༢༠༡༢ ཟླ་ ༡ ཚེས་ ༡༠ རེས་གཟའ་མིག་དམར།
༄༅། འདི་ག་བོད་ཡིག་ཚན་པའི་གསར་འགོད་པས་གནས་མཆོག་རྡོ་རྗེ་གདན་ནས་བཏང་གནས་ནང་འཁོད་དོན། །ཕྱི་ལོ་ ༢༠༡༢ ཟླ་ ༡ ཚེས་ ༨ ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་གྱི་སྔོན་འགྲོའི་སློབ་མ་སྟ་གོན་བསྐྱངས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་སྒྲུབ་ཞག་སྔོན་དུ་མཛད་གྲུབ་མཚམས་ཕྱེད་ཡོལ་ཆུ་ཚོད་ ༡༢ ཐོག་མགོན་པོ་གང་ཉིད་མཆོག་བཞུགས་གནས་གཟིམ་ཆུང་ནས་དུས་དབང་སྦྱིན་བདག་རྣམ་པའི་འཐུས་ཚབ་སོགས་ཀྱིས་སྤོས་སྣེས་སྔོན་བསུས་ཏེ་གདན་འདྲེན་ཞུས་ཐོག་དུས་དབང་ཐང་ཆེན་གྱི་བཞུགས་ཁྲི་རིན་པོ་ཆེར་ྋཞབས་སོར་འཁོད་དེ་དཔལ་དུས་ཀྱི་འཁོར་ལོའི་དབང་ཆེན་གྱི་སྔོན་འགྲོའི་སློབ་མ་སྟ་གོན་དབུ་འཛུགས་མ་བསྐྱངས་གོང་སོག་པོའི་གྲྭ་པ་ཁག་གཅིག་གིས་སོག་སྐད་ཐོག་ཤེས་རབ་སྙིང་པོ་གསུང་འདོན་གནང༌། དེ་ནས་མགོན་པོ་གང་ཉིད་མཆོག་གིས་དུས་འཁོར་གྱི་སློབ་མ་སྟ་གོན་སྔོན་ལ་དད་ལྡན་ཆོས་ཞུ་བ་རྣམས་ལ་ལམ་སྟོན་བཀའ་སློབ་སྩལ་དོན། འབྲོང་སྟོན་ཕེབས་སྐབས་བོད་ལ་མི་རྩིས་ཆེན་པོ་ཞིག་མཛད་པ་རེད། དེའི་ནང་དེ་དུས་བོད་ལ་མི་ས་ཡ་བཅུ་ཡོད་ཅེས་བརྗོད་ཀྱི་འདུག འབྲོང་སྟོན་ཕྱི་ལོ་ཆིག་སྟོང་བརྒྱད་བརྒྱའི་གོང་ལ་རེད། དེ་དུས་བོད་ལ་མི་ས་ཡ་བཅུ་གྲངས་ཤིག་ཡོད་པ་ཤོད་ཀྱི་འདུག བར་སྐབས་ང་ཚོས་འཆར་ཅན་བོད་མི་ས་ཡ་དྲུག་བརྗོད་ཀྱི་ཡོད། ཆོས་རྒྱལ་མེས་དབོན་རྣམ་གསུམ་སྐབས་ལ་དེ་ལས་མང་བ་ཡོད་པ་ལྟ་བུ་འདུག འབྲོང་སྟོན་ཕེབས་སྐབས་ས་ཡ་བཅུ་ཡོད་པ་རེད། དེ་དག་གི་གྲས་དེ་ཕྱོགས་གཅིག་ནས་འཕྲོད་བསྟེན་མེད་པའི་དབང་གིས་ནད་ཡམས་བྱུང་ནས་མི་འབོར་ཉུང་དུ་ཕྱིན་པ་ཡིན་སྲིད། དེ་བཞིན་རབ་བྱུང་ཕོ་མོ་འབོར་ཆེན་པོ་ཡོད་སྟབས་ཁྱད་པར་ཆགས་པ་མིན་ནམ། རབ་བྱུང་གང་ཡོད་པ་དེ་དག་སྤུས་དག་པོ་དགོས་རྒྱུ་ཧ་ཅང་གལ་ཆེན་པོ་རེད། ད་ལྟའི་དུས་ཚོད་འདིེར་ང་ཚོ་སེར་སྐྱ་ཕོ་མོ་དབྱེར་མེད་ཐོག་ནས་ནང་ཆོས་སློབ་སྦྱོང་བྱེད་དགོས། བཙུན་མའི་དགེ་བཤེས་དེ་དག་ང་ཚོ་ཉི་ཤུའི་སྐབས་ནས་རིམ་བཞིན་ཐོན་ཡོང་གི་ཡོད། དེ་བཞིན་སྔ་མོ་བོད་ལ་ཆ་བཞག་ན། རྡོ་རིང་པཎྡྲི་ཏ་དང་མདོ་མཁར་ཞབས་དྲུང་རྣམས་གཉིས་མི་སྐྱ་རེད་ཀྱང་གཞུང་མང་པོ་ཤེས་ཀྱི་ཡོད། ངོས་ཀྱིས་དྲན་ཐོག་ལྟར་ན། བར་ཞི་འདས་གྲོངས་སུ་གྱུར་བ་དེ་ཡང་ཁྱིམ་པ་རེད། གཞུང་ཆེན་གྱི་ཐོག་དོ་སྣང་ཡོད་པ་མ་ཟད། གང་ཙམ་ཤེས་ཀྱི་ཡོད་པ་འདྲ། རྩ་བའི་སངས་རྒྱས་ཀྱི་ཆོས་ལ་སེར་སྐྱ་ཕོ་མོ་དབྱེར་མེད་ཐོག་ནས་སློབ་སྦྱོང་བྱེད་དགོས། རིམ་བཞིན་བོད་ཀྱི་སངས་རྒྱས་ཀྱི་ཆོས་བྱེད་མཁན་ཡུལ་པ་ཚོའི་ཕྲུ་གུ་རྣམས་ལ་སློབ་གྲྭའི་ནང་བསླབ་རྒྱུ་དང༌།  ང་ཚོས་སློབ་གྲྭ་ཁག་ནང་རིགས་ལམ་ཐོག་ནས་སློབ་སྦྱོང་བསླབ་རྒྱུའི་འབད་བརྩོན་སྔོན་མ་ནས་བྱས་པ་རེད། འོན་ཀྱང་ལག་ལེན་མཐའ་འཁྱོངས་བ་ཞིག་དང་ཚགས་ཚུད་པ་གཅིག་བྱུང་མེད། བར་སྐབས་དེའི་ཐོག་ང་ཚོས་དོ་སྣང་བྱེད་ཀྱི་ཡོད་པ་རེད། ཆོས་རྗེ་དགེ་འདུན་འདུ་ཚོགས་ཆེན་པོ་བྱུང་ན།
བསླབ་པ་སློབ་གཉེར་འཕེལ་རྒྱས་ཡོང་གི་རེད་ཅེས་བརྗོད་ཀྱི་ཡོད། ཆོས་ཀྱི་བསླབ་པ་སློབ་གཉེར་བྱ་རྒྱུ་དེ་དགེ་འདུན་ཁོ་ནར་འགན་མ་བཞག་པར་ང་ཚོ་ཚང་མས་བྱེད་དགོས། ཕ་མ་ཆོས་བྱེད་མཁན་ཞིག་ཡིན་ན། དེའི་ཕྲུ་གུ་རང་བཞིན་གྱིས་ཆོས་ལ་བག་ཆགས་ཆེ་བ་ཡོད། ཕ་མ་ཆོས་ལ་སློབ་སྦྱོང་དང་དོ་སྣང་མེད་ན། ཕྲུ་གུར་ཡང་ཆོས་ལ་དོ་སྣང་ཡོང་གི་མ་རེད། རྒྱ་གར་ནང་ང་ཚོའི་བོད་པའི་གཞིས་ཆགས་ཀྱི་ཕྲུ་གུ་གྲྭ་སའི་ནང་སློབ་སྦྱོང་བྱེད་མཁན་ཧ་ཅང་ཉུང་ཉུང་རེད། ཕ་མ་ཚོར་དོ་སྣང་གང་ཡང་མི་འདུག ཆོས་ལ་དད་པ་བྱེད་ཀྱི་ཡོད། ཆོས་པ་སྤུས་དག་པོ་ཞིག་བྱེད་པར་སློབ་སྦྱོང་གི་གོམས་གཤིས་དང་བག་ཆགས་མེད་སྟབས། དེར་དོ་སྣང་གང་ཡང་བྱེད་ཀྱི་མི་འདུག དེར་བརྟེན་ཡུལ་སྡེའི་ནང་ཆོས་ལ་གོ་རྟོགས་དང་ཤེས་ནས་དད་པ་ཐོབ་པ་མེད་པ་ཆགས་ན། ལྟག་ཆུ་ཆད་པའི་རྫིང་བུ་ལྟ་བུ་རེད། སློབ་སྦྱོང་ཐོག་ལ་ང་ཚོ་སྐྱ་སེར་དབྱེར་གྱིས་ཤུགས་རྒྱག་དགོས།
དེ་བཞིན་ཁྱིམ་ནས་ཁྱིམ་མེད་པའི་ཚངས་སྤྱོད་ལ་རྟེན་ན། དངོས་གནས་དྲང་གནས་བཅོམ་ལྡན་ཁོང་རང་གིས་ཁྱིམ་སྤངས་ཏེ་རབ་ཏུ་བྱུང་ནས་སངས་རྒྱས་པ་རེད། ཁོང་གི་རྗེས་འབྲང་པ་ང་ཚོར་ཆ་བཞག་ན། ཁྱིམ་ནས་ཁྱིམ་མེད་པ་རབ་ཏུ་བྱུང་སྟེ་ཚངས་སྤྱོད་ཀྱི་རྟུལ་ཞུགས་ཐོག་ནས་ཆོས་བྱ་རྒྱུ་དེ་ཧ་ཅང་གལ་ཆེན་པོ་རེད། རབ་ཏུ་བྱུང་བའི་རྗེས་ལ་དཔེ་ཆ་བལྟས་ནས་དེ་དག་སྒོམ་པ་དང་ཉམས་ལེན་བྱ་རྒྱུ་ཙམ་མ་ཟད། སློབ་པ་ཐོས་བསམ་དང་སྤོང་བ་བསམ་ཏན་གྱི་སྒོ་ནས་མི་ཚེ་བསྐྱལ་དགོས་པ་རེད་མ་གཏོགས། ལུས་ལ་གྲྭ་ཆས་གྱོན་པ་དེ་ཙམ་གྱིས་ང་གྲྭ་ཡིན་བསམ་པའི་ཆོག་ཤེས་བྱས་ནས་ཐོས་བསམ་དང་སྒོམ་སྒྲུབ་མེད་ན་དེ་འདྲ་ཞིག་རེད། དེ་བཞིན་རི་ཁུག་ལུང་ཁུག་གཅིག་པུར་བསམ་བློ་མ་བཏང་བར་ཕྱོགས་ཡོངས་ནས་བསམ་བློ་བཏང་ན་མི་འབོར་དེ་ཡང་གནད་འགག་ཆེན་པོ་ཡིན། རབ་བྱུང་ཡོད་པ་དེ་དག་གིས་སྤུས་དག་པོ་ཞིག་བྱེད་དགོས། སྤུས་དག་ལ་མ་དག་མང་པོ་ཡོད་ཀྱང་བསྟན་པའི་མཚན་ཤས་བཟོ་མཁན་ཆགས་ཀྱི་རེད། མི་སྡེ་སྤྱི་ནས་སངས་རྒྱས་ཀྱི་ཆོས་ཕྲན་བུ་ཤེས་ན། དངོས་གནས་དྲང་གནས་སྤྱི་ཚོགས་ལ་ཕན་གྱི་རེད། ལྟོས་ས་ལྟོས་ཕྱོགས་ཀྱི་བོད་ནང་ཆ་བཞག་ན། བོད་རིགས་ཀྱི་ལས་བྱེད་ཕྲན་བུ་དྲག་པ་ཤོད་ཀྱི་འདུག རྒྱ་རིགས་ལས་བྱེད་ནང་ལྐོག་ཟ་རུལ་སུངས་མང་བ་དང༌། དེ་བཞིན་ཧི་མ་ཡའི་རི་རྒྱུད་ལ་ཕྲན་བུ་ཡོང་གི་འདུག ལས་རྒྱུ་འབྲས་ལ་བསམ་བློ་གཏོང་མཁན་དེ་དག་ག་ཚོད་ཀྱིས་མི་འདུག་བརྗོད་ཀྱང་ངོ་ཚ་ཁྲེལ་གཞུང་དང་ལྐོག་ཟ་རུལ་སུངས་བྱ་རྒྱུར་ཕྲན་བུ་དྲག་པ་འདུག བོད་ལ་ཡིན་རུང་དེ་དེ་བཞིན་ཡོད་པ་ལྟ་བུ་རེད། འོན་ཀྱང་དེ་རིང་ཁ་སང་མིག་ལྟོས་བྱེད་སའི་ལས་བྱེད་ནང་ལྐོག་ཟ་རུལ་སུངས་བྱེད་མཁན་མང་པོ་ཡོད་སྟབས། རིམ་བཞིན་བོད་རིགས་ནང་ལ་ལྐོག་ཟ་རུལ་སུངས་དེ་དག་སྡུག་ཏུ་འགྲོ་གི་ཡོད་པ་གོ་རྒྱུ་འདུག དེ་ཚོའི་གྲས་དེ་སྤྱི་ཡོངས་ནས་ཆོས་ལ་དད་པ་ཙམ་མ་གཏོགས་ཆོས་ཀྱི་གནད་འགག་མི་ཤེས་པ་དེ་ཧ་ཅང་འཐུས་ཤོར་རེད་འདུག དེ་བཞིན་ཆང་རྩ་བ་སྤོང་ཐུབ་མཁན་དེ་དག་གིས་སྤོང་དགོས། གལ་ཏེ་དེ་ལྟར་མ་བྱུང་ཡང་ར་བཟི་བཟི་མ་བཏུང་བར་བྱ་རྒྱུ་དེ་གལ་ཆེན་པོ་རེད། ལྷག་པར་ང་ཚོ་བོད་པ་ཚོས་རང་ཉིད་ལ་ཐོན་ཁུངས་ཡོད་པའི་འབྲུ་ཆང་དང་རྩམ་པར་དོ་སྣང་མ་བྱས་པར་སོ་སོར་ཐོན་ཁུངས་མེད་པའི་རྒུན་འབྲུམ་དང་འབྲས་ཆང་ཞེས་པ་དེ་དག་བེད་སྤྱོད་བྱས་ཀྱང་དེ་འདྲ་ཞིག་རེད། རྒྱུན་སྤྱོད་བྱ་རྒྱུ་དེ་སོ་སོའི་ས་ཆ་ནས་ཐོན་པ་དེ་དག་ཡག་གི་རེད། དཔེར་ན། ནས་རྩམ་གཟུགས་པོར་ཧ་ཅང་ཕན་པོ་ཡོད། སྔོན་མ་བོད་ལ་འགྲོ་མྱོངས་ཡོད་པའི་ཕྱི་རྒྱལ་སྨན་པ་ཟས་ཐོག་ཉམས་ཞིབ་བྱེད་མཁན་མཁས་པ་ཞིག་གིས་རྩམ་པའི་ཕན་ཡོད་ཧ་ལས་པ་ཤོད་ཀྱི་འདུག སྔོན་མ་ངོས་རང་རྒྱ་གར་དུ་སླེབས་མ་ཐག་རྩམ་པ་མ་བཟས་པ་བསྡད་པ་ཡིན། དེ་རྗེས་རྩམ་པ་མ་བཟས་ན་འགྲིག་གི་མི་འདུག་བསམས་ཏེ་ལ་དྭགས་དེ་འདྲར་སླེབས་ཏེ་རྩམ་པ་ཟ་སྐབས་གྲོད་ཁོག་ཤལ་གྱི་འདུག འོན་ཀྱང་སྡུག་རུས་བྱས་ཏེ་མགོ་སྟོད་རྩམ་པ་བསྒམས་ཏེ་རིམ་བཞིན་མང་དུ་བཏང་ནས་ད་ཆ་ངོས་རང་རྟག་ཏུ་སྤགས་ཟ་བཞིན་ཡོད། རྩམ་པ་བོད་པའི་ཁ་ལག་ཐུན་མོང་མ་ཡིན་པ་ཞིག་རེད་ལ་ལྟོ་ཆས་བཅུད་ཡོད་པ་ཧ་ཅང་ཡག་པོ་རེད། ལོ་གཅིག་ངོས་ཀྱི་ངོ་ཤེས་རྒྱ་གར་ཡོད་པ་ཁོང་རང་ཕྱི་ལོ་ ༡༩༨༠ ནང་བོད་ལ་གཉེན་འཕྲད་དུ་ཕྱིན་འདུག ཁོང་རང་རྒྱ་གར་དུ་སླེབས་རྗེས་ངོས་དང་སྐད་ཆ་བྱུང༌། ཁྱེད་རང་ལྷ་སར་གང་ཙམ་བསྡད་པ་ཡིན་ཞེས་བརྗོད་བྱུང༌། ངོས་ཀྱིས་གནས་ཚང་ནས་ཞོགས་ཟས་དང་ཉིན་གུང་ཁ་ལག་ག་རེ་སྟེར་འདུག་ཅེས་དྲིས་པས་ཞོགས་ཟས་འབྲས་ཐུག་དང་ཀྲིང་མོག་སྟེར་གྱི་འདུག་ཅེས་བརྗོད་བྱུང༌། བོད་པས་སྤགས་བཟས་ན་ཧ་ཅང་ཡག་གི་རེད། བར་སྐབས་བོད་ནས་ཁྱེར་བའི་སྲན་ཞིབ་ལ་བྲོ་བ་ཞེ་དྲག་མི་འདུག འཕྲལ་སེལ་ཐོན་འབབ་ཆེན་པོ་ཡོང་ཆེད་རྫས་ལུད་བེད་སྤྱོད་བྱ་རྒྱུ་དེ་དག་སྐྱོན་ཆེན་པོ་བརྩིས་ཀྱི་འདུག
དེ་རིང་ཁ་སང་ང་ཚོ་རྒྱ་གར་ནང་ཡོད་པའི་བོད་པའི་གཞིས་ཆགས་ཁག་ནས་རྫས་ལུད་ག་ཚོད་ཐུབ་ཐུབ་ཀྱི་བེད་སྤྱོད་བྱ་རྒྱུ་ཉུང་དུ་གཏོང་གི་ཡོད། ཕྱི་རྒྱལ་དེ་འདྲ་ལ་རྫས་ལུད་བེད་སྤྱོད་མ་བྱས་པའི་ཚལ་རིགས་དེ་དག་བཅུད་ཆེ་བ་ཡོད་པ་ཤོད་བཞིན་འདུག ལྷག་པར་དེ་རིང་ཁ་སང་བོད་ནང་ཨ་རག་ཚོད་མེད་འཐུང་གི་ཡོད་པ་གོ་རྒྱུ་འདུག་པས་དེ་ལྟར་བྱ་རྒྱུ་མེད། དེ་བཞིན་རྒྱ་གར་ནང་ཨ་རག་ཚོད་མེད་བཏུངས་ནས་མི་འཆི་བ་དེ་འདྲ་ཡོང་གི་འདུག་པས་དེ་རིགས་ལ་གཟབ་གཟབ་བྱ་རྒྱུ་གལ་ཆེན་པོ་རེད། ཅེས་བཀའ་སློབ་ཕེབས་ཡོད་པ་མ་ཟད། མི་སྐྱ་ཕོ་མོ་དགེ་བསྙེན་གྱི་སྡོམ་པ་གྲུབ་འདོད་ཡོད་མཁན་ཚོར་དགེ་བསྙེན་གྱི་སྡོམ་པ་དང་མི་མང་སྤྱི་ཡོངས་ལ་བྱང་ཆུབ་སེམ་དཔའི་སྡོམ་པ་འབོག་ཆོགས་སྩལ་ཡོད། དེ་དག་གྲུབ་མཚམས་བླ་སྤྲུལ་ཁག་དང་བོད་ནས་གསར་དུ་ཕེབས་པའི་ཆོས་ཞུ་བ། དེ་བཞིན་དུས་དབང་གི་སྦྱིན་བདག་རྣམ་པ། གནད་ཡོད་མི་སྣ་རྣམ་པ། རྒྱ་ནག ཕྱི་རྒྱལ་ཡུལ་གྲུ་ཁག་ནས་ཕེབས་པའི་ཆོས་ཞུ་བ་རྣམ་པ། དགེ་བཙུན་རྣམ་པ་བཅས་ལ་རིམ་བཞིན་དཔལ་དུས་ཀྱི་འཁོར་ལོའི་དབང་ཆེན་གྱི་དཀྱིལ་འཁོར་མཇལ་ཞུར་བཏང་ཡོད་པ་བཅས།།