༢༠༡༢ ཟླ་ ༡ ཚེས་ ༡༠ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༡ ཚེས་ ༡༠ ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༢ གི་དངོས་གཞི་ཉིན་གཉིས་པ་དབུ་འཛུགས་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་སྒྲུབ་ཞག་སྔོན་དུ་མཛད་གྲུབ་མཚམས་སྔ་དྲོ་ཆུ་ཚོད་ ༦ ཐོག་མགོན་པོ་གང་ཉིད་མཆོག་བཞུགས་གནས་གཟིམ་ཆུང་ནས་དུང་རྒྱ་སྤོས་སྣེས་སྔོན་བསུས་ཏེ་གདན་འདྲེན་ཞུས་ཐོག་དུས་དབང་ཐང་ཆེན་གྱི་བཞུགས་ཁྲི་རིན་པོ་ཆེར་ྋཞབས་སོར་འཁོད་ནས་དཔལ་དུས་ཀྱི་འཁོར་ལོའི་དབང་ཆེན་གྱི་དངོས་གཞི་གཉིས་པ་དབུ་འཛུགས་མ་བསྐྱངས་སངས་རྒྱས་ཆོས་ཚོགས་མ་བཏོན་གྲུབ་མཚམས་ྋགོང་ས་ྋསྐྱབས་མགོན་ཆེན་པོ་མཆོག་གིས་དུས་འཁོར་དབང་ཆེན་ཉིན་གཉིས་པ་དབུ་འཛུགས་ཀྱི་སྔོན་ལ་དད་ལྡན་ཆོས་ཞུ་བ་རྣམས་ལ་ལམ་སྟོན་བཀའ་སློབ་སྩལ་དོན། སྤྱིར་རྒྱུ་འབྲས་འདོད་པའི་ཆོས་ལུགས་དང་དེའི་ནང་ཚན་ནས་ཞི་གནས་ལྷག་མཐོང་ཡོད་པའི་རྒྱ་གར་འཕགས་པའི་ཡུལ་གྱི་ཕྱི་ནང་གྲུབ་མཐའ་ཡོངས་སུ་རྫོགས་པས་ཉོན་མོངས་ལ་ཉེས་དམིགས་སུ་བལྟས་ནས། ཉོན་མོངས་ལ་བསྙེན་པོ་བསྟེན་རྒྱུ་ཤོད་ཀྱི་ཡོད། དེ་བཞིན་དགེ་སློང་ཡིན་བསམས་པའི་བསམ་བློ་དེ་རྨི་ལམ་ཚུན་ཆད་འཁྱེར་ནས་བསྡད་ན་དེ་ལས་ལྷག་པའི་གཟི་བརྗིད་དང་བྱིན་རླབས་ཆེ་བ་མེད། དེ་སྔ་བོད་ནང་འདྲ་ཆགས་པོའི་ཐོག་ནས་མཛད་སྒོ་ཚོགས་རྒྱུ་དེ་འདྲ་བྱེད་ཀྱི་ཡོད། ང་ཚོ་རྒྱ་གར་དུ་བཙན་བྱོལ་བ་ཆགས་ཏེ་དེ་ལྟར་བྱ་རྒྱུའི་དུས་ཚོད་དེ་ཡོལ་ཟིན་པ་རེད། དངོས་གནས་དྲང་གནས་ཁ་ཡོད་ལག་ཡོད་ཐོག་ནས་འགྲོ་གི་ཡོད། ཕྱོགས་གཅིག་ནས་གོ་སྐབས་ཤིག་བྱུང་བ་རེད། དེ་བཞིན་ངོས་རང་གི་གཤིས་ཀར་འདྲ་ཆགས་པོ་དང་བཅོས་མ་བྱ་རྒྱུར་དགའ་པོ་རྩ་བ་ནས་མེད། དེ་བྱབ་མི་འདུག་ལ་མགོ་སྐོར་གཏོང་གི་ཡོད་པ་རེད། དངོས་གནས་དོན་དག་མ་འཕྱུག་པ་བྱ་རྒྱུ་ཧ་ཅང་གལ་ཆེན་པོ་ཡིན། བཅོམ་ལྡན་འདས་ཀྱི་མཛད་པར་བལྟས་ན། ཐོག་མར་རྒྱལ་པོའི་ཁབ་ཏུ་བཞུགས། དེ་ནས་ཁྱིམ་ནས་ཁྱིམ་མེད་པ་རབ་ཏུ་བྱུང་སྟེ་ཚུལ་ཁྲིམས་ཀྱི་བསླབ་པ་ཉམས་བཞེས་གནང་ཡོད། དེ་རྗེས་ཆུ་བོ་ནཻ་ཉྫ་ནའི་དྲུང་དུ་ལོ་དྲུག་དཀའ་བ་སྤྱད་དེ་ཏིང་ངེ་འཛིན་གྱི་བསླབ་པ་ཉམས་བཞེས་གནང་འདུག དེ་དང་ཆབས་ཅིག་འཇིག་རྟེན་ལས་འདས་པའི་ཤེས་རབ་ཀྱི་བསླབ་པ་དང་ཞི་གནས་ལྷག་མཐོང་ཉམས་བཞེས་གནང་སྟེ་སངས་རྒྱས་པའི་མཛད་པ་མཛད་ཡོད། གང་ལྟར་བསླབ་གསུམ་གྱི་ཉམས་ལེན་ཡག་པོ་བྱ་རྒྱུ་དེ་གལ་ཆེན་པོ་རེད། ཅེས་བཀའ་སློབ་སྩལ་ཏེ་བཀའ་དབང་སྔོན་མའི་འཕྲོ་སྐྱོང་མཇུག་སྒྲིལ་མཛད་ཡོད།