༢༠༡༢ ཟླ་ ༢ ཚེས་ ༢༨ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༢ ཚེས་ ༢༧ ཉིན་གྱི་སྔ༌དྲོ་བཀའ་བློན་ཁྲི་པ་བློ་བཟང་སེང་གེ་མཆོག་ཨི་ཊ་ལི་རང་སྐྱོང་ལྷོ་ཊི་རོལ་(South Tyrol)དང་ཊེ་རེན་ཊོར་(Trento) ཁུལ་གྱི་སྤྱི་ཁྱབ་མཆོག་གིས་མགྲོན་འབོད་ལྟར་ཨི་ཊ་ལིའི་གྲོང་ཁྱེར་མི་ལཱན་(Milan) དུ་ཕེབས་འབྱོར་གནང་ཡོད།
དེ་ཡང་བཀའ་ཁྲི་མཆོག་ལྷོ་ཊི་རོལ་གྱི་རྒྱལ་ས་བྷོལ་ཛ་ལོར་(Bolzano) འབྱོར་སྐབས་སྤྱི་ཁྱབ་ལུ་ཨི་སི་ཌོན་ཊལ་ཌར་གྱི་བཀའ་ཤག་གི་གཙོ་འཛིན་མཆོག་གིས་ཕེབས་བསུ་ཞུས་ཡོད། དེ་ཉིན་གྱི་ཕྱེད་ཡོལ་བཀའ་ཁྲི་མཆོག་གིས་བརྒྱུད་ལམ་ཁག་གི་ཆེད་དོན་དྲི་བར་ལན་འདེབས་གནང་ཡོད། ཨི་ཊ་ལི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་(Matteo Mecacci) མཆོག་བཀའ་ཁྲི་མཆོག་ཐུག་འཕྲད་སླད་ཨི་ཊ་ལིའི་རྒྱལ་ས་རོམ་ནས་ཆེད་ཕེབས་གནང་ཡོད། ལྷོ་ཊོ་རོལ་གྱི་བོད་དོན་རྒྱབ་སྐྱོར་ཚོགས་པས་བྷོ་ཛ་ལོར་བཀའ་ཁྲི་མཆོག་གི་མི་མང་ལ་གཏམ་བཤད་ཀྱི་ལས་རིམ་ཞིག་གོ་སྒྲིག་ཞུས་ཡོད། བཀའ་ཁྲི་མཆོག་གི་གསུང་བཤད་ཉན་པར་མང་ཚོགས་ཧ་ལས་པའི་མང་པོ་ཕེབས་ཡོད་པར་བརྟེན་ཚོགས་ཁང་ཁེངས་ཏེ་མི་མང་པོ་ཞིག་ལངས་ནས་སྡོད་དགོས་བྱུང་འདུག མང་ཚོགས་གཏམ་བཤད་ཀྱི་ལས་རིམ་དེ་བཞིན་སྐུ་ཞབས་(Gunther Cologna) ལགས་ཀྱིས་གཙོ་སྐྱོང་གནང་ཡོད། སྐབས་དེར་བཀའ་ཁྲི་མཆོག་གིས་གསུང་དོན། ༸གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་་རྒྱུ་དེ་ཡུན་རིང་ནས་དམིགས་པ་ཞིག་ཡིན། དེ་ནི་མགོན་པོ་གང་ཉིད་མཆོག་གིས་དགའ་ཞིང་སྤྲོ་ཞིང་སྤོབས་པའི་སྒོ་ནས་ཐུགས་ཐག་བཅད་གནང་མཛད་པ་ཞིག་རེད། ཞེས་དང། ཡང་བཀའ་ཁྲི་མཆོག་གིས་བོད་ཀྱི་ད་ལྟའི་གནས་སྟངས་སྐོར་གསུང་བཤད་གནང་དོན། བོད་ནང་རྒྱ་ནག་གཞུང་ནས་ཕྱི་རྒྱལ་གྱི་གསར་འགོད་པ་དང་ཡུལ་སྐོར་སྤྲོ་འཆམ་པ་སོགས་འགྲོ་བསྐྱོད་བྱེད་བཅུག་གི་མེད་པ་མ་ཟད། བོད་ནང་བོད་མིར་དྲག་གནོན་ཆེད་རྒྱ་གཞུང་གི་དྲག་ཆས་ཉེན་རྟོག་པ་སྟོང་ཕྲག་མང་པོ་འགྲེམས་འཇོག་བྱས་ཡོད། ཕྱི་ལོ་ ༢༠༠༩ ལོ་ནས་བཟུང་ད་བར་བོད་ནང་བོད་མི་ ༢༣ གྱི་རང་ལུས་མེར་སྲེག་བཏང་ཡོད། ང་རང་བོད་མིའི་ཆབ་སྲིད་ཀྱི་འགོ་ཁྲིད་ཅིག་ཡིན་པའི་ཆ་ནས་བོད་ནང་རང་དབང་དང་།  ༸གོང་ས་མཆོག་བོད་ལ་གདན་འདྲེན་ཞུ་རྒྱུའི་རེ་བ་དང་འབད་བརྩོན་བྱེད་བཞིན་ཡོད། ཅེས་སོགས་ཀྱི་གསུང་བཤད་གནང་ཡོད། ཕྱོགས་མཚུངས་བཀའ་ཁྲི་མཆོག་གིས་ཨི་ཊ་ལིའི་མི་མང་དང་གྲོས་ཚོགས་ལ་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་བཅས། །