༢༠༡༢ ཟླ་ ༡ ཚེས་ ༡༩ རེས་གཟའ་ཕུར་བུ།
༄༅། ཕྱི་ལོ་ ༢༠༡༢ ཟླ་ ༡ ཚེས་ ༡༩ ཉིན་འདི་གར་ཁུངས་ལྡན་གནས་ཚུལ་འབྱོར་བར་གཞིགས་ན། རང་ཡུལ་བོད་ནས་བལ་ཡུལ་སོགས་སུ་གཉེན་འཕྲད་དང་གནས་སྐོར་དུ་ཕེབས་མི་རྣམས་རང་ཡུལ་དུ་ཕྱིར་ལོག་བྱེད་སྐབས་བལ་བོད་ས་མཚམས་འགྲམ་འགག་སྒོ་ནས་བཟུང་ལྷ་ས་གྲོང་ཁྱེར་བར་འགག་སྒོའི་ས་ཚིགས་ཁག་བཅུ་གཉིས་ཙམ་བཙུགས་ཏེ་དེ་དག་ལ་མཐའ་མཚམས་ས་སྲུང་དམག་མི་དང༌། བོད་མི་གནས་ཡུལ་གྱི་ས་ཁུལ་ཁག་ནས་ཆེད་གཏོང་བྱས་པའི་བདེ་སྲུང་ཚན་པའི་མི་སྣ་སོགས་ཆེད་བཙུགས་ཀྱིས་ཅ་དངོས་བསྔོག་བཤེར་དང༌། མི་སྣ་རྩད་ཞིབ་ནན་པོ་བྱེད་ཀྱི་ཡོད་པ་མ་ཟད། བོད་མི་གནས་སྐོར་བ་ཚོས་རང་ཉིད་ཀྱི་འགྲོ་གྲོན་བཏང་ནས་ཉོས་པའི་སྨན་དང༌། མཆོད་རྫས་སོགས་ཀྱང་ཆ་ཚང་བཙན་འཕྲོག་བྱེད་ཀྱི་ཡོད་འདུག་ཅིང༌། མཐའ་ན་མ་ཎི་སྒྲེང་བྱེད་ཀྱི་ཕྲེང་བ་སོགས་གང་ལྟར་ཆོས་ལུགས་དང་འབྲེལ་བ་ཡོད་པའི་ཅ་དངོས་ཅི་ཞིག་ཡིན་ཀྱང་བཙན་འཕྲོག་བྱེད་ཀྱང་བྱས་པ་མ་ཟད། འགག་སྒོ་ཁག་གི་ས་སྲུང་དམག་མི་དེ་ཚོར་གནས་སྐོར་བ་ཚོས་གནས་ཚུལ་གསལ་བཤད་བྱེད་སྐབས་དམག་མི་དེ་ཚོས་ཚུར་མེ་མདའི་ཁ་བསྟན་ནས་འཇིགས་བསྐུལ་བྱེད་བཞིན་ཡོད་པ་སོགས་ད་ལྟ་རང་ཡུལ་བོད་ནང་ཕྱིར་ལོག་བྱེད་མཁན་བོད་མི་ཚོར་རྒྱ་ནག་གཞུང་གིས་སྤྱི་ཚོགས་བརྟན་ལྷིང་སོགས་ལ་ཁ་གཡར་ཏེ་བོད་མིའི་ཆོས་དད་རང་དབང་ལ་རྡོག་རོལ་དང༌། སྨྲ་བརྗོད་རང་དབང་དང་འགྲོ་བསྐྱོད་རང་དབང་ལ་ཚད་ལས་འདས་པའི་རྡོག་རོལ་བཏང་སྟེ་བོད་མི་དད་ལྡན་པ་ཚོའི་སེམས་ནས་དོ་ཕོག་ཤུགས་ཆེ་གཏོང་བཞིན་ཡོད་པའི་གནས་ཚུལ་ཐོན་འདུག་པ་བཅས།།
རང་ཡུལ་བོད་དུ་ཕྱིར་ལོག་བྱེད་མཁན་བོད་མི་གནས་སྐོར་བར་རྒྱ་ནག་གཞུང་གི་འབྲེལ་ཡོད་ཚན་པས་གང་བྱུང་སྔོག་བཤེར་བྱེད་ཀྱི་ཡོད་པ།
གསར་གནས།
འབྲེལ་གནས།
