༢༠༡༢ ཟླ་ ༡ ཚེས་ ༢ རེས་གཟའ་ཟླ་བ།
༄༅། །འདི་ག་བོད་ཡིག་ཚན་པའི་གསར་འགོད་པས་གནས་མཆོག་རྡོ་རྗེ་གདན་ནས་བཏང་གནས་ནང་འཁོད་དོན། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་དཔལ་དུས་ཀྱི་འཁོར་ལོའི་དབང་ཆེན་གྱི་སྦྱིན་བདག་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་དམ་པ་རྡོ་རྗེ་མཁའ་འགྲོ་མཆོག་གི་ནང་མིས་གཙོས་སྦྱིན་བདག་ཉི་ཤུ་རྩ་བཞིས་ཇི་ལྟར་སྔོན་ནས་གསོལ་བ་ཕུར་ཚུགས་སུ་བཏབ་དོན་ལྟར་བཀའ་བཞེས་བཟང་པོ་སྨིན་སྕལ་ཐོབ་སྟེ་ཕྱི་ལོ་ ༢༠༡༡ ཟླ་ ༡༢ ཚེས་ ༣༡ ཉིན་མགོན་པོ་གང་ཉིད་མཆོག་ལྡི་ལི་ནས་མཁའ་ལམ་བརྒྱུད་སྔ་དྲོ་ཆུ་ཚོད་ ༡༡ ཐོག་གྷ་ཡ་གནམ་ཐང་དུ་ྋཞབས་སོར་འཁོད་སྐབས་ཨ་རུ་ན་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་མཆོག་གིས་དབུས་སྦྱིན་བདག་རྣམ་པའི་འཐུས་ཚབ་དང༌། བདེ་སྲུང་བཀའ་བློན་མཆོག ཆོས་རིག་བཀའ་བློན་མཆོག་སོགས་ཀྱིས་ཕེབས་བསུ་གཟབ་རྒྱས་ཞུས། གནམ་ཐང་ནས་ས་གནས་ཉེན་རྟོག་པ་སོགས་ཆེས་མཐོའི་སྐུའི་སྲུང་སྐྱོབ་ཞུས་ཐོག་ཕེབས་འགྲོ་བརྒྱུད་གནས་མཆོག་རྡོ་རྗེ་གདན་གྱི་མཆོད་རྟེན་དུ་ཆིབས་སྒྱུར་བསྐྱངས་སྐབས་ཕེབས་ལམ་གཡས་གཡོན་དུ་དད་ལྡན་སེར་སྐྱ་མང་ཚོགས་ཀྱིས་ལག་ཏུ་དཀར་གཙང་མཇལ་དར་དང་མཆོད་རྫས་སྣ་ཚོགས་ཐོགས་ཏེ་རུ་སྟར་བསྒྲིགས་ནས་སྤྲོ་སེམས་རབ་ཏུ་འཁོལ་བ་དང་འབྲེལ་སྐུའི་བྱམས་བརྩེའི་མཐོང་གྲོལ་གྱི་དཀྱིལ་འཁོར་མཇལ་ཁ་ཞུས་པ་དང་ལྷན་ཕེབས་བསུ་གཟབ་རྒྱས་ཞུས་ཡོད།
དེ་ནས་མགོན་པོ་གང་ཉིད་མཆོག་གིས་མཆོད་རྟེན་ལ་གནས་གཟིགས་མཛད་གྲུབ་མཚམས་མཆོད་རྟེན་གྱི་སྒོ་འགྲམ་དུ་གསར་འགོད་པའི་དྲི་བར་བཀའ་ལན་སྩལ་དོན།
དགའ་ལྡན་ཁྲི་རིན་པོ་ཆེ་མཆོག་གིས་ཕེབས་བསུ་ཞུ་བཞིན་པ།
འཛམ་གླིང་ནང་མི་གྲངས་ཐེར་འབུམ་བདུན་ཡོད་པའི་ཁྲོད་ངོས་རང་འགྲོ་བ་མི་གཅིག་ཡིན། མི་ཚང་མས་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་མ་ཟད། བདེ་བ་དོན་དུ་གཉེར་རྒྱུ་དང་སྡུག་བསྔལ་ལས་གྲོལ་རྒྱུའི་ཐོབ་ཐང་ཆ་ཚང་ཡོད། ངོས་རང་ནང་པའི་དགེ་སློང་ཞིག་ཡིན་པའི་ཆ་ནས་སེམས་ཅན་ཐམས་ཅད་བདེ་བ་དང་ལྡན་པ་གྱུར་གཅིག་བཅས་རྟག་ཏུ་སྨོན་ལམ་རྒྱག་གི་ཡོད། འོན་ཀྱང་སྨོན་ལམ་རྒྱག་པ་གཅིག་པོས་འཛམ་གླིང་བདེ་སྐྱིད་ལྡན་པ་ཞིག་སྐྲུན་ཐབས་མེད། དེ་ལྟར་ཡོང་བར་འབད་བརྩོན་བྱེད་དགོས། དམིགས་བསལ་རྒྱ་གར་བ་ཁྱེད་ཚོས་འབད་བརྩོན་གནང་དགོས། གང་ཡིན་བརྗོད་ན་རྒྱ་གར་ནང་ལོ་ངོ་སྟོང་ཕྲག་རིང་ནས་འཚེ་བ་མེད་པ་དང། ཆོས་ལུགས་མཐུན་སྒྲིལ་གྱི་སྲོལ་རྒྱུན་བཟང་པོ་དེ་འདྲ་ཞིག་ཡོད་པ་འདི་འཛམ་གླིང་སྟེང་ཐུན་མིན་ཞིག་ཆགས་ཡོད། འདི་ག་གནས་མཆོག་རྡོ་རྗེ་གདན་ནས་འཛམ་གླིང་ཡུལ་གྲུ་གང་སར་ནང་ཆོས་དར་འཕེལ་ཕྱིན་ཡོད། ཞི་བདེ་ལྡན་པའི་འཛམ་གླིང་བརྗོད་སྐབས་རྙོག་གྲ་རྩ་བ་ནས་མེད་པའི་གོ་དོན་མིན། རྙོག་གྲ་རྩ་བ་ནས་མེད་པ་ཞིག་ཡོང་མི་སྲིད། འོན་ཀྱང་རྙོག་གྲ་དེ་དག་སེལ་རྒྱུའི་ཐབས་ལམ་དེ་བཞིན་འཚེ་བ་མེད་པ་དང་ཆོས་ལུགས་ཕན་ཚུན་འཆམ་མཐུན། ཕན་ཚུན་བསམ་ཤེས་བྱེད་ཐོག་རྙོག་གྲ་སེལ་དགོས་པའི་དུས་ལ་བབ་ཡོད། གནས་ཚུལ་འདི་གཅིག་རེད། དེ་ནས་འཛམ་གླིང་ནང་མི་གྲངས་ཐེར་འབུམ་བདུན་ཡོད་པའི་ཁྲོད་ཐེར་འབུམ་གཅིག་ཙམ་ནང་པའམ་ཡང་ན་ནང་ཆོས་ལ་དོ་སྣང་ཡོད་མཁན་ཆགས་ཡོད། ངོས་རང་དེའི་ནང་ནས་གཅིག་ཆགས་ཡོད། འཇིག་རྟེན་པ་དཀྱུས་མ་ཞིག་གི་ངོས་ནས་བརྗོད་ན་སྟོན་པ་བཅོམ་ལྡན་འདས་ལྟ་གྲུབ་དང་རིག་པ་སྨྲ་བ་ཞིག་ཆགས་ཡོད་པ་མ་ཟད། གནའ་དུས་ཀྱི་ཚན་རིག་པ་ཞིག་ཀྱང་ཡིན། གང་ཡིན་བརྗོད་ན་ཁོང་གིས་དགེ་སློང་དག་གམ་མཁས་རྣམས་ཀྱིས། བསྲེག་བཅད་བརྡར་བའི་གསེར་བཞིན་དུ། ལེགས་པར་བརྟག་ལ་ང་ཡི་བཀའ། བླང་བར་བྱ་ཡིས་གུས་ཕྱིར་མིན། ཞེས་བཀའ་གནང་བ་དེ་ནི་དེང་སྐབས་ཚན་རིག་པའི་ལངས་ཕྱོགས་དང་ཧ་ཅང་མཐུན་པ་ཞིག་ཆགས་ཡོད། ནང་ཆོས་ནས་གསུང་པའི་རྟེན་ཅིང་འབྲེལ་བར་བྱུང་བའི་རྣམ་གཞག་དེ་ཐུན་མོང་མིན་པ་ཞིག་ཆགས་ཡོད། ལྟ་གྲུབ་སྨྲ་བ་གཞན་སུས་ཀྱང་དེ་འདྲ་གསུངས་ཀྱི་མེད། ནང་ཆོས་ནས་གསུང་པའི་རྟེན་ཅིང་འབྲེལ་བར་བྱུང་བའི་རྣམ་གཞག་དེ་དང་དེང་སྐབས་དངོས་ཁམས་རིག་པའི་ཀོན་ཊམ་(Quantum Physics) རྣམ་གཞག་དང་ཧ་ཅང་མཐུན་པོ་ཡོད། ཆོས་རྣམས་ཕན་ཚུན་ལྟོས་པ་མེད་པར་རང་ངོས་ནས་གྲུབ་པ་ཞིག་ཇི་ཙམ་བཙལ་ཡང་རྙེད་རྒྱུ་མེད་པ་ཞིག་ནང་ཆོས་ཀྱི་ཚན་རིག་དང་དེང་སྐབས་ཚན་རིག་གི་རྣམ་གཞག་གཉིས་ཀས་གསུངས་བཞིན་ཡོད། རྣམ་གཞག་དེ་དག་དངོས་ཡོད་གནས་ཚུལ་ལ་དཔྱད་སྐབས་ཕན་ཐོག་ཧ་ཅང་ཆེན་པོ་ཡོད། དངོས་ཡོད་གནས་ཚུལ་ཐོག་ཕན་ཚུན་རྟེན་འབྲེལ་ཡིན། དཔེར་ན་ཁོར་ཡུག དེ་བཞིན་རྒྱལ་ཁབ་འདྲ་མིན་ནང་ཡོད་པའི་མི་རྣམས་ཀྱི་བདེ་དོན་དེ་བཞིན་ཕན་ཚུན་གཅིག་ལ་གཅིག་བརྟེན་ནས་གནས་ཡོད། དེ་བཞིན་དེང་སྐབས་རྒྱལ་སྤྱིའི་ཚོང་གི་གནས་སྟངས་དེ་མཚུངས་ཆགས་ཡོད། ཕྱོགས་མཚུངས་ང་ཚོའི་ལུས་པོ་བདེ་ཐང་ཡོང་བར་སེམས་ཀྱི་ཞི་བདེར་རག་ལུས་ཡོད་པ་གསལ་པོ་རེད། དེར་བརྟེན་ང་ཚོས་ཕྱོགས་ཡོངས་ཀྱི་གནས་སྟངས་ལ་ལྟ་དགོས་པ་ཆགས་ཡོད། དེ་འདྲ་ཞིག་ཡོང་བར་སྟོན་པ་བཅོམ་ལྡན་འདས་ཀྱིས་གསུངས་པའི་རྟེན་ཅིང་འབྲེལ་བར་བྱུང་བའི་རྣམ་གཞག་དེས་ཕན་ཐོགས་ཧ་ཅང་ཆེན་པོ་ཡོད་ཅེས་བཀའ་སྩལ་རྗེས་གསར་འགོད་པ་ཞིག་གིས་བོད་དོན་དང་འབྲེལ་བའི་དྲི་བ་ཞུས་པར་བཀའ་ལན་སྩལ་དོན།
ངོས་རང་བོད་མི་ཞིག་ཡིན། དེང་སྐབས་ང་ཚོ་དཀའ་ངལ་འོག་གནས་ཡོད་ཀྱང་ང་ཚོར་བདེན་པ་ཡོད། ང་ཚོའི་བདེན་པའི་འཐབ་རྩོད་དེ་དང་མེ་མདའི་འཐབ་རྩོད་གཉིས་ཕྲལ་ཕུག་རྒྱང་གསུམ་དུ་མཐའ་མའི་རྒྱལ་ཁ་སུ་ལ་ཐོབ་རྒྱུའི་འགྲན་བསྡུར་བྱེད་ཀྱི་ཡོད་པ་ལྟར་རེད་ཅེས་མཚམས་རེ་ངོས་ཀྱི་དེ་འདྲ་བརྗོད་བཞིན་ཡོད། ངོས་ཀྱི་བསམ་པར་བདེན་པའི་འཐབ་རྩོད་དེ་ཕུག་ལ་རྒྱལ་ཁ་ཐོབ་རྒྱུ་ཡིན་པར་ཡིད་ཆེས་ཡོད་ཅེས་སོགས་ཀྱི་བཀའ་སློབ་སྩལ་བསྟུན། བཞུགས་གནས་ཕོ་བྲང་དུ་ཆིབས་སྒྱུར་བསྐྱངས་ཡོད། ཐེངས་འདིའི་དུས་དབང་ཆོས་འབྲེལ་སྐབས་གནས་མཆོག་རྡོ་རྗེ་གདན་དུ་བོད་ནས་ཆོས་ཞུ་བ་མི་གྲངས་ ༨༠༠༠ བརྒལ་བ་དང་རྒྱ་ནག་སྐམ་ས་ནས་རྒྱ་རིགས་ ༡༠༠༠ བརྒལ་བ། ཧི་མཱ་ལ་ཡི་རིས་རྒྱུད་ནས་ཆོས་ཞུ་བ་གྲངས་ ༣༥༠༠༠ གྲྭ་བཙུན་ཁྱོན་ ༢༠༠༠༠ རྒྱ་གར་ཆོས་ཞུ་བ་གྲངས་ ༡༠༠༠ དེ་་བཞིན་ཕྱི་རྒྱལ་ཡུལ་གྲུ་ཁག་མི་འདྲ་བ་ ༦༣ ནས་ཆོས་ཞུ་བ་བཅས་ཁྱོན་ཆོས་ཞུ་བ་གཅིག་འབུམ་ལྔ་ཁྲི ལྷག་བཅར་ཡོད་པ་བཅས།།
