༢༠༡༢ ཟླ་ ༡ ཚེས་ ༤ རེས་གཟའ་ལྷག་པ།
༄༅། །འདི་ག་བོད་ཡིག་ཚན་པའི་གསར་འགོད་པས་གནས་མཆོག་རྡོ་རྗེ་གདན་ནས་བཏང་གནས་ནང་འཁོད་དོན། རྒྱལ་ཀུན་སྙིང་རྗེའི་རང་གཟུགས་འཕགས་མཆོག་འཇིག་རྟེན་དབང་ཕྱུག་སྡོམ་བརྩོན་ངུར་སྨྲིག་འཁོར་སྒྱུར་གྱི་རྣམ་པར་བྱོན་པ། ས་སྟེང་ྋརྒྱལ་བསྟན་ཡོངས་རྫོགས་ཀྱི་མངའ་བདག འཛམ་གླིང་ཞི་བདེའི་དེད་དཔོན་ཆེན་པོ། བོད་མིའི་དབུ་ཁྲིད་སྤྱི་ནོར་ྋགོང་ས་ལྷ་མིའི་རྣམ་འདྲེན་ྋརྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་དོན་གྱི་སླད་དུ་མཚན་ནས་སྨྲོས་ནས་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་དཔལ་སྡེ་བཟང་པོ་མཆོག་ལ་དུས་དབང་གི་སྦྱིན་བདག་གཙོ་གྱུར་ཨ་རུ་ན་ཅལ་མངའ་སྡེའི་ཡུལ་སྐོར་སྤྲོ་འཆམ་གྱི་བློན་ཆེན་པདྨ་མཁའ་འགྲོ་མཆོག་གིས་གཙོས་སྦྱིན་བདག་ཉི་ཤུ་རྩ་བཞིས་ཇི་ལྟར་སྔོན་ནས་གསོལ་བ་ཕུར་ཚུགས་སུ་བཏབ་དོན་ལྟར་བཀའ་བཞེས་བཟང་པོ་ཐོབ་སྟེ་གནས་མཆོག་རྡོ་རྗེ་གདན་དུ་ྋཞབས་སོར་འཁོད་དེ་སྔོན་འགྲོའི་ཆོས་འབྲེལ་དབུ་འཛུགས་བསྐྱངས་ཡོད།
དེ་ཡང་ཕྱི་ལོ་ ༢༠༡༢ ཟླ་ ༡ ཚེས་ ༤ ཉིན་གྱི་སྔ་དྲོ་མགོན་པོ་གང་ཉིད་མཆོག་གཟིམ་ཆུང་ནས་དུས་དབང་སྦྱིན་བདག་རྣམ་པའི་སྐུ་ཚབ་དང་བཀའ་ཁྲི་མཆོག་སོགས་ཀྱིས་སྤོས་སྣེས་སྔོན་བསུས་ཏེ་གདན་ཞུས་ཀྱིས་གསུང་ཆོས་ར་བའི་བཞུགས་ཁྲི་རིན་པོ་ཆེར་ྋཞབས་སོར་འཁོད་དེ་ཆུ་ཚོད་ ༡༢ ཐོག་ྋགོང་ས་མཆོག་གིས་འདིར་འདུས་སྐལ་ལྡན་གདུལ་བྱ་ཆིག་འབུམ་ལྔ་ཁྲི་བརྒལ་བར་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་དང༌། རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ། དགེ་བཤེས་གླང་ཐང་པ་རྡོ་རྗེ་སེངྒེས་མཛད་པའི་བློ་སྦྱོང་ཚིག་བརྒྱད་མ། དཔལ་མགོན་ཀླུ་སྒྲུབ་ཀྱིས་མཛད་པའི་འཇིག་རྟེན་ལས་འདས་པའི་སྟོད་པ་བཅས་སྔོན་འགྲོའི་གསུང་ཆོས་མ་སྩལ་གོང་ལེགས་སྦྱར་སྐད་སོགས་ནང་ཤེས་རབ་སྙིང་པོ་གསུང་འདོན་གནང་ཡོད། དེ་ནས་ྋགོང་ས་མཆོག་གིས་ཆོས་འབྲེལ་གྱི་བཀའ་སློབ་ཕེབས་དོན། ངོས་ཀྱིས་ནམ་རྒྱུན་ཆོས་འབྲེལ་བྱེད་སྐབས་ནང་ཆོས་ངོ་སྤྲོད་བྱེད་ཀྱི་ཡོད། འཛམ་གླིང་འདིའི་ཐོག་ཆོས་ལུགས་མང་དག་ཅིག་ཡོད་པ་དེ་དག་གི་ཁྱད་པར་གཙོ་བོ་ག་རེ་ཡོད་མེད་དེ་ཤེས་དགོས་པ་ཞིག་ཡིན། དེ་ཡང་སངས་རྒྱས་བཅོམ་ལྡན་འདས་ཀྱི་ལངྒར་བཤེགས་པའི་མདོ་ལས་ལྷ་ཡི་སྐད་དང་ཚང་པའི་སྐད་ཅེས་སོགས་ཐེག་པ་མང་པོ་གསུངས་ཡོད། སེམས་ཅན་ལ་རྣམ་རྟོག་འདྲ་མིན་ཡོད་སྟབས། ཚང་པའི་ཐེག་པ་སོགས་ཐེག་པ་རིམ་པ་མང་དག་ཅིག་གསུངས་ཡོད། སངས་རྒྱས་ཀྱི་ཆོས་ཀྱི་ཐོག་ནས་འགྲེལ་བཤད་བརྒྱབ་ན། འཛམ་གླིང་འདིའི་ཐོག་ཚེ་འདི་ལ་ཡ་རབས་དང་བྱམས་བརྩེ་་བྱེད་དགོས་རྒྱུ་ཆོས་ལུགས་ཚང་མས་གསུང་གི་ཡོད། མི་ཚེ་འདི་བཟང་པོ་ཞིག་གི་ཐོག་ནས་བསྐྱལ་ཐབས་བྱེད་དགོས། དེ་བཞིན་ཆོས་ལུགས་མཐུན་སྒྲིལ་བྱེད་དགོས། ཆོས་པའི་མིང་ཡོད་པ་ཉུང་ཤས་ཤིག་གིས་རྙོག་གྲ་བསླངས་བར་བརྟེན་ནས་ཆོས་ལུགས་དེ་ཡག་པོ་མ་རེད་ཅེ་ན་ནོར་འཁྲུལ་ཡིན། ཆོས་ལུགས་ཚང་མའི་ནང་རྙོག་གྲ་སློང་མཁན་ཡོད། སེམས་ཅན་ཚང་མར་ཁམས་དང་མོས་པ་སྣ་ཚོགས་ཤིག་ཡོད་སྟབས། འཛམ་གླིང་འདིའི་སྟེང་ཆོས་ལུགས་ཀྱང་འདྲ་མིན་དགོས་ཀྱི་ཡོད། ཆོས་ལུགས་ཀྱི་ལྟ་གྲུབ་མི་འདྲ་བ་ཡོད་པའི་དགོས་དོན་གཙོ་བོ་དེ་མི་ལ་ཕན་པ་བསྒྲུབ་རྒྱུ་དང་བྱམས་བརྩེ་ཉམས་ལེན་བྱ་རྒྱུའི་དམིགས་ཡུལ་གཅིག་པ་ཞིག་གིས་བསྒྲུབ་བྱེད་འཇིག་རྟེན་བཀོད་པ་སོགས་ཀྱི་ཐོག་ནས་སྐད་ཆ་ཤོད་རྒྱུ་དེ་དག་ཁམས་དང་མོས་པ་སྣ་ཚོགས་ཤིག་ཡོད་སྟབས། སངས་རྒྱས་བཅོམ་ལྡན་རང་ཉིད་ཀྱིས་ཀྱང་གདུལ་བྱ་ཁམས་དང་མོས་པར་འཚམས་པ་གསུངས་ཡོད། འཛམ་གླིང་འདིའི་ཐོག་མི་དུང་ཕྱུར་བདུན་ཅུ་ཙམ་ཡོད་པ་དེ་དག་ལ་ཁམས་སྣ་ཚོགས་ཡོད་པ་དེ་དག་རང་རང་གི་ཁམས་དང་མོས་པར་མཐུན་པའི་ལྟ་གྲུབ་ཅིག་ཡོད་ན་ཡག་གི་རེད། དེར་བརྟེན་འཛམ་གླིང་འདིའི་ཐོག་གི་ཆོས་ལུགས་ཚང་མ་ཆོས་གྲོགས་ཀྱི་འདུ་ཤེས་བཞག་སྟེ་འཆམ་མཐུན་བྱ་རྒྱུ་ཧ་ཅང་གལ་ཆེན་པོ་ཡིན། ཆོས་བརྒྱུད་ཚང་མ་ལྟ་གྲུབ་ཐོག་ནས་མི་འདྲ་ཡོད་ཀྱང་ཚང་མས་མི་བཟང་པོ་བྱེད་དགོས་པའི་བསླབ་བྱ་བཟང་པོ་གཅིག་མཚུངས་ཡོད། རྒྱ་གར་གྱི་དེ་སྔའི་སྲིད་བློན་གཞོན་པ་་ཨ་ཌེ་ཝི་ནི་མཆོག་གིས་ངོས་ལ་རྒྱ་གར་ལ་གནའ་རབས་ནས་ཡོད་པའི་ལྟ་བ་མི་འདྲ་བ་རྣམས་ཕན་ཚུན་རྩོད་པ་རྩོད་ཀྱི་རེད། འོན་ཀྱང་ལྟ་གྲུབ་མི་འདྲ་བ་དེ་དག་ཕན་ཚུན་གུས་ཞབས་བྱེད་ཀྱི་ཡོད། རྒྱ་གར་ལ་མང་གཙོ་ཡག་པོ་ཡོང་བའི་རྒྱུ་མཚན་གཙོ་བོ་དེ་རེད། ཅེས་གསུངས་བྱུང༌། སྐྱེ་བ་སྔ་ཕྱི་ཁས་མི་ལེན་མཁན་ཞིག་ཀྱང་འགྲོ་བ་མི་ཡིན་པར་བརྟེན་གུས་ཞབས་བྱེད་དགོས། ཞེས་བཀའ་སློབ་སྩལ་ཏེ་སྒོམ་རིམ་བར་པའི་བཀའ་ཆོས་དབུ་འཛུགས་མཛད་ཡོད། ད་ཐེངས་བཀའ་ཆོས་རྣམས་སྐད་ཡིག་བཅུ་དྲུག་ནང་གསུང་སྒྱུར་ཞུ་བཞིན་ཡོད། དེ་བཞིན་ཨ་རིའི་གློག་བརྙན་འཁྲབ་སྟོན་པ་རི་ཆ་ཌི་གྷེར་ཡང་ཆེད་བཅར་ཞུས་ཡོད། གཞན་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣ པའི་ཐོག་ྋགོང་ས་ྋསྐྱབས་མགོན་ཆེན་པོ་མཆོག་དབུ་བཞུགས་ཐོག་བོད་མིའི་སྒྲིག་འཛུགས་ཆོས་རིག་ལས་ཁུངས་དང་དུས་དབང་གོ་སྒྲིག་ཚོགས་ཆུང་ཐུང་མོང་ནས་གོ་སྒྲིག་ཞུས་པའི་མཆོད་འབུལ་དེ་བཞིན་དུས་དབང་ཐང་ཆེན་དུ་ཚོགས་ཡོད།
དེ་ཡང་མཆོད་འབུལ་དབུ་འཛུགས་མ་ཞུས་གོང་བཀའ་ཁྲི་མཆོག་གིས་གསུང་བཤད་གནང་རྗེས་མཆོད་འབུལ་ཚོགས་ཡོད་པ་བཅས།།