༢༠༡༢ ཟླ་ ༡ ཚེས་ ༡༡ རེས་གཟའ་ལྷག་པ།
༄༅། །སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་དཔལ་དུས་ཀྱི་འཁོར་ལོའི་དབང་ཆེན་གྱི་སྦྱིན་བདག་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་དམ་པ་རྡོ་རྗེ་མཁའ་འགྲོ་མཆོག་གིས་གཙོས་སྦྱིན་བདག་རྣམས་ནས་ཇི་ལྟར་སྔོན་ནས་གསོལ་བ་ཕུར་ཚུགས་སུ་བཏབ་དོན་ལྟར་བཀའ་བཞེས་བཟང་པོ་སྨིན་སྕལ་ཐོབ་སྟེ་ཕྱི་ལོ་ ༢༠༡༡ ཟླ་  ༡༢  ཚེས་ ༣༡ ནས་ཕྱི་ལོ་ ༢༠༡༢  ཟླ་  ༡ ཚེས་ ༡༠ བར་གནས་མཆོག་རྡོ་རྗེ་གདན་དུ་ཁྱོན་རྒྱལ་ཁབ་ ༦༣ ནས་ཆེད་ཕེབས་པའི་སྐལ་ལྡན་གདུལ་བྱ་ཆིག་འབུམ་བརྒལ་བར་སྔོན་འགྲོའི་གསུང་ཆོས་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་དང༌། རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ། དགེ་བཤེས་གླང་ཐང་པ་རྡོ་རྗེ་སེངྒེས་མཛད་པའི་བློ་སྦྱོང་ཚིག་བརྒྱད་མ། དཔལ་མགོན་ཀླུ་སྒྲུབ་ཀྱིས་མཛད་པའི་འཇིག་རྟེན་ལས་འདས་པའི་སྟོད་པ་བཅས་དང་། དེ་བཞིན་དཔལ་དུས་ཀྱི་འཁོར་ལོའི་དབང་ཆེན་སོགས་ཁྱོན་ཉིན་གྲངས་བཅུའི་རིང་བསྐྱངས་པའི་མཛད་འཕྲིན་རྣམས་ལེགས་པར་གྲུབ་མཚམས། ཕྱི་ཚེས་ ༡༡ ཉིན་གྱི་ཕྱེད་ཡོལ་ཆུ་ཚོད་ ༡༢ ཐོག་མགོན་པོ་གང་ཉིད་མཆོག་དུས་འཁོར་ལྷ་ཁང་དང་དེ་རྗེས་མཆོད་རྟེན་ཆེན་པོར་གཟིགས་སྐོར་མཛད་གྲུབ་མཚམས་ཕེབས་འགྲོའི་བརྒྱུད་གྷ་ཡ་གནམ་ཐང་དུ་ཆིབས་སྒྱུར་བསྐྱངས་སྐབས་དད་ལྡན་ཆོས་ཞུ་བ་སྟོང་ཚོ་མང་པོས་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་སྐྱེལ་ཞུས་ཡོད། དེ་རྗེས་ྋགོང་ས་ྋསྐྱབས་མགོན་ཆེན་པོ་མཆོག་གི་སྐུ་འཁོར་ལྷན་རྒྱས་གྷ་ཡ་གནམ་ཐང་ནས་མཁའ་ལམ་བརྒྱུད་ལྡི་ལི་དང་དེ་ནས་པུ་ནེར་ཆིབས་སྒྱུར་བསྐྱང་རྒྱུ་ཡིན་འདུག་པ་བཅས།།