༢༠༡༢ ཟླ་ ༡ ཚེས་ ༢༧ རེས་གཟའ་པ་སངས།
ཐར་པ།
༄༅། །འདི་གར་བཞུགགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡ ཚེས་ ༢༦ ཉིན་ཤེས་རྟོགས་བྱུང་བར། ཕྱི་ཚེས་ ༢༣ ཉིན་རྔ་པ་རང་སྐྱོང་ཁུལ་འཛམ་ཐང་རྫོང་འཛུ་སྨད་ན་མདའ་ཞང་ཐོག་ནས་སྐྱ་སེར་ཕོ་མོ་ཆིག་སྟོང་ལྷག་གིས་མར་མེ་ཁྲོམ་སྐོར་བྱས་ཤིང་། སྐབས་དེར་ལས་འགུལ་སྣེ་ཁྲིད་པས་ལོ་གསར་གྱི་ཉིན་མོ་འདི་ནི་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་གནང་མཁན་རྣམས་ལ་གདུང་སེམས་མཉམ་སྐྱེ་དང་རྗེས་དྲན་ཞུ་བའི་ཉིན་མོ་ཞིག་ལས་དགའ་སྤྲོས་ཁེངས་པའི་ཉིན་མོ་ཞིག་མིན་ཚུལ་དང་། རང་ལུས་མེར་སྲེག་གཏོང་མཁན་དཔའ་བོ་དཔའ་མོ་རྣམས་རེ་རེ་བཞིན་མི་མང་ལ་ངོ་སྤྲོད་དང་བཅས་གཏམ་བཤད་གནང་ཡོད་འདུག
དེ་བཞིན་ཕྱི་ཚེས་ ༢༦ ཉིན་གྱི་བོད་ནང་གི་ཆུ་ཚོད་ ༡༢ ཙམ་ལ་འཛུ་སྟོད་འཛམ་ཐང་བར་མ་ཞང་ཐོག་ཏུ་རི་སྤུངས་ནོར་མོའི་བུ་ཐར་པ་ཞེས་པས་ཡི་གེ་སྦྱར་ནས་ད་བར་མི་མང་པོ་ཞིག་གིས་རང་ལུས་མེར་སྲེག་གཏོང་དགོས་པའི་རྒྱུ་མཚན་བོད་ལ་རང་དབང་དགོས་པ་དང་། ༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་རྒྱུའི་ཆེད་ཡིན་ཞིང་། དམིགས་ཡུལ་དེ་མ་འགྲུབ་བར་དུ་ང་ཚོ་བོད་མིས་ལས་འགུལ་མཚམས་འཇོག་མི་སྲིད་པ་བཅས་ཀྱི་ནང་དོན་འཁོད་ཡོད་པ་དང་། ཡི་གེ་འདི་སྦྱར་མཁན་ཐར་པ་ཁོ་རང་ཡིན་ཚུལ་གྱིས་ཁོ་རང་གི་འདྲ་པར་དང་། མིང་སོགས་གསལ་པོ་བྲིས་ནས་རྒྱ་གུང་ཁྲན་གྱིས་འཛིན་བཟུང་བྱེད་དུ་ཤོག་ཅེས་བྲིས་ཡོད་སྟབས། བོད་ནང་གི་ཆུ་ཚོད་ ༢ ཙམ་ལ་ཉེན་རྟོག་པ་དང་དམག་མི་མང་པོས་རི་སྤུངས་ནོར་མོ་ཚང་བསྐོར་ནས་ཐར་པ་འཛིན་བཟུང་གིས་བཙན་ཁྲིད་བྱེད་སྐབས་མི་མང་གིས་ནུས་ཤུགས་ཡོད་དགུས་བཀག་འགོག་བྱས་ཤིང་། མི་མང་པོས་ངོ་རྒོལ་སྐད་འབོད་དང་ཐར་པ་བཟུང་ན་མི་མང་ཚང་མས་ཡར་ལངས་བྱེད་རྒྱུ་ཡིན་ཚུལ་སོགས་བརྗོད་ནས་བཀག་འགོག་བྱས་པར་བརྟེན། ཉེན་རྟོག་པས་མི་མང་ཐོག་མཚོན་ཆ་བེད་སྤྱོད་ཀྱིས་གནས་ཚུལ་ཡོང་ཁུངས་ནས་གསུང་དོན་ལྟར་ན་མི་གཅིག་སྐབས་དེ་རང་དུ་འདས་གྲོངས་སུ་གྱུར་ཡོད་པ་དེ་འཛམ་ཐང་རྫོང་བར་མ་ཞང་ཤོས་མདའ་སྡེ་བའི་སྤོས་ཐར་ཚང་གི་ཕ་སྤོས་ཐར་གྱི་བུ་ཨོ་རྒྱན། རང་ལོ་ ༢༠ ཡིན་པ་ཁོང་ཡིན་འདུག ཁོང་དང་ཉིན་དེར་ཡི་གེ་སྦྱར་ནས་འཛིན་བཟུང་བྱས་པའི་རི་སྤུངས་ནོར་མོའི་བུ་ཐར་པ་གཉིས་རྒྱ་ནག་གི་སློབ་གྲྭ་ཞིག་ལ་མཉམ་དུ་འགྲོ་བཞིན་ཡོད་ཀྱང་སློབ་གྲྭའི་མིང་དང་ས་གནས་སོགས་ཤེས་རྟོགས་མ་བྱུང་། ཤོས་མདའ་སྡེ་བ་ནི་བར་མ་ཤང་ནས་སྤྱི་ལེ་གསུམ་ཙམ་གྱི་སར་ཡོད་པའི་ས་མ་འབྲོག་གི་སྡེ་བ་ཞིག་ཡིན་ཞིང་། དེ་རིང་སྟེ་ཕྱི་ཚེས་ ༢༧ ཉིན་བར་མ་ཞང་དང་ཞང་གི་ཉེ་འཁོར་གྱི་སྡེ་བ་ཚང་མར་ཉེན་རྟོག་པ་དང་དམག་མི་འབོར་ཆེན་འགྲེམས་འཇོག་གིས་བོད་མི་རྣམས་ཕྱི་ལ་ཐོན་ཙམ་བྱེད་འཇུག་གི་མེད་པའི་དམ་བསྒྲགས་ཀྱི་གནས་སྟངས་འོག་ཡོད་མུས་ཡིན་སྟབས། ཁོང་གི་ཕུང་པོ་ནང་མི་ལ་རག་ཡོད་མེད་སོགས་ཤེས་རྟོགས་མ་ཐུབ། དེ་མིན་བར་མ་ཞང་ནས་སྤྱི་ལེ་གསུམ་ཙམ་གྱི་སར་ཡོད་པའི་ལྷ་དབང་དགོན་པའི་གྲྭ་པ་བཞི་འཛིན་བཟུང་བྱས་ཡོད་ཀྱང་མིང་སོགས་ཤེས་རྟོགས་བྱུང་མེད། དེ་མིན་གྱི་མང་པོ་ཞིག་ལ་མེ་མདས་རྨས་སྐྱོན་ཕོག་ཡོད་ཀྱང་ཁོང་རྣམས་ཀྱི་མིང་དང་ས་གནས་སོགས་ད་ལྟ་མུ་མཐུད་ཛ་དྲག་གི་གནས་སྟངས་འགྲོ་བཞིན་ཡོད་སྟབས་གསལ་པོ་ཤེས་རྟོགས་ཐུབ་མེད། རྒྱ་གར་གྱི་ཆུ་ཚོད་ ༧ ཙམ་ལ་གནས་ཚུལ་ཤེས་རྟོགས་བྱུང་བར་འཛུ་སྟོད་འཛུ་སྨད་སོགས་ས་ཕྱོགས་མང་པོ་ཞིག་ནས་བར་མ་ཞང་དུ་མི་མང་ཆིག་ཁྲི་ཡས་མས་ཤིག་འདུ་འཛོམས་བྱུང་ཡོད་པ་དང་། ད་དུང་ས་གནས་མང་པོ་ནས་མི་མང་བར་མ་ཞང་དུ་ཡོང་བཞིན་ཡོད་འདུག་པ་བཅས།།
