང་ལུས་མེར་སྲེག་བཏང་སྟེ་བོད་མི་ ༡༩ འདས་གྲོངས་སུ་གྱུར་ཡོད་པ་སོགས་ལས་གསལ་པོར་མཚོན་ཐུབ། ཅེས་སོགས་འཁོད་ཡོད། བོད་དོན་རྒྱབ་སྐྱོར་གྱི་ཚོགས་པ་གསར་པ་དེའི་དགོས་འདུན་གཙོ་བོ་ནི། བོད་ནང་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་དང་བཙན་བྱོལ་བོད་མི་ཚོས་འཚེ་མེད་ཞི་བའི་ལམ་ནས་འཐབ་རྩོད་བྱེད་བཞིན་པ་དེར་རྒྱབ་སྐྱོར་བྱས་ཏེ་བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་འོག་བོད་མིའི་ཆོས་དང་རིག་གཞུང་སྲུང་སྐྱོབ་བྱ་རྒྱུ་ཡིན་འདུག
གཞན་ཡང་དེ་ཉིན་རྒྱལ་སྤྱིའི་ཉེས་ཡངས་ཚོགས་པས་གོ་སྒྲིག་འོག་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རཱག་(Prague)ཏུ་རྟེན་གཞི་བྱས་པའི་རྒྱག་ན་གཞུང་ཚབ་ཁང་གི་མདུན་དུ་བོད་མི་དང་ཅེཀ་ཡུལ་མི་བོད་དོན་རྒྱབ་སྐྱོར་བ་བཅས་ཁྱོན་མི་གྲངས་ ༢༠༠ ཙམ་གྱིས་དབྱིན་ཡིག་དང་རང་སྐད་ཐོག་བྲིས་པའི་སྦྱར་ཡིག་བསྣམས་ཏེ་ངོ་རྒོལ་རྔམ་སྟོན་བྱས་ཡོད། ཕྱོགས་མཚུངས་ཅེཀ་སྤྱི་མཐུན་རྒྱལ་ཁབ་ཀྱི་གྲོང་སྡེ་ལྷན་ཚོགས་དང་རྒྱལ་སའི་འཛིན་སྐྱོང་ལས་ཁུངས། དེ་བཞིན་གྲོང་སྡེ་སྤྱི་ཁྱབ་ལས་ཁུངས་སོགས་ལས་ཁུངས་ཆེ་ཆུང་ཁྱོན་བསྡོམས་ ༤༠༠ ལྷག་གི་ཕྱི་ནང་གང་སར་བོད་ཀྱི་རྒྱལ་དར་སྒྲེང་འཛུགས་གནང་སྟེ་བོད་མིའི་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་གྱི་རྣམ་པ་ཤུགས་ཆེ་བསྟན་ཡོད་པ་བཅས།།