༢༠༡༢ ཟླ་ ༡ ཚེས་ ༢༥ རེས་གཟའ་ལྷག་པ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཁམས་སྡེ་དགེ་རྫོགས་ཆེན་དུ་དེ་རིང་་བོད་དོན་སྐོར་སྦྱར་ཡིག་གཏོར་འགྲེམས་བྱས་པའི་གནས་ཚུལ་ཐོན་འདུག་པ་དང༌། སྦྱར་ཡིག་ནང་དོན་དུ་རང་ལུས་མེར་སྲེག་གཏོང་བཞིན་པའི་ལས་འགུལ་ལ་གདུང་སེམས་མཉམ་སྐྱེ་བྱེད་དགོས་པ་དང༌། ལོ་གསར་གཏོང་རྒྱུ་མེད་པ་སོགས་ཀྱི་སྐོར་འཁོད་ཡོད་འདུག་ཅིང༌། ད་ལྟའི་ཆར་ས་གནས་སུ་དམ་བསྒྲགས་ཆེན་པོ་བྱས་དང་བྱེད་མུས་ཡིན་འདུག་པ་དང༌།
དེ་བཞིན་སྐྱེ་རྒུ་མདོ་ཁུལ་དུའང་ལོ་གསར་གཏོང་རྒྱུ་མེད་པ་སོགས་ཀྱི་སྦྱར་ཡིག་སྦྱར་འགྲེམས་བྱེད་བཞིན་པའི་གནས་ཚུལ་ཐོན་ཏེ་ས་གནས་སུ་དམ་བསྒྲགས་ཆེན་པོ་བྱེད་བཞིན་ཡོད་འདུག་པ་དང༌།
ལྷ་ས་གྲོང་ཁྱེར་ཁུལ་དུ་ཉིན་ཤས་ནང་དམ་བསྒྲགས་བྱ་ཤུགས་ཆེ་རུ་ཕྱིན་ཏེ་སྲང་ལམ་ཁག་ཏུ་སྒྲིག་ཆས་གྱོན་པ་དང་མི་གྱོན་པའི་དྲག་ཆས་དམག་མི་ཁྱོན་ཆེ་འགྲེམས་འཇོག་བྱས་ཡོད་པ་མ་ཟད། འགྲུལ་བཞུད་བྱེད་མཁན་རྣམས་ལ་ཞིབ་བཤེར་བྱ་ཤུགས་ཆེ་རུ་བཏང་ཡོད་པ་མ་ཟད། དམིགས་བསལ་དགེ་འདུན་པའི་རིགས་ལ་དམ་བསྒྲགས་ཀྱིས་གང་བྱུང་འགྲོ་བསྐྱོད་མི་ཆོག་པར་གྲྭ་ཆས་གྱོན་པའི་རིགས་མཐོང་མ་ཐག་དྲག་ཆས་དམག་མི་སོགས་ནས་གནད་དོན་གང་ཡིན་གསལ་བཤད་མ་བྱས་པར་ལམ་སེང་འཛིན་བཟུང་གིས་འདྲི་བརྩད་ནན་མོ་བྱས་ཏེ་དམ་བསྒྲགས་ཆེན་པོ་བྱེད་བཞིན་ཡོད་པའི་གནས་ཚུལ་ཐོན་འདུག་པ་བཅས།།
གསེར་རྟ་རྫོང་ཐོག་ཏུ་་༢༠༡༢།༡།༢༣་ཉིན་དགོང་དྲོ་སྦྱར་འགྲེམས་བྱས་པའི་སྦྱར་ཡིག་ངོ་བཤུས།
ནང་དོན་གཙོ་བོར།་་་་་ང་ནི་མི་ཞིག་ཡིན། ངའི་ཐོབ་ཐང་ལ་སུས་ཀྱང་རྡོག་བརྫིས་བྱེད་མི་ཆོག ང་ཚོ་བོད་མི་རིགས་ཀྱི་དྲང་བདེན་དང་གནས་ལུགས་ཀྱི་ཆེད་དུ་སྤུན་ཟླ་མང་བོའི་ཚེ་སྲོག་ཤོར་སོང་ལ། སྤུན་ཟླ་མང་བོ་གཉའ་གནོན་འོག་བཙོན་དུ་ལུས་ཡོད། བོད་མི་ཡིན་ཕྱིན། ལོ་སར་མི་རོལ་བར་ཞུ། བོད་ཀྱི་ལོ་སར་སྐབས་སྡུག་འཚོགས་བྱེད་པར་ཞུ་སོགས་གསལ་ཡོད་འདུག
