༢༠༡༢ ཟླ་ ༡ ཚེས་ ༢༤ རེས་གཟའ་མིག་དམར།
༄༅། །འདི་གར་ཁུངས་ལྡན་གནས་ཚུལ་འབྱོར་བར་གཞིགས་ན། འདི་ཟླའི་ཕྱི་ཚེས་ ༢༣།༢༤ ཉིན་བོད་ཀྱི་གསེར་རྟ་རྫོང་ཐོག་ཏུ་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་སྲེག་གཏོང་རྒྱུ་ཡིན་པའི་ཡིག་ཆ་ཞིག་བཀྲམ་ཡོད་པར་བརྟེན། ཉིན་དེར་བོད་མི་མང་པོ་རྫོང་ཐོག་ཏུ་འཛོམས་ཏེ།
ངོ་རྒོལ་བྱེད་མཁན་གྱི་ཕུང་པོ་རྒྱ་ནག་གཞུང་གི་ལག་ཏུ་མ་ཤོར་བ་བྱེད་དགོས་སྐོར་བརྗོད་ཡོད་པ་དང་། རྒྱ་ནག་གཞུང་ངོས་ནས་ཀྱང་དྲག་གནོན་བྱེད་རྒྱུ་གྲ་སྒྲིག་ཆ་ཚང་བྱས་ཡོད་འདུག འོན་ཀྱང་ཕྱི་ཚེས་  ༢༤ ཉིན་བོད་མི་ཚོས་རྒྱ་གཞུང་ལ་ངོ་རྒོལ་གྱི་སྐད་འབོད་བྱས་པར་བརྟེན། རྒྱ་ནག་གཞུང་ཕྱོགས་ནས་དམག་མི་དང་ཉེན་རྟོག་པ་བཏང་སྟེ་དྲག་གནོན་བྱེད་བཞིན་ཡོད་པ་དང་། མི་གཉིས་ལ་མེ་མདའ་བརྒྱབ་སྟེ་རྐྱེན་ལམ་དུ་བཏང་ཡོད། དེ་ཡང་ཁོང་གཉིས་ནི་མཆོག་ཚང་འོན་ཟ་བདེ་བའི་པོ་པོ་རང་ལོ་ ༣༥ འབྲོག་ས་ནས་ཡིན་པ་དང་། ཡང་ཞིང་ཁུལ་ནས་ཡིན་པ་གསེར་བ་གསར་སྡེའི་རང་ལོ་ ༢༨ ནས་ ༣༣ བར་ཡིན་པ་ཟླ་བ་གྲགས་པ་ཡིན་འདུག དེ་མིན་གསེར་རྟ་གསེར་ཐང་ཡུལ་མཚོ་དཔལ་ཤུལ་ཤོལ་ཐའི་སློབ་ཕྲུག་སངས་སྐྱབས་ལ་མེ་མདའ་བརྒྱབ་སྟེ་མདེའུ་བདུན་ཕོག་ཡོད་པའི་ཛ་དྲག་གི་གནས་ཚུལ་ཐོན་ཡོད།
ད་ལྟ་ས་ཁུལ་དེར་དྲག་གནོན་ཤུགས་ཆེ་བྱེད་བཞིན་པར་བརྟེན་མི་ཚང་མ་ཕྱི་ལོག་ཏུ་འགྲོ་མ་བཅུག་པ་དང་། རྫོང་ཐོག་ནས་ཟ་ཁང་དང་ཚོང་ཁང་ཚང་མ་སྒོ་བརྒྱབ་བཅུག་ཡོད་པ་མ་ཟད།  གཞུང་ལམ་གང་སར་དམག་མི་ཧ་ཅང་མང་པོ་བཀྲམ་ཡོད་འདུག གཞན་ཡང་བོད་མི་རྨས་སྐྱོན་ཚབས་ཆེན་ཕོག་མཁན་བྱུང་ཡོད་པ་རྣམས་ལ་སྨན་བཅོས་ཀྱི་མཐུན་རྐྱེན་མེད་པའི་དཀའ་ངལ་འཕྲད་བཞིན་ཡོད་འདུག་པ་བཅས།།