༢༠༡༢ ཟླ་ ༢ ཚེས་ ༢༡ རེས་གཟའ་མིག་དམར།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། གཞིས་རྩེ་ས་ཁུལ་ཁོངས་ངམ་རིང་རྫོང་ཁོངས་བསྟར་རྒྱུད་ཤང་ཁོངས་སུ་ཡོད་པའི་ལྷོ་ལྡིང་དགོན་པ་དང༌། དགོན་པའི་ཉེ་འདབས་ཀྱི་མདོག་གཞུང་ས་གནས་ཀྱི་གྲོང་གསེབ་ཡོངས་ལ་རྒྱ་ནག་གཞུང་གིས་ཆེད་གཏོང་བྱས་པའི་ལས་དོན་རུ་ཁག་ཟེར་བས་བོད་ཀྱི་ལོ་གསར་རིང་རྒྱ་གཞུང་གི་དར་དམར་སྒྲེང་འཛུགས་བྱེད་དགོས་པའི་བཙན་བཀའ་བཏང་བར། ལྷོ་ལྡིང་དགོན་པའི་དགེ་འདུན་པ་ཚོས་དགོན་པ་ནི་ནང་ཆོས་སློབ་གཉེར་བྱེད་ཡུལ་གྱི་བསྟི་གནས་ཤིག་ཡིན་པ་མ་གཏོགས་ཆབ་སྲིད་སློབ་གསོ་སྤྲོད་ཡུལ་དང་བྱེད་སྒོ་སྤེལ་ཡུལ་མིན་པས་དགོན་པའི་ཐོག་སྟེང་དུ་དར་དམར་སྒྲེང་འཛུགས་བྱས་ན་མོས་མཐུན་རྩ་བ་ནས་མེད་པ་དང༌། གལ་སྲིད་ངེས་པར་དུ་འཛུགས་དགོས་ན་ཆོས་དར་འཁྱེར་ཤོག་ཅེས་སོགས་བརྗོད་དེ་རྒྱ་ནག་གཞུང་གི་དར་དམར་དགོན་པའི་ཐོག་སྟེང་དུ་འཛུགས་རྒྱུར་ངོ་རྒོལ་མཐའ་གཅིག་ཏུ་བྱས་རྐྱེན་དགེ་འདུན་པ་ལྔ་འཕྲལ་མར་འཛིན་བཟུང་བྱས་ཏེ་དགོན་པར་དར་དམར་བཙུགས་རྒྱུ་སོགས་བཙན་ཤུགས་ཀྱིས་ལག་བསྟར་མུ་མཐུད་བྱེད་མུས་ཡིན་འདུག
དེ་མིན་གཞིས་རྩེ་ས་ཁུལ་ལྷ་རྩེ་རྫོང་ལྷ་རྩེ་ཆོས་སྡེ་ལྷ་རྩེ་དགའ་ལྡན་འོག་མིན་གླིང་དུ་སྔ་ལོའི་ལོ་མཇུག་ནས་ལས་དོན་ཚོགས་ཆུང་འཕར་མ་བཏང་སྟེ་ཁོང་ཚོས་གནས་སྐབས་སམ་ལོ་གསུམ་བསྡད་དེ་བསམ་བློའི་སློབ་གསོ་ཟེར་བའི་ལས་འགུལ་སྤེལ་རྒྱུ་ཡིན་ལུགས་བརྗོད་ཡོད་པ་དང༌། ཉེ་དུས་སླར་ཡང་ལས་དོན་ཚོགས་ཆུང་དགོན་པར་གཏན་སྡོད་བྱ་རྒྱུའི་ཆེད་སྡོད་ཁང་གསར་རྒྱག་བྱེད་འཆར་ཡོད་པར་དགོན་པ་དེའི་དགེ་འདུན་པ་ཚོས་དགོན་པ་ནི་དགེ་འདུན་པ་སློབ་གཉེར་བྱ་ཡུལ་གྱི་གནས་ཡིན་པ་ལས་མི་སྐྱ་གཏན་སྡོད་བྱ་ཡུལ་གྱི་གནས་མ་རེད་ཅེས་ལས་དོན་རུ་ཁག་དགོན་པར་གཏན་སྡོད་བྱ་རྒྱུར་ངོ་རྒོལ་ཤུགས་ཆེ་བྱས་རྐྱེན་ད་ལྟ་དགོན་པར་དམ་བསྒྲགས་ཤུགས་ཆེན་བྱེད་བཞིན་ཡོད་པའི་གནས་ཚུལ་ཐོན་འདུག་པ་བཅས། །