༢༠༡༢ ཟླ་ ༡ ཚེས་ ༦ རེས་གཟའ་པ་སངས།
༄༅། །འདི་ག་བོད་ཡིག་ཚན་པའི་གསར་འགོད་པས་གནས་མཆོག་རྡོ་རྗེ་གདན་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡ ཚེས་ ༥ ཉིན་གྱི་ཕྱེད་ཡོལ་ཆུ་ཚོད་ ༡༢ ཐོག་ྋགོང་ས་མཆོག་གིས་གནས་མཆོག་རྡོ་རྗེ་གདན་གྱི་དུས་དབང་ཐང་ཆེན་དུ་སྐལ་ལྡན་གདུལ་བྱ་ཆིག་འབུམ་ལྔ་ཁྲི་བརྒལ་བར་ཉིན་གཉིས་པའི་སྔོན་འགྲོའི་ཆོས་འབྲེལ་སྐྱོང་བཞིན་པའི་སྐབས་དོལ་རྒྱལ་སྐོར་ལ་བཀའ་སློབ་སྩལ་དོན། དགོན་སྡེ་ཁག་གཅིག་ནང་མི་དེ་རིགས་དམན་པ་རེད་ཅེས་དགོན་པ་ནས་ཕྱིར་ཕུད་བྱ་རྒྱུ་དང༌། ཡང་ན། དགོན་པའི་ནང་མ་བཅུག་པ་དེ་འདྲ་ཡོང་གི་འདུག་ཅེས་བརྗོད་ཀྱི་འདུག་པས་ཧ་ཅང་ནོར་འཁྲུལ་རེད། སངས་རྒྱས་བཅོམ་ལྡན་འདས་རྒྱ་གར་ལ་ཕེབས་ནས་དེའི་ཚེ་དེའི་དུས་རིགས་རུས་ཀྱི་དབྱེ་བ་ཆེན་པོ་འབྱེད་རྒྱུ་ཞིག་ཡོད་སྟབས། བཅོམ་ལྡན་འདས་ཀྱིས་དེར་ངོ་རྒོལ་གནང་ཡོད། བཅོམ་ལྡན་འདས་ཀྱིས་ངས་ཁྱེད་ལ་རིགས་རུས་མི་གཙོ་སྒྲུབ་པ་གཙོ་བོ་ཡིན་ཞེས་རིགས་རུས་ཀྱི་དབྱེ་བ་མེད་མི་ཚང་མ་གཅིག་པ་རེད། ཅེས་གསུངས་ཡོད། སྔོན་མ་ངོས་རང་ཕྱི་ལོ་ ༡༩༥༤ ལོར་པེ་ཅིང་དུ་ཡོད་སྐབས་མའོ་ཙེ་ཏུང་གིས་བཅོམ་ལྡན་འདས་གསར་རྗེའི་སྟོན་པ་ཞིག་རེད། དེ་དུས་རྒྱ་གར་ལ་རིགས་རུས་ཀྱི་དབྱེ་བ་འབྱེད་རྒྱུ་ཡོད། བཅོམ་ལྡན་འདས་ཀྱིས་དེར་ངོ་རྒོལ་གནང་སྟེ་སངས་རྒྱས་ཀྱི་ཆོས་དེ་སྤེལ་བ་རེད་ཅེས་བརྗོད་བྱུང༌། སྐབས་ཤིག་མའོ་ཙེ་ཏུང་གིས་སངས་རྒྱས་བཅོམ་ལྡན་འདས་ལ་བསྟོད་བསྔགས་བཏང་བ་དེ་འདྲ་བྱུང་བ་རེད། མཐའ་མ་མའོ་ཙེ་ཏུང་གིས་ངོས་རང་ཐུག་སྐབས་ཆོས་དུག་རེད་ཅེས་བརྗོད་བྱུང༌། གང་ལྟར་རིགས་རུས་དང་རིགས་དམན་གྱི་སྐད་ཆ་ཤོད་རྒྱུ་དེ་འདྲ་ཁ་ཤས་ཡོང་གི་ཡོད་པ་ལྟ་བུ་འདུག
དེ་ལྟར་རྩ་བ་ནས་བྱ་རྒྱུ་མེད། ང་ཚོ་མི་ཚང་མ་འདྲ་མཉམ་རེད་མ་གཏོགས་སངས་རྒྱས་ཀྱི་ཆོས་ནང་རིགས་རུས་ཀྱི་སྐད་ཆ་ཤོད་རྒྱུ་མེད།སྤྱིར་དྲེགས་པར་སྐྱབས་གནས་བརྩི་རྒྱུ་མེད། སྐབས་ཤིག་རྒྱལ་པོ་ཤུགས་ལྡན་ཟེར་རྒྱུའི་རྙོག་གྲ་ཞིག་བྱུང་ཡོད། རྩ་བའི་ཤུགས་ལྡན་གྱི་རྙོག་གྲ་དེ་བྱུང་ནས་ལོ་བཞི་བརྒྱ་མ་ཟིན་ཙམ་ཞིག་ཕྱིན་འདུག
དེའི་རིང་ལ་གླེང་གཞི་ཅན་གྱི་ཐོག་ནས་བསྡད་པ་རེད་མ་གཏོགས་རྩོད་མེད་ཡོངས་གྲགས་ཆགས་མེད།
བར་སྐབས་སྐྱབས་རྗེ་ཕ་བོང་ཁའི་སྐུ་ཚེའི་སྨད་ནས་བཟུང་སྟེ་དོལ་རྒྱལ་དར་སོ་བྱུང་ནས་ལོ་བདུན་ཅུ་ཙམ་གྱི་རིང་ལ་གང་ཙམ་ཞིག་བྱུང་ཡོད། སྐུ་མདུན་སྐུ་གོང་མ་འཚོ་ཞིང་བཞུགས་སྐབས་དམ་བསྒྲགས་གནང་ཡོད།
སྐྱབས་རྗེ་ཕ་བོང་ཁ་དང་ཁྲི་བྱང་རིན་པོ་ཆེ་དངོས་གནས་དྲང་གནས་བསྟན་པའི་བདག་པོ་བསམ་གྱིས་མི་ཁྱབ་པ་རེད། འོན་ཀྱང་དོལ་རྒྱལ་བསྟེན་སྲོལ་གནང་བ་དེ་ནོར་འཁྲུལ་རེད། སྔ་མོ་ངོས་ཀྱིས་ཀྱང་ཕྱི་ལོ་ ༡༩༥༡ དེ་འདྲ་ནས་དོལ་རྒྱལ་བསྟེན་སྲོལ་བྱས་པ་རེད། རྒྱ་གར་དུ་སླེབས་ཏེ་ཕྱི་ལོ་ ༡༩༧༠ ནང་དེ་འདྲ་ནས་ངོས་རང་དོགས་པ་བསྐྱེད་བྱུང༌། སྐབས་དེར་ཡོངས་འཛིན་རྣམ་པ་གཉིས་བཞུགས་ཡོད། ཡོངས་འཛིན་གླིང་རིན་པོ་ཆེར་དྲི་མ་ཙམ་ཡང་མི་འདུག སྐྱབས་རྗེ་ཁྲི་བྱང་རིན་པོ་ཆེས་བསྟེན་གནང་གི་འདུག་ཀྱང་ཁོང་གིས་དྲེགས་པ་རང་ལ་བརྩིས་པ་གནང་བ་མ་གཏོགས་དེ་འཇིག་རྟེན་ལས་འདས་པ་རེད་ཅེས་གསུངས་མི་འདུག དེ་ལྟ་བུའི་ཐོག་ནས་དེ་དུས་ངོས་ཀྱིས་ཀྱང་བསྟེན་པ་རེད། གཞི་ནས་ངོས་རང་དོགས་པ་བསྐྱེད་དེ་བརྟག་དཔྱད་ཞིབ་ཕྲ་བྱེད་སྐབས་ྋརྒྱལ་བ་སྐུ་ཕྲེང་རིམ་བྱོན་གྱི་ཆོས་སྲིད་ཀྱི་མཛད་འཕྲིན་གལ་ཆེ་བ་དེ་ཚོའི་གྲས་དེ་ཟན་བརྟག་སྒྲིལ་ནས་འགྲོ་རྒྱུའི་ཕྱག་སྲོལ་ཞིག་ཡོད། ངོས་ཀྱིས་མཚམས་འཇོག་རྒྱུ་དེ་ཡང་མོ་དང་ཟན་བརྟག་སྒྲིལ་ནས་ཐག་གཅོད་བྱས་པ་ཡིན། རྒྱ་གར་ནང་ཤུགས་ལྡན་ཚོགས་པ་དེ་འདྲ་བཙུགས་ཏེ་ལས་འགུལ་སྤེལ་བ་མ་ཟད། མི་ཡང་གསོད་རྒྱུ་བྱུང་སོང༌། མཚན་ཉིད་སློབ་གྲྭའི་རྒན་བློ་བཟང་རྒྱ་མཚོ་དམ་པ་དེ་དཔེ་ཆ་ཡག་པོ་ཡོད་པ་མ་ཟད། གྲྭ་པ་གྲྭ་རྐྱང་རེད། ཁོང་གིས་དོལ་རྒྱལ་སྐོར་ལ་ཡིག་ཆ་དེ་འདྲ་བྲིས་པའི་རྐྱེན་གྱིས་ཁོང་དང་ཁོང་གི་དགེ་ཕྲུག་གཉིས་ངོས་རང་སྡོད་སའི་འཁྲིས་ལ་དོལ་རྒྱལ་ཚོགས་པའི་མིས་ས་རུབ་མ་རུབ་དེ་འདྲ་ཞིག་ལ་བསད་པ་རེད། རྗེས་སུ་ཉེན་རྟོག་པས་ཞིབ་འཇུག་བྱེད་སྐབས་དགེ་བཤེས་ལགས་ཀྱི་ལུས་ལ་གྲི་བཅུ་དྲུག་བཙུགས་འདུག་ཅེས་བརྗོད་ཀྱི་འདུག དེ་བཞིན་ཡིག་ཆ་མང་པོ་ཐོན་ཡོད་པའི་ནང་ནས་གཅིག་གི་ནང་ྋགོང་ས་ལྔ་པ་ཆེན་པོས་ཁྲི་འདོན་མཛད་ཡོད་ཅེས་འདུག གཞི་ནས་ྋགོང་ས་ལྔ་པ་ཆེན་པོའི་གསུང་བཙལ་བ་རེད། ྋགོང་ས་ལྔ་པའི་གསུང་ཕྱི་ནང་ཚང་མ་ངོས་ལ་ཡོད། དེ་དག་ནང་ྋགོང་ས་ལྔ་པ་ཆེན་པོས་དོལ་རྒྱལ་ཁྲི་འདོན་མཛད་པ་རེད་ཅེས་པ་དེ་འདྲ་རྩ་བ་ནས་རྙེད་རྒྱུ་མི་འདུག ྋགོང་ས་ལྔ་པ་ཆེན་པོས་དུ་ཀཱཱུ་ལའི་གོས་བཟང་གི་ཟུར་དཔང་ནང༌། དམ་མིན་དམ་བརྫུ་གྲགས་པ་རྒྱལ་མཚན་ཞེས། །སྨོན་ལམ་ལོག་པའི་དམ་སྲི་འབྱུང་པོ་འདིས། །བསྟན་དང་འགྲོ་བ་ཀུན་ལ་འཚེ་བྱེད་ན། །མགོན་སྐྱབས་དཔུང་གཉེན་མ་མཛད་ཐལ་བར་རློག ཅེས་ཟུར་དཔང་དེ་འདྲ་ཞིག་མཛད་འདུག
དེའི་རྒྱུ་ཡི་ཁྱད་པར་སྨོན་ལམ་ལོག་པ། ངོ་བོའི་ཁྱད་པར་དམ་སྲི་འབྱུང་པོ། བྱེད་ལས་ཀྱི་ཁྱད་པར་བསྟན་དང་འགྲོ་བར་འཚེ་བ་བྱེད་མཁན་གསུངས་ཡོད། ྋགོང་ས་ལྔ་པ་ཆེན་པོ་མི་ཚོད་ཚོད་ཅིག་མིན།
དངོས་གནས་དྲང་གནས་གཞུང་རབ་འབྱམས་ལ་སྦྱང་པའི་མཁས་པ་ཞིག་ཡིན་པས་ཁོང་གིས་གང་བྱུང་མ་བྱུང་གསུང་གི་མ་རེད། ཁོང་གིས་གསུངས་པ་དེ་གསུང་ཚད་མར་རྩིས་དགོས་པ་ཞིག་རེད། ྋགོང་ས་ལྔ་པ་ཆེན་པོ་དང་རྟོགས་པ་མཉམ་པའི་མི་ཞིག་གིས་བསྒྱུར་བཅོས་གཏང་ན་ཡོང་སྲིད་པ་རེད། ྋགོང་ས་ལྔ་པ་ཆེན་པོ་མཆོག་དང་རྟོགས་པ་མཉམ་པ་མེད་མཁན་ཞིག་གིས་ཁོང་གི་གསུང་ཡལ་བར་དོར་ཤེས་ཀྱི་མ་རེད། དེར་བརྟེན་དོལ་རྒྱལ་བསྟེན་ན། རྒྱལ་པོ་སྐུ་ལྔ་དང་དཔལ་ལྡན་དམར་ཟོར་མ། དེ་བཞིན་མགོན་པོ་ཕྱག་དྲུག དམ་ཆེན་ཆོས་རྒྱལ་བཅས་ལ་འཁོན་གྱི་ཡོད་པའི་གནས་ཚུལ་གསལ་པོ་བྱུང་སྟབས། དོལ་རྒྱལ་བསྟེན་ན་འགྲིག་གི་མི་འདུག་ཅེས་འབོད་སྐུལ་བྱ་རྒྱུ་དེ་ངོས་ལ་ལས་འགན་ཡོད། དེ་ལྟར་བྱས་ནས་བསྟེན་དང་མི་བསྟེན་སོ་སོ་རང་ཉིད་ལ་ཐུག་ཡོད་པས་ངོས་ཀྱིས་དབང་ཡོད་ཤོད་ཀྱི་མེད། སྐྱབས་རྗེ་ཕ་བོང་ཁ་རིན་པོ་ཆེར་སྐུ་མདུན་སྐུ་གོང་མས་སྐུ་ཚེའི་སྟོད་ལ་གཟིགས་པ་ཆེན་པོ་ཡོད་ཀྱང་ཁོང་གིས་དོལ་རྒྱལ་ཤུགས་ཆེ་བསྟེན་པའི་དབང་གིས་སྐུ་ཚེའི་སྨད་ལ་སྐུ་མདུན་སྐུ་གོང་མར་གཟིགས་དོགས་བྱུང་བ་སྐྱབས་རྗེ་ཕ་བོང་ཁའི་རྣམ་ཐར་བོད་ནས་ཤིང་པར་བརྐོས་ཡོད་པའི་ནང་ཧ་ཅང་གསལ་པོ་འདུག དེ་བཞིན་དགེ་ལུགས་བླ་མའི་ནང་ལ་ཆ་བཞག་ན། ཕུར་ལྕོག་ངག་དབང་བྱམས་པའི་གསུང་གདན་ས་གསུམ་གྱི་དཀར་ཆག་གཅིག་ནང་དགའ་ལྡན་སྐོར་ལ་སྔར་དགོན་པ་དེའི་ནང་རྗེ་ཡབ་སྲས་ཚོས་དྲེགས་པ་བསྟེན་སྲོལ་གནང་རྒྱུའི་ལུགས་སྲོལ་མེད། ཕྱིས་སུ་ལུས་ལ་ཆོས་གོས་རྣམ་གསུམ་གྱོན་ཏེ་གློ་སྙིང་བྲང་གསུམ་འཇིག་རྟེན་པའི་ལྷ་ལ་བསྟེན་མཁན་དེ་འདྲ་ཡོང་གི་འདུག་ཅེས་གསུངས་འདུག དེ་བཞིན་ྋགོང་ས་སྐུ་ཕྲེང་བདུན་པའི་ཡོངས་འཛིན་ཁྲི་ཆེན་ངག་དབང་མཆོག་ལྡན་གྱི་རྣམ་ཐར་ནང་ཁོང་རང་དགའ་ལྡན་ཁྲི་པར་ཕེབས་སྐབས་དགའ་ལྡན་ནང་འཇིག་རྟེན་པའི་དྲེགས་པ་བསྟེན་མཁན་འདུག ཅེས་གསུངས་ཡོད་པས་དྲེགས་པ་དེ་སུ་ཡིན་མིན་ཧ་ཅང་གསལ་པོ་རེད། དེ་བསྟེན་སྲོལ་བྱས་མི་ཆོག་བཟོས་པ་མ་ཟད། ལྷ་རྡོ་རྟེན་དཀར་ཡོད་པ་དེ་ཡང་ས་ས་ཐོག་དང་རྡོ་རྡོ་ཐོག་ཏུ་བསྐྱལ་ནས་གཙང་མ་བཟོས་པ་ཡིན་ཞེས་ཁྲི་ཆེན་ངག་དབང་མཆོག་ལྡན་གྱི་རྣམ་ཐར་ནང་འདུག ཁྲི་ཆེན་ངག་དབང་མཆོག་ལྡན་གྱིས་དེ་འདྲ་གནང་བ་རེད་ཅེས་ལྕང་སྐྱ་རོལ་པའི་རྡོ་རྗེའི་རྣམ་ཐར་ཐུའུ་ཀྭན་ཆོས་ཀྱི་ཉི་མས་མཛད་པའི་ལྷ་ས་དཔར་བརྐོས་དང་སྐུ་འབུམ་བཀྲིས་དཔར་བརྐོས་གཉིས་ཀའི་ནང་རྒྱལ་པོ་དོལ་རྒྱལ་དྲེགས་པར་ངོས འཛིན་གནང་འདུག དེར་བརྟེན་དགེ་ལུགས་པའི་བླ་མ་བསྟན་པའི་གཙུག་རྒྱན་མཁས་གྲུབ་གཉིས་ལྡན་གྱི་སྐྱེས་བུ་དམ་པ་དེ་དག་གིས་མུ་མཐུད་དམ་བསྒྲགས་མཛད་ཡོད། དུས་ཕྱིས་སུ་སྒོ་མང་ཁང་བཟང་རྡོ་རྗེ་འཆང་བླ་མ་བསམ་གྱིས་མི་ཁྱབ་པ་རེད། དེའི་ཚེ་དེའི་དུས་སྐྱབས་རྗེ་ཕ་བོང་ཁ་དང་ཁང་བཟང་རྡོ་རྗེ་འཆང་དབུས་ཁུལ་དུ་བླ་མ་གཙོ་བོ་ལྟ་བུ་ཆགས་ཡོད། ཁང་བཟང་རིན་པོ་ཆེས་དོལ་རྒྱལ་བསྟེན་སྲོལ་བྱ་རྒྱུ་དར་སོ་གང་ཙམ་ཆགས་ཡོང་གི་འདུག་པས་ཕྲན་བུ་རྟེན་འབྲེལ་འཕྱུག་རྒྱུའི་ཉེན་ཁ་འདུག་ཅེས་ཁང་བཟང་རྡོ་རྗེ་འཆང་གིས་ཐུགས་ཉེ་པོ་གནང་མཁན་གྱི་དྲུང་གཉེར་ཆེན་མོ་བ་ཞིག་ལ་བཀའ་གནང་བ་རེད་ཅེས་འགོ་སྟོད་ངོས་ཀྱིས་གོ་བྱུང༌། ངོས་ཀྱིས་ཁྲི་བྱང་རིན་པོ་ཆེར་བརྟག་དཔྱད་དེ་ལྟར་བྱས་པ་ཡིན། དེ་འདྲ་ཞིག་བབ་སོང་ཞེས་ཞུས་པས་ཁྲི་བྱང་རིན་པོ་ཆེས་བརྟག་དཔྱད་བྱས་པ་དེ་དག་བབ་རླིང་བརྟན་གསུམ་ཧ་ཅང་ཡག་པོ་བྱུང་འདུག་པས་བསླུ་བ་རྩ་བ་ནས་མེད་པ་རེད་ཅེས་ངོས་ལ་གསུངས་བ་ཞིག་རེད་མ་གཏོགས་སྐྱབས་རྗེ་རིན་པོ་ཆེ་དགོངས་པ་མྱ་ངན་ལས་འདས་ནས་ངོས་ཀྱིས་གོ་སྐབས་བཙལ་ཏེ་འགྱུར་བ་བཏང་བ་རྩ་བ་ནས་མིན། ཡོངས་འཛིན་རྣམ་པ་གཉིས་དགོངས་པ་མྱ་ངན་ལས་འདས་རྗེས་ངོས་ཀྱིས་རྙིང་མ་ངོ་བསུ་ཆེད་རྒྱལ་པོ་ཤུགས་ལྡན་ལ་དམ་བསྒྲགས་བྱས་པ་རེད་ཅེས་ཡིག་ཆ་ཁ་ཤས་ནང་བཀོད་འདུག་པས་དེ་འདྲ་རྩ་ནས་མ་རེད།རྒྱལ་པོ་དོལ་རྒྱལ་བསྟེན་དང་མི་བསྟེན་སོ་སོ་རང་དབང་རེད། བསྟེན་ན་ངོས་ཀྱི་རྩ་ནས་བཀའ་ཆོས་དང་སྡོམ་པ་ཞུ་ན་འགྲིག་གི་མེད། དམ་ཚིག་ཉམས་ཀྱི་རེད། དམ་ཚིག་ཉམས་ན་ཁྱེད་རང་ཚོར་ཕན་གྱི་མ་རེད་ལ་ངོས་རང་ལ་ཡང་གནོད་ཀྱི་རེད། སྤྱི་ཡོངས་ཀྱི་རྒྱ་གར་ནང་གདན་ས་གསུམ་གྱི་མཚོན་རྒྱུད་སྟོད་སྨད་སོགས་ནས་ངོས་ཀྱིས་བརྟག་དཔྱད་རིམ་པ་བྱས་པར་རྒྱུ་མཚན་མཐོང་ནས་དེར་ཤར་བསྐྱོད་བྱེད་མཁན་ཆགས་ཡོད། ཉུང་ཤས་ཤིག་གིས་ཤེས་བཞིན་དུ་ཁྱད་གསོད་དང་གནས་ལུགས་ཚུད་རྩིས་དྲིན་ལན་ལོག་འཇལ་བྱེད་མཁན་དེ་འདྲ་ཡོང་གི་འདུག ལྷག་པར་བོད་ནང་སྤྱི་ཡོངས་ཀྱི་གནས་ཚུལ་ཤེས་མཁན་ལྷ་ས་དང་ཁམས་རྒྱལ་བརྒྱུད་དེ་འདྲ་ནས་གནས་ཚུལ་ཆ་ཚང་ཤེས་ཏེ་རང་ཚུགས་བརྟན་པོ་ཡོད་པ་དེ་འདྲ་འདུག མདོ་སྨད་ལྷ་མོ་གསེར་ཁྲི་དང་ཆབ་མདོ་དགོན་པས་དོལ་རྒྱལ་ཤུགས་ཆེན་པོ་བསྟེན་གྱི་ཡོད་ས་རེད། དེ་བཞིན་བྲག་གཡབ་དང་སྨར་ཁམས་ཀྱི་དགོན་པ་དེ་འདྲ་དང༌།
ཕྱོགས་མཚུངས་ལྡན་མའི་ས་ཁུལ་དེ་འདྲ་ལ་རིགས་ཁ་ཤས་ནས་གནས་ཚུལ་མི་ཤེས་པར་འཁྱོག་བཤད་བྱས་ཏེ་ྋརྒྱལ་བ་རིན་པོ་ཆེས་ཤུགས་ལྡན་བཀག་འགོག་བྱ་རྒྱུ་དེ་དྲང་དོན་མ་རེད་ངེས་དོན་རེད། ྋརྒྱལ་བ་རིན་པོ་ཆེས་ཤུགས་བསྟན་མུ་མཐུད་ནས་བསྟེན་གྱི་ཡོད་པ་རེད་ཅེས་དང༌། ཡང་རིགས་ཁ་ཤས་ཀྱིས་ྋརྒྱལ་བ་རིན་པོ་ཆེས་རྙིང་མར་ངོ་བསུས་ཏེ་བྱས་པ་མ་གཏོགས་ྋརྒྱལ་བ་རིན་ཆེའི་བསམ་བློ་མ་རེད། ཡང་ཁ་ཤས་ཀྱིས་ྋརྒྱལ་བ་རིན་པོ་ཆེ་རྙིང་མ་ཆགས་ཟིན་པས་དགེ་ལུགས་མ་རེད་ཅེས་བརྗོད་མཁན་དེ་འདྲ་ཡོད་ས་རེད། ངོས་ཀྱིས་ཤུགས་ལྡན་མཚམས་འཇོག་བྱེད་སྐབས་དགེ་ལུགས་མ་རེད་ཤོད་མཁན་བྱུང་འདུག རི་བོ་དགེ་ལུགས་པར་འཇམ་མགོན་བླ་མ་ཙོང་ཁ་པ་ཆེན་མོའི་གསེར་བཅད་བརྡར་གསུམ་གྱི་ལེགས་བཤད་རྨད་དུ་བྱུང་བ་ཡོད། དེ་དག་ཐོས་བསམ་སློབ་གཉེར་དང་སྒོམ་སྒྲུབ་ཉམས་ལེན་བྱེད་མཁན་དེ་དགེ་ལུགས་པ་རེད། དགེ་ལུགས་པའི་བསྟན་པ་ཞེས་བརྗོད་སྐབས་འདྲེ་ཞིག་གསོལ་དགོས་བྱུང་བ་ཞིག་ལ་རྩིས་དགོས་བྱུང་ན་ངོ་ཚ་དགོས་པ་ཡིན། དཔལ་ནཱ་ལེཎྜར་ཁྱད་ཆོས་ཤོད་སྐབས་མགོན་པོ་བྱ་རོག་ཡར་བཀྱགས་ནས་ནཱ་ལེནྡྲ་རྩ་ཆེན་པོ་རེད་ཅེས་སུ་གཅིག་གིས་བརྗོད་མཁན་མེད། ཀླུ་སྒྲུབ་ཡབ་སྲས་སོགས་ཀྱི་ཕུལ་དུ་བྱུང་བའི་ལེགས་བཤད་དཔྱད་གསུམ་རྣམ་པར་དག་པའི་དཔེ་ཆ་དེ་དག་བསམ་བློ་བཏང་ནས་དཔལ་ནཱ་ལེཎྜ་ཁ་བཀྱགས་བཀྱགས་བྱ་རྒྱུ་ཆགས་པ་རེད་མ་གཏོགས་ནཱ་ལེནྡྲ་སྲུང་མ་སོགས་ཡོད་པ་རེད་ཅེས་སུས་ཆ་འཇོག་བྱེད་ཀྱི་འདུག དགེ་ལུགས་པའི་ཁྱད་ཆོས་འདྲེ་གཅིག དེ་ཡང་རྩོད་པ་དང་གླེང་གཞི་ཅན། ྋགོང་ས་ལྔ་པ་ཆེན་པོ་ནས་བཟུང་དམ་བསྒྲགས་གནང་ཡོད་པའི་དགེ་ལུགས་པའི་ཁྱད་ཆོས་ལ་རྩིས་དགོས་བྱུང་ན་ངོ་ཚ་དགོས་པ་ཞིག་རེད། དེར་བརྟེན་ངོས་ཀྱིས་དེ་རིང་ཁྱེད་རང་ཚོར་མ་གོ་མ་ཐོས་མེད་པར་བཤད་ཡོད། གང་ལྟར་མདོ་དོན་ཡང་ན་ྋརྒྱལ་བ་སྐུ་ཕྲེང་བཅུ་བཞི་པ་ངོས་རང་གདམ་རྒྱུ་རེད། ཡང་ན་འཇིག་རྟེན་པའི་དྲེགས་པ་གདམ་རྒྱུ་རེད་ཤེས་སོང་ངམ།
དེ་རིང་ཁ་སང་རྒྱ་རིགས་ནང་ལ་ཡང་ལས་འགུལ་གང་ཙམ་སྤེལ་གྱི་ཡོད་པ་ལྟ་བུ་འདུག ཐེ་ཝན་དང་རྒྱ་ནག་སྐམ་ས་ཆེན་མོ། སིངྒ་པུ་ནང་ཡོད་པ་ལྟ་བུ་འདུག དེ་བཞིན་ཨ་རི་དང་དབྱིན་ཡུལ། ཡུ་རོབ་ཀྱི་ལུང་པ་ཁ་ཤས་ནང་དེ་འདྲ་ཡོད་པ་ལྟ་བུ་འདུག ཁྱེད་རང་ཚང་མས་བསྟེན་དང་མི་བསྟེན་སོ་སོ་རང་དབང་རེད། བསྟེན་ན་ངོས་ཀྱི་རྩ་ལ་མ་ཡོང་རོགས། ཚེ་འདི་ལ་ཡིན་རུང་ངོས་དང་འབྲེལ་བ་གཙང་མ་གཅོད་རྒྱུ་རེད། ཚེ་ཕྱི་མ་ཡིན་རུང་སྐྱབས་འཇུག་ཞུ་ས་དོལ་རྒྱལ་ལ་ཞུས་ནས་ངོས་ལ་བརྗོད་མ་ཡོང་ཨང་ཤེས་སོང་ངམ། ཞེས་ཞལ་ཤོབ་མཛད། དེ་བཞིན་ངོས་ལ་བོད་ནས་དེ་ྋརྒྱལ་བ་རིན་པོ་ཆེས་བཀའ་གནང་བ་མ་རེད། གཤམ་འོག་ནས་བཟོས་པ་རེད་ཅེས་བརྗོད་མཁན་བྱུང༌། ྋརྒྱལ་བ་རིན་པོ་ཆེ་ངོ་མའི་བཀའ་གནང་བ་ཡིན་ན། བསམ་བློ་གཏོང་གི་ཡིན་ཞེས་རིགས་གཅིག་དེ་འདྲ་ཤོད་ཀྱི་འདུག དེ་རིང་འདིར་བོད་ནས་གསར་དུ་མི་སྟོང་ཕྲག་ཁ་ཤས་ཡོད་པས་ཁྱེད་རང་ཚོར་གནས་ཚུལ་ཇི་མ་ཇི་བཞིན་གང་ཡིན་པ་དེ་ངོས་ཀྱིས་གསལ་བཤད་བྱས་ཡོད་པས་ཁྱེད་རང་ཚོས་སེམས་ལ་ངེས་པ་བྱེད་དགོས། དེ་བཞིན་གར་ཞྭ་དང་ཁུ་ནུ། ལ་དྭགས་ཁྱེད་རང་ཚོས་ཤེས་པ་བྱེད་དགོས། ཕྱོགས་མཚུངས་རྒྱ་རིགས་གྲོགས་པོ་ཚོས་གནས་ཚུལ་དེ་ཤེས་པ་བྱེད་དགོས། ཞེས་བཀའ་སློབ་སྩལ་ཡོད་པ་བཅས།།
