༢༠༡༢ ཟླ་ ༡ ཚེས་ ༡༩ རེས་གཟའ་ཕུར་བུ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༢ ཟླ་ ༡ ཚེས་ ༡༨ ཉིན་བཏང་གནས་ནང་
འཁོད་དོན། ཕྱི་ལོ་ ༢༠༡༡ ལོའི་ཟླ་ ༣ ཚེས་ ༡༦ ཉིན་མདོ་སྨད་རྔ་བ་རྫོང་ཀིརྟི་དགོན་གྱི་དགེ་འདུན་པ་ཕུན་ཚོགས་ལགས་ཀྱིས་རང་ལུས་མེར་སྲེག་བཏང་ཉིན་ས་གནས་སེར་སྐྱ་མང་པོས་ཞི་རྒོལ་བྱེད་སྐབས་མི་མང་པོ་ཞིག་འཛིན་བཟུང་བྱས་པའི་གྲས་སུ་རྔ་སྲིབ་སྤྲོ་ཚིགས་ཐང་བ་མའི་བཀྲ་རྒྱལ་ཚང་གི་སྐལ་བཟང་ངམ་མགོན་དཀར་ཞུ་བ། རང་ལོ་ ༤༢ ཡིན་པ་ཁོང་འཛིན་བཟུང་བྱས་ཏེ་རྔ་བ་རྫོང་ཐོག་ཏུ་བཀག་ཉར་བྱས་འདུག ད་བར་ཟླ་ ༩ ལྷག་རིང་གཅར་རྡུང་མནར་གཅོད་དྲག་པོ་བཏང་ནས་བཀག་ཉར་བྱས་ཡོད་པ་མ་ཟད། གཉེན་ཉེ་སུ་ལ་ཡང་ངོ་ཐུག་བཅུག་མེད། ཉེ་ཆར་གནས་ཚུལ་ཐོན་པར་ཕྱི་ལོ ༢༠༡༢ ལོའི་ཟླ་ ༡ ཚེས་ ༨ ཉིན་རྒྱ་ནག་གཞུང་གིས་རྩ་ཁྲིམས་དང་མི་མཐུན་པར་གསང་བའི་སྒོ་ནས་ལོ་ ༣ དུས་བཀག་བཙོན་འཇུག་གི་ཁྲིམས་ཐག་བཅད་དེ་ནང་མིར་བརྡ་ལན་ཙམ་ཡང་མེད་པར་སི་ཁྲོན་གྱི་མེན་ཡངས་ཞེས་པའི་ས་གནས་ཀྱི་བཙོན་ཁང་དུ་ཁྲིད་ཡོད་འདུག ས་གནས་ཀྱི་བཙོན་ཁང་དུ་སླེབས་ནས་ཉིན་ཤས་རྗེས་ནས་མ་གཏོགས་ཁོང་ལ་ཁྲིམས་ཐག་བཅད་པ་དང་བཙོན་ར་གང་དུ་ཁྲིད་ཡོད་མེད་སོགས་ནང་མིས་ཀྱང་ཤེས་རྟོགས་ཐུབ་མེད་པར་ལུས་འདུག
དེ་བཞིན་རྔ་པ་རྫོང་རོང་ཁོག་པོ་ཞང་ན་མདའ་སྡེ་བའི་འབག་ཆུང་ཚང་གི་བུ་རང་ལོ་ ༢༦ ཡིན་པ་ཁོང་ཕྱི་ལོ་ ༢༠༡༡ ལོའི་ཕྱི་ཟླ་ ༡༡ པའི་ནང་ཕྱི་ཕྱོགས་སུ་འབྲེལ་བ་་བྱས་པའི་དོགས་གཞིའི་འོག་འཛིན་བཟུང་བཙན་ཁྲིད་བྱས་ཡོད་ཀྱང་། ད་བར་གང་དུ་བཀག་ཉར་བྱས་ཡོད་མེད་ཙམ་ཡང་ཤེས་རྟོགས་མ་ཐུབ་པར་མུ་མཐུད་གར་སོང་ཆ་མེད་ཀྱི་གནས་སྟངས་འོག་ལྷག་ཡོད་འདུག
ཡང་རྔ་པ་རྫོང་མཁར་སར་ཞང་རུ་ཆེན་གཉིས་པའི་ཀུ་ནེ་ཚང་རྔ་པ་ཀིརྟི་དགོན་པའི་དགེ་འདུན་པ་བློ་བཟང་བཀྲ་ཤིས། རང་ལོ་ ༢༦ ཡིན་པ་ཁོང་ཡང་ཕྱི་ལོ་ ༢༠༡༡ ལོའི་ཕྱི་ཟླ་ ༡༡ ནང་ཕྱི་ཕྱོགས་སུ་འབྲེལ་བ་བྱས་པའི་དོགས་གཞིའི་འོག་ཁྲིན་ཏུའུའི་གསང་བའི་ལས་ཁུངས་ཀྱི་མི་སྣས་འཛིན་བཟུང་བྱས་ཡོད་ཀྱང་ད་བར་ཁྲིན་ཏུའུ་རུ་ཡོད་པའི་གནས་ཚུལ་ཙམ་ལས་གནས་སྟངས་གང་འདྲ་ཡིན་མིན་སོགས་གང་ཡང་ཤེས་རྟོགས་མ་ཐུབ་པར་ལྷག་ཡོད་འདུག་པ་བཅས།།
