༢༠༡༢ ཟླ་ ༡ ཚེས་ ༢༧ རེས་གཟའ་པ་སངས།
༄༅།  །འདི་གར་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲ་ཤིས་ལགས་ཀྱིས་ཕྱི་ལོ་ ༢༠༡༢ ཟླ་ ༡ ཚེས་ ༢༦ ཉིན་བཏང་གནས་ནང་འཁོད་དོན། ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་ཕྱི་ཟླ་ ༡ ཚེས་ ༢༦ ཉིན་བྱང་ཨ་རིའི་ཁྱབ་ཁོངས་ས་གནས་བོད་རིགས་སྤྱི་མཐུན་ཚོགས་པ་ཁག་དང༌།  བོད་དོན་རྒྱབ་སྐྱོར་ཚོགས་པ་ཡོངས་ལ་ཕྱི་ཟླ་ ༢ ཚེས་ ༨ ལྷག་དཀར་ཉིན་མོར་གཞིས་ལུས་བོད་མིར་གདུང་སེམས་མཉམ་སྐྱེ་ཡི་ལས་འགུལ་སྤེལ་དགོས་པ་དང༌།  ཕྱི་ཟླ་ ༢ ཚེས་ ༢༢ ཉིན་བོད་ཆུ་འབྲུག་ལོའི་ལོ་གསར་གཏོང་ཕྱོགས་ཐད་གཅིག་གྱུར་གྱི་བརྡ་ཁྱབ་ཅིག་གནང་ཡོད།
བརྡ་ཁྱབ་དེ་ནི་དཔལ་ལྡན་བཀའ་བློན་ཁྲི་པ་མཁས་དབང་བློ་བཟང་སེང་གེ་མཆོག་གིས་ཁ་ས་བཞུགས་སྒར་རྡ་ས་ལ་ནས་དྲྭ་ལམ་བརྙན་འཕྲིན་བརྒྱུད།  བོད་ནང་ད་ལྟའི་ཛ་དྲག་གི་གནས་སྟངས་ལ་དམིགས་པའི་གསར་འགོད་བསྒྲགས་གཏམ་གྱི་དགོངས་དོན་ལྟར་སྤེལ་བ་ཞིག་རེད།
སྐུ་ཚབ་དོན་གཅོད་ཀྱི་བརྡ་ཁྱབ་དེའི་ནང༌།  རྒྱ་ནག་གཞུང་གིས་བོད་ནང་དྲག་གནོན་གྱི་སྲིད་བྱུས་མུ་མཐུད་ལག་ལེན་སྟར་བཞིན་པ་མ་ཟད།  ལྷག་པར་ཉེ་བའི་ཉིན་ཤས་ནང་བོད་ཤར་ཕྱོགས་གསེར་རྟ་དང༌།  བྲག་འགོ།  ཨ་མདོ་རྔ་བ་སོགས་སུ་བོད་མིར་མེ་མདའ་བརྒྱབ་སྟེ་དམར་གསོད་བཏང་བའི་ཛ་དྲག་གི་གནས་ཚུལ་བྱུང་དང་འབྱུང་བཞིན་པ་ཚང་མས་མཁྱེན་གསལ་དང༌།  དཔལ་ལྡན་བཀའ་བློན་ཁྲི་པ་མཆོག་གིས་གལ་ཆེའི་གསར་འགོད་བསྒྲགས་གཏམ་ནང་འབོད་སྐུལ་ཞུས་པ་བཞིན།  ཕྱི་ཟླ་ ༢ ཚེས་ ༨ ལྷག་དཀར་གྱི་ཉི་མོར་ས་གནས་ཚང་མས་རང་རང་སོ་སོའི་ས་གནས་ཀྱི་གནས་སྟངས་ལ་གཞིགས་ནས།  གཞིས་ལུས་བོད་མིའི་ཞི་བའི་ལས་འགུལ་ལ་བྱེས་འཁོད་བོད་མིས་གདུང་སེམས་མཉམ་སྐྱེ་ཡོད་པ་དང༌།  རྒྱ་ནག་གཞུང་གིས་བོད་མིའི་ཞི་བའི་ལས་འགུལ་ལ་མེ་མདའ་བརྒྱབ་ནས་དྲག་གནོན་བྱས་པར།  བོད་མི་ཚོས་མཐའ་གཅིག་ཏུ་ངོ་རྒོལ་ཡོད་པའི་རྣམ་འགྱུར་གསལ་སྟོན་གྱི་ལས་འགུལ་སྤེལ་དགོས་ཞེས་འཁོད་ཡོད་པ་དང༌།
བརྡ་ཁྱབ་ནང་ད་དུང༌། ཕྱི་ཟླ་ ༢ ཚེས་ ༢༢ བོད་ཆུ་འབྲུག་ལོའི་ལོ་གསར་ཉིན་བྱེས་འཁོད་བོད་མི་ཚོས་གཞིས་ལུས་བོད་མིའི་དཀའ་སྡུག་ཚོར་བའི་ཐོག་ནས་འདི་ལོའི་ལོ་གསར་འདི་ཐུགས་སྤྲོ་དང༌།  རྒྱས་སྤྲོས་སྤྲོ་སྣང་གི་རྣམ་པ་མ་ཡིན་པར།  ཆོས་ཕྱོགས་དང༌།  སྲོལ་རྒྱུན་གྱི་ངོ་བོ་ལྡན་པའི་ཐོག་ནས་ཆུ་འབྲུག་ལོའི་བོད་ལུགས་ལོ་གསར་ཞིག་བསུ་བ་ཞུ་རོགས་ཞེས་འབོད་སྐུལ་གནང་ཡོད་པ་བཅས།།