༢༠༡༢ ཟླ་ ༡ ཚེས་ ༡༣ རེས་གཟའ་པ་སངས།
༄༅། འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གིས་ཕྱི་ལོ་ ༢༠༡༢ ཟླ་ ༡ ཚེས་ ༡༣ ལ་བཏང་གནས་ནང་འཁོད་དོན། ཐེ་ཝན་གྱི་སྲིད་འཛིན་དང་། གྲོས་ཚོགས་འཐུས་མིའི་འོས་བསྡུ་ཆེན་མོ་ཕྱི་ཟླ་ ༡ ཚེས་ ༡༤ ཉིན་དུས་གཅིག་ལ་ཐུགས་གཏན་འཁེལ་ཡོད་པ་ལྟར། འཛམ་གླིང་ཡུལ་གྲུ་གང་ས་ནས་གསར་འགོད་པ་དང་། ཉམས་ཞིབ་པ། གཞུང་འབྲེལ་མིན་པའི་ཚོགས་པ་སོགས་ཐེ་ཝན་གྱི་འོས་བསྡུའི་སྐོར་ལ་གཟིགས་ཞིབ་གནང་བར་ཕེབས་མཁན་གང་མང་ཡོད་པ་དང་། ཕྱི་སྡོད་རྒྱ་མི་རིགས་ཁྲོད་ནས་རྒྱ་ནག་དམངས་གཙོ་ཚོགས་པའི་ཚོགས་མི་ཁག་གཅིག་ཀྱང་ཐེ་ཝན་ནང་ཕེབས་ཡོད་ཅིང་། ཁོང་རྣམ་པའི་ཐེ་ཝན་ནང་གི་ལས་རིམ་ཁོངས་སུ་བོད་ཀྱི་ཐེ་ཝན་སྐུ་ཚབ་དོན་ཁང་དུ་གཟིགས་ཞིབ་ཀྱང་གོ་སྒྲིག་གནང་ཡོད་པ་བཞིན
ཁ་སེང་ཕྱི་ཚེས་ ༡༢ ཉིན་གྱི་ཕྱི་དྲོར་ཨ་རི་དང་། ཕ་རན་སི། འཇར་མན། ཨོ་སི་ཊོ་ལི་ཡ། ཐེ་ལན་ཌི། ཧོང་ཀོང་སོགས་ནང་གནས་སྡོད་གནང་བཞིན་ཡོད་པའི་རྒྱ་རིགས་རྒྱ་ནག་དམངས་གཙོ་ཚོགས་པའི་འགན་བཞེས་མཁན་མི་སྣ་བཅུ་གྲངས་ཤིག་ཐེ་ཝན་བོད་ཀྱི་སྐུ་ཚབ་དོན་ཁང་དུ་གཟིགས་སྐོར་ལ་ཕེབས་པ་དང་།
སྐབས་དེའི་ཚོགས་གཙོ་སྐུ་ཞབས་ཝང་མིང་ལགས་ཀྱིས་ཐེ་ཝན་ནང་ཕེབས་དགོས་པའི་ངོ་སྤྲོད་གནང་རྗེས། སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ཐེ་ཝན་ནང་གི་བོད་མིའི་གནས་སྟངས་དང་། བོད་དོན་རྒྱབ་སྐྱོར་ཚོགས་པ་ཁག ཐེ་ཝན་ནང་བོད་བརྒྱུད་ནང་ཆོས་སྐོར་སོགས་ངོ་སྤྲོད་གནང་རྗེས་ཚོགས་བཅར་ཁོངས་ནས་བཙན་བྱོལ་བོད་མིའི་གནས་སྟངས་དང་། ༧གོང་ས་མཆོག་གི་ཡང་སྲིད་སྐོར། ཆོས་སྲིད་ཟུང་འབྲེལ་གྱིས་བསྐྱངས་པའི་གཞུང་མཇུག་སྒྲིལ་ནས་ད་ལྟའི་བར་གྱི་གནས་སྟངས། བོད་ནང་གི་གནས་སྟངས་སྐོར་སོགས་ལ་དྲི་བ་གནང་བར་དོན་གཅོད་མཆོག་ནས་དོན་གནད་རེ་རེ་བཞིན་འགྲེལ་བརྗོད་ཞིབ་ཕྲ་གནང་བ་མ་ཟད། ཚོགས་བཅར་བ་རྣམས་དང་ཕན་ཚུན་བགྲོ་གླེང་ཡང་ལྷུག་པོ་གནང་ཡོད། ཁོང་རྣམ་པ་དེ་སྔ་རྒྱ་ནག་ཏུ་སྡོད་སྐབས་བོད་སྐོར་ཤེས་རྟོགས་ཧ་ལམ་མེད་པ་དང་། ཤེས་རྟོགས་གཅིག་པུ་ཡོད་པ་ནི་རྒྱ་ནག་གཞུང་གིས་བཟོ་བསྐྲུན་བྱས་པའི་ཞིང་བྲན་ཞེས་པའི་གློག་བརྙན་དེ་ཡིན་པ་དང་། ཁོང་ཚོ་ཕྱིས་སུ་ནུབ་ཕྱོགས་ཡུལ་གྲུ་ཁག་ཏུ་འབྱོར་རྗེས་ནུབ་ཕྱོགས་མི་སྣས་བོད་མིར་གདུང་སེམས་མཉམ་སྐྱེའི་རྒྱབ་སྐྱོར་བྱེད་པ་མཐོང་དུས། བོད་མིར་དོ་སྣང་བྱེད་འགོ་བཙུགས་པ་་སོགས་རང་རང་གི་མྱོང་ཚོར་ངོ་སྤྲོད་གནང་ཡོད། གཞན་ཡང་གཟིགས་སྐོར་ཚོགས་ཆུང་དེའི་ཁོངས་ཕ་རན་སི་དང་། ཐེ་ལན་ཌི་ནང་ཡོད་པའི་བོད་རྒྱ་མཐུན་ཚོགས་ཀྱི་ཚོགས་མི་དང་། ཐེ་ཝན་བོད་རྒྱ་མཐུན་ཚོགས་ཀྱི་ཚོགས་གཙོ་བཅས་ཕན་ཚུན་བསམ་ཚུལ་བརྗེ་རེས་གནང་བ་དང་། མཐའ་མ་དོན་གཅོད་ལས་ཁུངས་ནས་ཁོང་རྣམ་པར་དབུ་མའི་ལམ་གྱི་ངོ་སྤྲོད་དང་། རྒྱལ་སྤྱིའི་ཁྲིམས་དོན་མཁས་པས་བྲིས་པའི་བོད་ཀྱི་གནས་བབ། དོན་ཁང་ནས་བཟོ་བསྐྲུན་གནང་བའི་ལོ་ངོ་ལྔ་བཅུ་བཙན་བྱོལ་དུ་འདས་པའི་བོད་མིའི་སྐྱིད་སྡུག་ཅེས་པའི་གློག་བརྙན་དང་བརྙན་དེབ་བཅས་ཕྱག་རྟགས་སུ་ཕུལ་ནས་བོད་མིའི་གནས་སྟངས་སྔར་བས་ཤེས་རྟོགས་ཡོང་བ་ཞུས་ཡོད་པ་བཅས།།
