༢༠༡༢ ཟླ་ ༣ ཚེས་ ༢༤ རེས་གཟའ་སྤེན་པ།
༄༅། །རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་༸གོང་ས་༸སྐྱབས་མགོན་ཆེན་པོ་མཆོག་གི་ཀུན་ཕན་བདེ་རྩ་ཚོགས་པས་གོ་སྒྲིག་ཞུས་ཐོག་མགོན་པོ་གང་ཉིད་མཆོག་གིས་ཕྱི་ལོ་ ༢༠༡༢ ཟླ་ ༣ ཚེས་ ༢༣ ནས་ ༢༥ བར་རྒྱ་གར་རྒྱལ་ས་ལྡི་ལིར་ཡོད་པའི་ཨ་ཤོ་ཀ་མགྲོན་ཁང་ནང་རྒྱ་གར་གྱི་གནད་ཡོད་མི་སྣ་སུམ་བརྒྱ་ཙམ་ལ་བདེན་བཞིའི་ཆོས་འབྲེལ་དབུ་འཛུགས་བསྐྱངས་ཡོད།
དེ་ཡང་ཆོས་འབྲེལ་དབུ་འཛུགས་མ་མཛད་གོང་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་དོན། ང་ཚོ་ཆོས་ཁས་ལེན་མཁན་དང་མི་ལེན་མཁན་སུ་འདྲ་ཞིག་ཡིན་རུང་རང་བདེ་ཁོ་ནའི་ཆེད་བསམ་བློ་བཏང་ནས་མི་ཚེ་བསྐྱལ་ན། ཕུགས་རྒྱང་རིང་པོའི་ཐོག་སྤྱི་ཚོགས་ནང་གྲུབ་འབྲས་ངན་པ་དེ་འདྲ་འཐོན་རྒྱུའི་ཉེན་ཁ་ཡོད། ང་ཚོ་བོད་པ་ཚོས་རྒྱ་གར་དེ་བཞིན་ང་ཚོའི་དགེ་རྒན་ལ་ངོ་འཛིན་བྱེད་བཞིན་ཡོད། རྒྱ་གར་ནི་འཚེ་བ་མེད་པའི་ལྟ་གྲུབ་ཉམས་ལེན་བྱེད་མཁན་ཞིག་ཡིན་སྟབས། འཛམ་གླིང་གི་དགེ་རྒན་ཞིག་ཡིན་པ་ཡང་ངོས་ཀྱིས་དྲན་ཞིང་ཡོད། འོན་ཀྱང་རྒྱ་གར་མི་མང་པོ་ཞིག་གིས་ཐེ་ཚོམ་མེད་པར་ལྐོག་ཟ་རུལ་སུངས་བྱེད་ཀྱི་ཡོད་པ་མ་ཟད། ལྐོག་ཟ་རུལ་སུངས་བྱེད་མཁན་དེ་དག་གིས་སྔ་དྲོ་ལྷ་ལ་གསོལ་བ་སྨོན་ལམ་སོགས་འདེབས་བཞིན་ཡོད། དོན་ངོ་མའི་ཐོག་ལྐོག་ཟ་རུལ་སུངས་དང་ལྷར་གསོལ་བ་སྨོན་ལམ་བཏབས་པ་དེ་གཉིས་འགལ་ཟླར་འགྲོ་གི་ཡོད། ཡང་ན་དཀོན་མཆོག་ཁས་བླངས་ཏེ་ལས་དོན་གང་ཞིག་ཡིན་རུང་དྲང་པོ་དྲང་ཤག་བྱེད་དགོས། ཡང་ན་དཀོན་མཆོག་ཁས་མ་བླངས་པར་ལྐོག་ཟ་རུལ་སུངས་བྱེད་རྒྱུ་དེ་རེད། དེ་བཞིན་དུས་ཚོད་ནི་སྐད་ཅིག་སྐད་ཅིག་ལ་འགྱུར་བ་འགྲོ་བཞིན་ཡོད། དཔེར་ན། རྒྱ་གར་ལ་རང་བཙན་ཐོབ་ནས་ལོ་ངོ་ ༦༠ ལྷག་འགྲོ་གི་ཡོད། དེར་བརྟེན་རྒྱ་གར་མི་མང་གིས་དེས་འགྲིགས་སོང་བསམས་ནས་བསྡད་ན་ནོར་འཁྲུལ་རེད། དུས་ཚོད་དང་སྤྱི་ཚོགས་ཀྱི་འགྱུར་འགྲོས་ལ་བསྟུན་ཏེ་འགྲོ་དགོས་པ་མ་ཟད། གོ་སྐབས་དམ་འཛིན་དང་ཉེན་ཁར་གདོང་ལེན་བྱ་རྒྱུ་དེ་ཧ་ཅང་གལ་ཆེན་པོ་ཡིན་ཞེས་བཀའ་སློབ་སྩལ་ཏེ་ཆོས་འབྲེལ་དབུ་འཛུགས་བསྐྱངས་ཡོད།
དེ་བཞིན་ཉིན་མཐའ་མར་མགོན་པོ་གང་ཉིད་མཆོག་གིས་དད་ལྡན་ཆོས་ཞུ་བ་རྣམས་ལ་སྒྲོལ་དཀར་གྱི་ཚེ་དབང་ཡང་བཀའ་དྲིན་ཆེ་བ་སྩལ་རྒྱུ་ཡིན་འདུག་པ་བཅས། །