༢༠༡༢ ཟླ་ ༢ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༢ ཚེས་ ༨ རེས་གཟའ་ལྷག་པའི་ཉིན་བོད་ནང་རང་ལུས་མེར་སྲེག་བཏང་བའི་གཞིས་བཞུགས་བོད་རིགས་སྤུན་ཟླ་འདས་གསོན་རྣམས་དང་དེ་བཞིན་མེ་མདའི་འོག་རྐྱེན་འདས་སུ་གྱུར་བ་དང་རྨས་སྐྱོན་ཕོག་པ། གཞན་ཡང་རྒྱ་མིའི་དྲག་ཆས་ཉེན་རྟོག་མི་སྣས་བཙན་འཁྲིད་བྱས་པ་བཅས་ལ་གདུང་སེམས་མཉམ་སྐྱེའི་རྒྱབ་སྐྱོར་མཚོན་སླད་འཛམ་གླིང་ཁྱོན་ཡོངས་སུ་བོད་མི་དང་བོད་དོན་རྒྱབ་སྐྱོར་བ། དེ་བཞིན་དྲང་བདེན་ལ་དགའ་བའི་མི་རྣམས་ཀྱིས་ཉིན་བརྒྱ་དུས་གཅིག་ཏུ་མཆོད་འབུལ་སྨོན་ལམ་དང་མར་མེའི་ཁྲོམ་སྐོར་བྱ་རྒྱུའི་ལས་རིམ་སྔོན་སོང་ལྟར། དེ་ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་བོད་མིའི་སྒྲིག་འཛུགས་བཀའ་སྤྱི་མཐུན་མོང་གིས་གོ་སྒྲིག་འོག་ཕྱེད་ཡོལ་ཆུ་ཆོད་ ༣ ཐོག་བཙན་བྱོལ་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་མཆོག་གིས་གཙོས་ཁྲིམས་ཞིབ་པ་གཞན་གཅིག་མཆོག་དང་།
བཀའ་ཁྲི་མཆོག་གིས་གཙོས་བཀའ་བློན་ལས་རོགས་རྣམ་པ། སྤྱི་འཐུས་ཚོགས་གཙོ་སྦྲེལ་པོས་གཙོས་སྤྱི་འཐུས་རྒྱུན་ལས་རྣམ་པ། རྣམ་གྲྭ་ཕན་བདེ་ལེགས་བཤད་གླིང་གི་མཁན་རིན་པོ་ཆེ་མཆོག
དེ་བཞིན་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་དྲུང་ཆེ་ཆུང་རྣམ་པ་གཙོ་བོར་གྱུར་བའི་སྲི་ཞུའི་ལས་བྱེད་རྣམ་པ། བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ་དང། གཞན་ཡང་གཉུག་མར་གནས་པ། གློ་བུར་ལྷགས་པའི་མང་ཚོགས་བཅས་ཁྱོན་མི་གྲངས་བརྒྱ་ཕྲག་བརྒལ་བས་གདུང་སེམས་མཉམ་སྐྱེའི་ལས་འགུལ་དང་འབྲེལ་མཆོད་འབུལ་སྨོན་ལམ་གསུང་འདོན་གནང་རྗེས། ཕྱེད་ཡོལ་ཆུ་ཚོད་ ༥ ཐོག་གཙུག་ལག་ཁང་གི་སྒོ་རའི་ནང་མང་ཚོགས་རྣམས་འདུ་འཛོམས་ཀྱིས་ལག་ཏུ་མར་མེ་དང་ཁ་རས་ནག་པོ་གྱོན་ཏེ་བདེན་ཚིག་སྨོན་ལམ་ལན་གསུམ་དབྱངས་སུ་གྱེར་རྗེས་བཀའ་ཁྲི་མཆོག་གིས་གསུང་བཤད་གནང་དོན།
སྐྱབས་གནས་དགེ་འདུན་སྡེ་དང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་སོགས་འདིར་འདུས་རྣམ་པར་ཞུ་རྒྱུར། དེ་རིང་བཞུགས་སྒར་རྡ་སར་འཛོམས་དགོས་དོན་ཚང་མས་ཤེས་གསལ་རེད། བོད་ནང་ཛ་དྲག་གི་གནས་ཚུལ་བྱུང་སྟེ་རྒྱ་ནག་གི་མཁྲེགས་འཛིན་གྱི་སྲིད་བྱུས་འོག་ཤ་ཁྲག་གཅིག་པའི་བོད་རིགས་སྤུན་ཟླ་མང་དག་ཅིག་དམར་གསོད་དང་ཉེས་རྡུང་། དེ་བཞིན་འཛིན་བཟུང་བྱས་པ་ཉིན་རེ་ལས་མ་འདས་པར་མང་དུ་འགྲོ་བཞིན་ཡོད་སྟབས། ད་ལྟ་བར་དུ་བོད་བསྟན་སྲིད་མི་རིགས་ཆེད་རང་སྲོག་བློས་གཏོང་མཁན་གྱི་རྒྱལ་གཅེས་པ་རྣམ་པར་གདུང་སེམས་མཉམ་སྐྱེ་མཚོན་ཆེད་དེ་རིང་མཆོད་འབུལ་སྨོན་ལམ་ཚོགས་ཀྱི་ཡོད། ངས་སྤོབས་པའི་ཐོག་ནས་ཞུ་རྒྱུར་གཞུང་དམངས་གཉིས་ནས་འབོད་སྐུལ་ཞུས་པ་ལྟར། རྒྱལ་སྤྱིའི་སྤྱི་ཡོངས་ནས་གདུང་སེམས་མཉམ་སྐྱེ་ཡོད་པའི་མཆོད་འབུལ་སྨོན་ལམ་ཚོགས་ཀྱི་ཡོད་པ་དེས་རྒྱ་ནག་གཞུང་ནས་ཧམ་བཤད་ཐོག་མཁྲེགས་འཛིན་གྱི་སྲིད་བྱུས་བཟུང་བ་དེ་དྲང་བདེན་མིན་པ། དྲང་བདེན་ལ་དགའ་བའི་རྒྱལ་སྤྱིའི་མང་ཚོགས་ཀྱིས་ངོས་ལེན་གྱི་རྣམ་པ་གསལ་སྟོན་བྱས་པ་ཞིག་ཆགས་ཡོད། ཅེས་དང་།
ཡང་བཀའ་ཁྲི་མཆོག་གིས་གསུང་དོན། བོད་ནང་གི་གཞིས་བཞུགས་སྤུན་ཟླ་ཚོས་ཕྱི་ལོ་ ༢༠༠༨ ནས་ཞི་བའི་སྒེར་ལངས་ཆེན་པོ་བྱས་རྗེས་རིམ་བཞིན་ཕྱི་ལོ་ ༢༠༠༩།༢༠༡༠།༢༠༡༡ ནང་བོད་མི་ཚོས་སེམས་ཤུགས་དང་སྙིང་སྟོབས་ཞུམ་པ་མེད་པའི་ཐོག་ནས་བོད་མིའི་ངོ་བོ་སྲུང་སྐྱོབ་དང་བོད་ལ་རང་དབང་དགོས་པ། ༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་སོགས་ཀྱིས་འབོད་སྒྲ་བསྒྲགས་ཏེ་ཞི་རྒོལ་གྱི་རྣམ་པ་འདྲ་མིན་སྟོན་སྐབས་རྒྱ་ནག་གཞུང་གིས་བོད་མི་དམར་གསོད་དང་ཉེས་རྡུང་བཏང་བ། དེ་བཞིན་བཙོན་འཇུག་བྱས་ཏེ་དྲག་གཅོད་ཀྱི་སྲིད་བྱུས་ལག་བསྟར་བྱས་ཡོད་ནའང་། ཕྱི་ལོ་ ༢༠༡༢ ལོར་བོད་ནང་དུ་བོད་མི་ ༧ གིས་རང་ལུས་མེར་སྲེག་བཏང་ཡོད། ཁོང་རྣམ་པའི་ཆེད་གནས་མཆོག་རྡོ་རྗེ་གདན་དུ་དུས་འཁོར་དབང་ཆེན་ལ་རྒྱལ་ཁབ་ ༦༣ ནས་མི་འབུམ་ལྷག་འདུ་འཛོམས་བྱུང་བའི་སྐབས་སུ་མཆོད་རྟེན་མདུན་དུ་མཆོད་འབུལ་སྨོན་ལམ་གོ་སྒྲིག་ཞུས་ཡོད། དེ་བཞིན་བྲག་མགོ་དང་གསེར་རྟ། རྔ་པ། རྒྱལ་རོང་གིས་གཙོས་བོད་ཀྱི་ས་ཁུལ་ནང་ཞི་རྒོལ་བྱེད་སྐབས། རྒྱ་ནག་གཞུང་གི་དམག་མིས་མེ་མདའ་བརྒྱབ་སྟེ་བོད་མི་དྲུག་རྐྱེན་འདས་སུ་བཏང་བ་ང་ཚོས་ཤེས་ཀྱི་ཡོད། བོད་མི་དྲུག་ཅུ་ལྷག་ལ་རྨས་སྐྱོན་ཕོག་པའི་ཁྲོད་ནས་འགའ་ཤས་ལ་རྨས་སྐྱོན་ཚབས་ཆེན་ཕོག་པ་ཡང་ང་ཚོས་ཤེས་ཀྱི་ཡོད། ཕྱི་རྒྱལ་ཚགས་པར་རྒྱག་མཁན་གྱི་དེའི་སྐོར་སྐད་ཆ་དྲིས་སྐབས་ངས་བོད་མི་རང་ལུས་སྲེག་གཏོང་མཁན་དེ་དག་གྲངས་ཀ་མིན་པར་སྲོག་ལྡན་གྱི་མི་ཡིན་པ་བརྗོད་ཀྱི་ཡོད་ལ་ང་ཚོས་ཀྱང་དེ་ལྟར་ཤེས་དགོས་ཀྱི་འདུག ཅེས་དྲན་སྐུལ་ཞུ་གི་ཡོད། ཁ་སང་རང་རྒྱ་མིའི་མཁས་དབང་ཞིག་གིས་རྩོམ་ཡིག་ཅིག་བྲིས་འདུག རྩོམ་ཡིག་དེའི་མཐའ་བསྡོམས་ལ་འབོད་སྐུལ་ཞུས་འདུག རྒྱ་མི་རིགས་དང་རྒྱལ་སྤྱིའི་སྤྱི་ཡོངས་ནས་བོད་མིར་རྒྱབ་སྐྱོར་བྱེད་དགོས། གང་ལ་ཞེ་ན། དེང་སྐབས་བོད་ཀྱི་རྒྱལ་ས་ལྷ་སར་བོད་མི་ལས་རྒྱ་མི་མང་བ་དང་། དགེ་འདུན་པ་ལས་དམག་གི་མང་བ། ནང་གི་སྒེའུ་ཁུང་ལས་མི་སྲུང་མཁན་གྱི་དཔར་ཆས་མང་བ་ཡོད། དེའི་ཐོག་ངས་ཁ་སྣོན་ཞིག་བརྒྱབ་ན་བོད་ནང་མཆོད་མེ་ལས་མེ་མདའ་མང་བ་ཡོད། དེ་བཞིན་བཀའ་སྤྱི་ནས་རྒྱལ་སྤྱིའི་སྤྱི་ཡོངས་ལ་འབོད་སྐུལ་ཞུས་པ་ལྟར། རྒྱལ་ཁབ་མང་པོ་ཞིག་གིས་བོད་ཀྱི་གནད་དོན་དེ་ཛ་དྲག་ཡིན་པ་དང་མ་དྲང་བ་ཡིན་པ། སེམས་འཚབ་ཡོད་པ་དང་བོད་མིར་རྒྱབ་སྐྱོར་ཡོད་པའི་རྣམ་པ་འདྲ་མིན་བཏོན་ཡོད། དམིགས་བསལ་ཕྱི་འབྲེལ་ལས་ཁུངས་དང་དེ་བཞིན་འབྲེལ་ཡོད་ལས་ཁུངས་ཁག་གིས་རྒྱ་ནག་གཞུང་ནས་སྲིད་བྱུས་བཟུང་བ་དེ་འགྲིག་གི་མི་འདུག བོད་ཀྱི་གནད་དོན་དེ་ཞི་བ་དང་གྲོས་མོལ་སྒོ་ནས་སེལ་དགོས་ཀྱི་འདུག ཅེས་རྒྱབ་སྐྱོར་རྣམ་པ་ཤུགས་ཆེན་བཏོན་ཡོད། རྒྱལ་སྤྱི་སྤྱི་ཡོངས་ནས་ད་ལྟ་བར་རྒྱབ་སྐྱོར་གྱི་རྣམ་པ་ཤུགས་ཆེན་བཏོན་པ་དེར་བཀའ་སྤྱི་གཉིས་ནས་ཐུགས་རྗེ་ཆེ་ཞུ་རྒྱུ་དང་འབྲེལ་ནན་ཏན་ཐོག་འབོད་སྐུལ་ཞུ་རྒྱུར་རྒྱབ་སྐྱོར་ཡོད་ཅེས་གསུངས་པ་གཅིག་པུ་མིན་པར་ཁ་ཡོད་ལག་ཡོད་ཐོག་ནས་བོད་ནང་ཕེབས་ཏེ་བོད་མིར་སྡུག་བསྔལ་དང་རྒྱ་ནག་གཞུང་ནས་སྲིད་བྱུས་གང་འདྲ་འཛིན་ཡོད་པར་ཞིབ་འཇུག་བྱེད་པར་ཕེབས་རོགས་གནང་ཞུ་རྒྱུ་ཡིན། བོད་ཀྱི་གནས་སྟངས་སྤྱི་དང་། ཡང་སྒོས་ཀིརྟི་དགོན་པའི་དགེ་འདུན་པ་མང་དག་ཅིག་གིས་རང་ལུས་མེར་སྲེག་བཏང་བའི་རྐྱེན་གྱིས་ང་ཚོས་འབོད་སྐུལ་ཞུས་པར་ལྟར། ཡུ་རོབ་གྲོས་ཚོགས་ཐོག་ནས་རྒྱབ་སྐྱོར་གྱི་རྣམ་པ་སྟོན་ཆེད་གྲོས་ཆོད་བཞག་ཡོད་ལ་ཨ་རིའི་གྲོས་ཚོགས་ནང་བོད་ཐོག་གྲོས་ཆོད་ཅིག་བཞག་ཡོད་པའི་ཐོག་གྲོས་ཚོགས་ཀྱི་འཐུས་མི་དྲུག་གིས་རྒྱབ་སྐྱོར་གནང་སྟེ་བགྲོ་གླེང་འགྲོ་དང་འགྲོ་མུས་ཡིན། དེར་བརྟེན་ཁོང་རྣམ་པར་ཐུགས་རྗེ་ཆེ་ཞུ་རྒྱུ་དང་ཆབས་ཅིག་དམིགས་བསལ་དེ་སྔོན་སྤྱི་མཐུན་ཚོགས་པའི་སྲིད་འཛིན་གྱི་འོས་མི་ཡིན་མཁན་ཇོན་མེཀ་ཀེན་མཆོག་གིས་ཉེ་ཆར་ཇར་མན་གྱི་གྲོང་ཁྱེར་མི་ལན་དུ་རྒྱ་ནག་གི་ཕྱི་སྲིད་བློན་ཆེན་གཞོན་པ་དང་མཉམ་དུ་ཚོགས་འདུ་འཚོགས་སྐབས་ཁོང་གིས་བོད་ནང་རང་ལུས་མེར་སྲེག་གཏོང་མཁན་དེ་དག་ལ་སེམས་འཚབ་ཆེན་པོ་ཡོད། རྒྱ་ནག་གཞུང་ནས་གདུག་རྩུབ་ཀྱི་སྲིད་བྱུས་ལག་བསྟར་བྱ་རྒྱུ་དེར་མོས་མཐུན་མེད། ཁྱེད་རང་ཚོས་བོད་ནང་ཞི་བའི་སྒོ་ནས་སོ་སོའི་འཐབ་རྩོད་བྱེད་མཁན་དེ་དག་ནམ་ཡང་མེད་པ་བཟོ་ཐུབ་ཀྱི་མ་རེད། ཅེས་གསུངས་འདུག་པས། ཇོན་མེཀ་ཀེན་མཆོག་ལ་བཀའ་སྤྱི་གཉིས་ཀྱིས་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་བཀའ་སྤྱི་གཉིས་ནས་རྒྱལ་སྤྱིའི་གསར་འགོད་པ་བོད་དུ་ཕེབས་ཏེ་དངོས་ཡོད་གནས་ཚུལ་ཞིབ་འཇུག་གནང་རོགས་ཞེས་འབོད་སྐུལ་ཞུས་པ་ལྟར། པེ་ཅིང་དུ་ཡོད་པའི་གསར་འགོད་པ་ཚོ་བོད་ཀྱི་ས་ཆ་ཁག་ཏུ་ཕེབས་རྒྱུའི་འབད་བརྩོན་གནང་འདུག དམིགས་བསལ་(CNN)གི་གསར་འགོད་པ་ཕེབས་སྐབས་དངོས་ཡོད་གནས་སྟངས་གང་འདྲ་ཡོད་མེད་ཁོང་རང་ཚོར་ཉམས་མྱོང་བྱུང་འདུག ཁོང་ཚོ་བོད་ཀྱི་ས་ཆའི་ཉེ་འགྲམ་དུ་སླེབས་སྐབས་བཀག་འགོག་བྱས་འདུག དེར་བརྟེན་རྒྱ་ནག་ཏུ་ཡོད་པའི་ཕྱི་རྒྱལ་གསར་འགོད་པའི་ཚོགས་པས་སྐྱོན་བརྗོད་དང་སྦྲགས་ངོ་རྒོལ་གྱི་རྣམ་པའི་སྙན་ཞུ་ཞིག་རྒྱ་ནག་གཞུང་ལ་ཕུལ་འདུག རྒྱ་ནག་གཞུང་ལ་ཁྲིམས་དང་གཏམ་བརྗོད་ཀྱི་རང་དབང་ཡོད་ན་ང་ཚོ་བོད་ཀྱི་ས་ཆར་བསྐྱོད་ཆོག་གི་རེད་ཅེས་ཞུས་འདུག རྒྱ་ནག་གཞུང་ནས་རྒྱལ་སྤྱིའི་གསར་འགོད་པ་བོད་དུ་ཕེབས་རྒྱུའི་བཀག་འགོག་བྱེད་ཀྱི་ཡོད་ཀྱང་ཁོང་རྣམ་པར་འབོད་སྐུལ་ཞུ་རྒྱུར། ཁྱེད་རྣམས་ནས་གང་ཐུབ་ཅི་ཐུབ་བྱས་ཏེ་བོད་ཀྱི་ས་ཆར་ཕེབས་རྒྱུའི་འབད་བརྩོན་གནང་རོགས། ཁྱེད་རྣམས་བོད་ཀྱི་དངོས་ཡོད་གནས་ཚུལ་རྟོགས་པའི་ཐོག་འཛམ་གླིང་སྤྱི་ཡོངས་ལ་གསལ་བསྒྲགས་གནང་རོགས་ཞུ་རྒྱུ་ཡིན།
དེ་བཞིན་ཉེ་ཆར་རྒྱ་མིའི་འུ་ཧཱང་ཞེས་པའི་ས་ཆར་རྒྱ་མིས་ཉི་མ་ནས་ཉི་མ་དང་བདུན་ཕྲག་ནས་བདུན་ཕྲག་སྦྲེལ་ཏེ་ངོ་རྒོལ་བྱེད་སྐབས་བྱེད་ཆོག་པ་མ་ཟད། རྒྱ་ནག་གི་ས་གནས་གསར་འགོད་པ་དང་རྒྱལ་སྤྱིའི་ཐོག་ནས་གནས་ཚུལ་དེ་བཀོད་ཡོད། མཐར་ཀོང་ཏུང་མངའ་སྡེའི་དཔོན་རིགས་ཀྱིས་ག་རེ་བྱས་ཡོད་ཅེ་ན། ངོ་རྒོལ་བྱེད་མཁན་དེ་དག་ལ་ཐོབ་ཐང་ག་རེ་ཡོད་ནའང་སྤྲོད་དགོས་ཀྱི་རེད། ས་གནས་ཀྱི་དམར་པོའི་ཚོགས་པ་ཁག་གི་ལས་བྱེད་ཚོ་ཉེས་པ་བཏང་སྟེ་ཕྱིར་འབུད་དེ་འདྲ་བྱས་འདུག འོན་ཀྱང་བོད་ནང་གི་བོད་མི་ཚོས་རང་དབང་དགོས་ཞེས་ཆུ་ཚོད་འགའ་ཤས་འཛོམས་མ་ཐག་མེ་མདའ་བརྒྱབ་པ་དེས་མི་རིགས་དབྱེ་འབྱེད་ཀྱི་རྣམ་པ་གསལ་སྟོན་བྱེད་ཀྱི་ཡོད་པ་དེ་རྒྱལ་སྤྱི་སྤྱི་ཡོངས་ནང་གསལ་པོ་ཆགས་ཡོད། རྒྱ་ནག་གཞུང་ནས་དྲག་གནོན་ཐོག་བོད་དོན་སེལ་རྒྱུའི་རེ་བ་བྱེད་ཀྱི་ཡོད་ན། རེ་བ་དེ་ནམ་ཡང་སྒྲུབ་ཐབས་མེད། བོད་ཕྱི་ནང་གཉིས་སུ་གནས་པའི་བོད་མིས་རང་ཉིད་ལ་ཐོབ་ཐང་ཡོད་པའི་རང་དབང་རྩོད་ལེན་བྱེད་བཞིན་ཡོད་པ་དེ་ལས་ལྷག་པ་ཞིག་རྩོད་ལེན་བྱེད་ཀྱི་མེད། རྒྱ་ནག་གི་ཁེ་ཕན་ཆེད་༸གོང་ས་མཆོག་གིས་ཕུགས་རྒྱང་རིང་པོ་གཟིགས་ཞིབ་མཛད་པའི་ཐོག་ནས་གྲོས་མོལ་གྱི་ཐབས་ལམ་བརྒྱུད་དེ་བཀའ་མོལ་གནང་སྟེ་བོད་རྒྱའི་དཀའ་ངལ་སེལ་ཐབས་བྱེད་དགོས་ཞེས་བཀའ་སློབ་ཕེབས་པ་ལྟར། གྲོས་མོལ་ཐོག་ནས་བཀའ་མོལ་གནང་ན་སེལ་ཐབས་ཡོད་པ་རེད་མ་གཏོགས་བརྙས་བཅོས་དང་དབྱེ་འབྱེད་དྲག་གནོན་འོག་བོད་རྒྱའི་དཀའ་ངལ་སེལ་ཐུབ་ཀྱི་མ་རེད། གང་ལ་ཞེ་ན། བོད་ནང་གི་བོད་མིའི་སྙིང་སྟོབས་དང་ལྷག་བསམ་ནམ་ཡང་མེད་པ་བཟོ་ཐབས་མེད། བོད་ནང་གི་བོད་མི་ཚོ་བོད་ཀྱི་བདག་པོ་ཡིན་པ་ང་ཚོས་ཤེས་གསལ་ཡིན། ཁྱེད་རྣམས་ནས་རང་སྲོག་བློས་གཏོང་གནང་བ་དེ་དག་ང་ཚོས་ནམ་ཡང་བརྗེད་ཐབས་མེད་པ་མ་ཟད། ཁྱེད་རྣམས་ཀྱིས་བློས་གཏོང་གནང་བ་དེ་དག་ང་ཚོས་ཆུད་ཟོས་དང་ཕན་མེད་ནམ་ཡང་ཆགས་འཇུག་གི་མིན་ཞུ་རྒྱུ་ཡིན། དེ་བཞིན་ཁྱེད་རྣམས་པའི་རེ་འདོད་སྒྲུབ་རྒྱུ་ང་ཚོའི་ལས་འགན་རེད། ཅེས་གསུང་བཤད་གནང་ཡོད། བཀའ་ཁྲི་མཆོག་གི་གསུང་བཤད་གྲུབ་བསྟུན་མེག་གན་ཁྲོམ་ལམ་དུ་མར་མེའི་ཁྲོམ་སྐོར་བྱས་ཡོད་པ་བཅས།།
