༢༠༡༢  ཟླ་ ༡ ཚེས་ ༧ རེས་གཟའ་སྤེན་པ།
༄༅། །འདི་ག་བོད་ཡིག་ཚན་པའི་གསར་འགོད་པས་གནས་མཆོག་རྡོ་རྗེ་གདན་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡ ཚེས་ ༦ ཉིན་གྱི་ཕྱེད་ཡོལ་ཆུ་ཚོད་ ༡༢ ཐོག་ྋགོང་ས་མཆོག་གིས་དུས་དབང་ཐང་ཆེན་དུ་འདུས་པའི་དད་ལྡན་ཆོས་ཞུ་བ་རྣམས་ལ་ཉིན་གསུམ་པའི་སྔོན་འགྲོའི་གསུང་ཆོས་མ་སྩལ་གོང་ཁལ་མུཀ་དང་དབྱིན་ཇིའི་གནད་ཡོད་མི་སྣས་རང་རང་གི་སྐད་ནང་ཤེས་རབ་སྙིང་པོ་གསུང་འདོན་གནང་ཡོད། དེ་ནས་མགོན་པོ་གང་ཉིད་མཆོག་གིས་ཆོས་འབྲེལ་གྱི་བཀའ་སློབ་ཕེབས་དོན། ཨབ་གྷན་ན་སི་ཐན་གྱི་ས་ཆ་ཞིག་ནང་གཏེར་ཁ་སྔོག་སྐབས་ནང་པའི་གནའ་ཤུལ་ཐོན་པའི་ནང་སྒྲོལ་མའི་སྐུ་ཞིག་ཐོན་ཡོད་པའི་འདྲ་པར་ངོས་ཀྱིས་མཐོང་བྱུང༌། དེ་ལོ་ག་ཚོད་ཕྱིན་མ་ཕྱིན་ཞིབ་འཇུག་བྱེད་སྐབས་ལོ་ཉིས་སྟོང་དྲུག་བརྒྱ་ལྷག་ཕྱིན་འདུག་ཅེས་བརྗོད་ཀྱི་འདུག དེར་བརྟེན་ས་འོག་ནས་ཐོན་པ་དེ་ལོ་ཉིས་སྟོང་དྲུག་བརྒྱ་བརྒལ་བ་ཕྱིན་ཡོད་པ་བརྗོད་སྐབས་ང་ཚོ་བོད་ཀྱི་མཁས་པ་ཁག་གཅིག་གིས་བཅོམ་ལྡན་འདས་བྱོན་ནས་ལོ་གསུམ་སྟོང་གསུངས་པར་དེར་གཞི་གཅིག་ཡོད་པ་ལྟ་བུ་འདུག གང་ལྟར་ཡང་སངས་རྒྱས་བཅོམ་ལྡན་འདས་འཛམ་གླིང་འདིའི་ཐོག་བྱོན་ཡོད་པ་འཛམ་གླིང་ཡོངས་གྲགས་ཀྱི་ལོ་རྒྱུས་ནང་འཁོད་ཡོད། ད་ལྟ་ང་ཚོ་དུས་རབས་ཉེར་གཅིག་ནང་སླེབས་ཡོད། དུས་རབས་འདིའི་ནང་ཕྱི་དངོས་པོ་ཡར་རྒྱས་དང་འབྲེལ་བའི་འདུ་འཛིང་རྣམ་གཡེང་ཧ་ཅང་འཁྲུག་པོ་ཡོད་པའི་སྐབས་འདི་ལ་ཡང་སངས་རྒྱས་ཀྱི་ཆོས་ལ་གཞི་ནས་དོ་སྣང་གསར་པ་ཞིག་ཡོང་གི་འདུག སངས་རྒྱས་ཀྱི་ཆོས་བརྒྱུད་གཙོ་ཆེ་བ་གཅིག་འབར་མ་དང་། ཐེ་ལན། ཤི་རི་ལངྐ་ཡུལ་གྲུ་ཁག་དེ་དག་གིས་པཱ་ལིའི་ཆོས་བརྒྱུད་གསུང་གི་ཡོད། རྒྱ་ནག་སོགས་ཡུལ་གྲུ་ཁག་གཅིག་གིས་ལེགས་སྦྱར་ཆོས་བརྒྱུད་བྱེད་ཀྱི་ཡོད། བོད་ལ་སྔར་མཁན་སློབ་ཆོས་གསུམ་གདན་འཛོམས་པའི་སྐབས་བསྟན་པ་རྨང་གཞི་བཙུགས་གནང་བ་རེད། གནང་སྟངས་དེ་གཙོ་བོ་མཁན་ཆེན་ཞི་བ་འཚོས་འཆད་ཉན་དང་འདུལ་བའི་སྡོམ་པ་འབོགས་ཆོག་སོགས་གནང་ཡོད། ལོ་རྒྱུས་སྨྲ་བ་འགའ་ཤས་ཀྱིས་མཁན་ཆེན་ཞི་བ་འཚོ་དགུང་ལོ་བགྲེས་པོ་ཡིན་རུང་བོད་སྐད་ལ་ཐུགས་སྣང་གནང་སྟེ་བོད་སྐད་ལ་སློབ་སྦྱོང་གནང་བ་རེད་ཅེས་བཤད་སྲོལ་ཞིག་འདུག གང་ལྟར་མཁན་ཆེན་ཞི་བ་འཚོས་སློབ་སྟོན་གནང་རྒྱུར་ལེགས་སྦྱར་དང་པཱ་ལིའི་གཞུང་ནང་ཡོད་པ་དེ་དག་བོད་སྐད་ནང་བསྒྱུར་ཏེ་ཕྱིན་ཆད་ཡོངས་སུ་རྫོགས་པའི་སངས་རྒྱས་ཀྱི་བསྟན་པ་འཆད་ཉན་བྱ་རྒྱུ་དེ་བོད་སྐད་ཐོག་ནས་བྱེད་ཐུབ་པ་ཞིག་དགོས་པའི་བཀའ་གནང་བ་དེ་འདྲ་ཡང་འདུག མཁན་ཆེན་ཞི་བ་འཚོ་དཔལ་ནཱ་ལེནྡྲའི་མཁས་པའི་གཙུག་རྒྱན་གྱི་གྲས་ཆགས་ཡོད། ང་ཚོ་བོད་འབངས་བསོད་ནམས་ཀྱི་རྐྱེན་པས་མཁས་པ་དེ་འདྲ་ཞིག་ཆོས་རྒྱལ་གྱིས་གདན་འདྲེན་ཞུས་ཏེ་བོད་དུ་ཕེབས་པ་རེད། དེ་བཞིན་སློབ་དཔོན་ཐུགས་རྗེ་ཆེན་པོས་སངས་རྒྱས་ཀྱི་བསྟན་པར་འགལ་རྐྱེན་འཕྲད་པ་དེ་དག་སེལ་གནང་ཡོད། དཔལ་ནཱ་ལེནྡྲའི་པཎ་ཆེན་བཅུ་བདུན་གྱི་མཚོན་པའི་དེ་དག་ཡོངས་རྫོགས་འདུལ་བ་འཛིན་པ་ཤ་སྟག་རེད། བོད་གངས་ཅན་གྱི་ལྗོངས་ལ་སངས་རྒྱས་ཀྱི་བསྟན་པ་མཁན་ཆེན་ཞི་བ་འཚོས་གཙོ་བོ་ཐུགས་ཁུར་བསྐྱེད་དེ་ཚུགས་པ་ཞིག་རེད། དེར་བརྟེན་བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པར་པཱ་ལིའི་ཆོས་བརྒྱུད་ཡོད་པ་དང་། དེ་བཞིན་ལེགས་སྦྱར་གྱི་ཆོས་བརྒྱུད་སོགས་ཆ་ཚང་བ་ཡོད། དེ་ཡང་རྒྱ་གར་ལ་བཅོམ་ལྡན་འདས་མྱ་ངན་ལས་འདས་ཟིན་རྗེས་རིམ་པས་དཔལ་ནཱ་ལེནྡྲའི་གཙུག་ལག་སློབ་གྲྭ་ཚུགས་ནས་དེས་ལོ་བརྒྱ་ཕྲག་ཁ་ཤས་རིང་རྒྱ་གར་ལ་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་མཁན་གྱི་རྟེན་གཞི་གཙོ་བོ་ཆགས་ཡོད། དེའི་ནང་ནས་དུས་རབས་བརྒྱད་པ་དགུ་པའི་ནང་མཁས་པའི་དབང་པོ་སྐྱེས་བུ་དམ་པ་མང་པོ་ཞིག་ཐོན་ཡོད། ང་ཚོ་བོད་ལ་གཞུང་ཆེན་ལྟ་རྒྱུ་དེ་དག་ནཱ་ནྡྲའི་མཁས་པས་བརྩམས་པ་དེ་དག་ཆགས་ཡོད། ངོས་རང་ལ་ཆ་བཞག་ན་ཆུང་ཆུང་སྐབས་རྩེད་མོ་རྩེས་རྒྱུ་མ་གཏོགས་དཔེ་ཆ་ལྟ་རྒྱུ་དོ་སྣང་བྱེད་ཀྱི་མེད། འོན་ཀྱང་མངོན་རྟོགས་རྒྱན་སོགས་ཀྱི་རྩ་བ་བློར་ཟིན་པ་ཡིན། གང་ལྟར་བོད་གངས་ཅན་ལྗོངས་ཀྱི་སློབ་སྦྱོང་དེ་དག་སྤུས་དག་ཤོས་ལྟ་བུ་འདུག ངོས་རང་རྒྱ་གར་ནང་འདས་པའི་ལོ་ལྔ་བཅུ་ལྷག་གི་རིང་ལ་གོ་སྐབས་བཟང་པོ་ག་རེ་བྱུང་བ་རེད་ཅེ་ན། ལུང་པ་འདྲ་མིན་གྱི་མི་སྣ་འདྲ་མིན་ཐུག་རྒྱུ་དང་དེ་བཞིན་ཤེས་ཡོན་སྡེ་ཚན་ཁག་འདྲ་མིན་གྱི་མཁས་དབང་མང་པོ་ཐུག་རྒྱུ་བྱུང་ཡོད། གཙོ་ཆེ་ཤོས་འཛམ་གླིང་འདིའི་ཐོག་གི་ཆོས་ལུགས་ཕལ་མོ་ཆེའི་མི་ངོ་ཤེས་ཆགས་ཡོད། ནང་པའི་ཆོས་ལ་ཆ་བཞག་ན། འཛམ་གླིང་འདིའི་ཐོག་གི་ནང་པའི་ཆོས་བྱེད་མཁན་མི་སྣ་དེ་དག་ངོ་ཤེས་ཆགས་ནས་དེ་འདྲ་བྱས་ཏེ་གཏུག་ཡོང་སྐབས། ང་ཚོ་བོད་ཀྱི་སློབ་སྦྱོང་བྱེད་སྟངས་དེ་གཞུང་ཆ་ཚང་བ་སློབ་སྦྱོང་བྱས་ནས་ཡོད་པ་རེད། བོད་གངས་ཅན་ལྗོངས་ལ་ཚད་མའི་གཞུང་ལ་དམིགས་བསལ་གྱི་ཐུགས་སྣང་གནང་མཁན་ཆོས་རྗེ་ས་པཎ་གྱིས་གནང་སྟེ་དུས་ད་ལྟ་ཡིན་ནའང་འཆད་ཉན་བྱེད་ཀྱི་ཡོད། དེ་བཞིན་ཆ་པ་ཆོས་སེང་སོགས་ཀྱིས་རིགས་ལམ་གྱི་འགྲོ་སྟངས་ལ་དམིགས་བསལ་རྩལ་དོན་གནང་འདུག དེར་བརྟེན་བོད་གངས་ཅན་ལྗོངས་ལ་སློབ་གཉེར་བྱེད་སྟངས་དེ་རིགས་ལམ་དང་འབྲེལ་ནས་སློབ་གཉེར་བྱེད་སྐབས་ཕལ་ཆེར་སྤུས་དག་པོ་ཡོད་པ་ལྟ་བུ་འདུག རྒྱ་ནག་ལ་ཚད་མའི་གཞུང་འགའ་ཤས་བསྒྱུར་ཡོད་ས་རེད། གང་ལྟར་ཚད་མ་རིག་པའི་སྒོ་ནས་གཞུང་ལྟ་རྒྱུ་དེ་བོད་ལ་དར་སོ་ཆེ་ཤོས་རེད། བོད་གངས་ཅན་ལྗོངས་ཀྱི་ཆོས་བརྒྱུད་དེ་དཔལ་ནཱ་ལེནྡྲའི་ཆོས་བརྒྱུད་ཡིན་ཞེས་ངོས་ཀྱིས་རྟག་ཏུ་ཤོད་ཀྱི་ཡོད། ཕལ་ཆེར་ནང་པའི་ཡུལ་གྲུ་གཞན་དང་བསྡུར་ན་བསྟན་བཅོས་ཆེན་པོ་རྩོམ་མཁན་མཁས་པའི་དབང་པོ་བོད་གངས་ཅན་ལྗོངས་ནས་ཐོན་པ་ལྟར་ཡུལ་གྲུ་གཞན་ནས་ཨེ་ཡོད་མེད་ཡོད། དུས་ཕྱིས་སུ་ནཱ་ལེནྡྲ་ལ་ཕྲན་བུ་ཉམས་རྒུད་ཕྱིན་སྐབས་བི་ཀྲ་མ་ལ་ཤི་ལ་བྱུང་སྟེ། དུས་རབས་བཅུ་པ་དང་བཅུ་གཅིག་སྐབས་ལ་ཇོ་བོ་རྗེ་ལྷ་ཅིག་ངྷི་བམ་དཀར་ར་བོད་དུ་ཕེབས་སྐབས་བོད་སིལ་བུར་ཐོར་ཟིན་པ་རེད། གང་ལྟར་ཇོ་བོ་རྗེས་གཞུང་འཆད་ཉན་བྱ་རྒྱུ་དེ་དག་ནཱ་ལེནྡྲའི་སྔ་མའི་མཁས་པ་ཚོས་མཛད་པ་དེ་ཆགས་ཡོད། སངས་རྒྱས་ཀྱི་ཆོས་ཀྱི་ཐོག་ནས་བཤད་ན། བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་རྒྱ་ཆེ་ཤོས་ལྟ་བུ་ཆགས་ཡོད། བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་དེ་འཛམ་གླིང་གི་གཅེས་ནོར་ཆགས་ཀྱི་ཡོད་ཅེས་ངོས་ཀྱི་ཤོད་ཀྱི་ཡོད། འཛམ་གླིང་ཚང་མས་སངས་རྒྱས་པའི་ཆོས་བྱེད་དགོས་བརྗོད་ཀྱི་མེད། སློབ་སྦྱོང་བྱ་རྒྱུ་དེ་ཧ་ཅང་གལ་ཆེན་པོ་ཡིན། དེ་བཞིན་སློབ་གཉེར་བརྒྱབ་པའི་བྱས་འབྲས་དེ་ཉམས་ལེན་བྱ་རྒྱུ་གལ་ཆེན་པོ་རེད། དེ་རིང་ཁ་སང་བཙུན་མའི་ནང་ནས་དགེ་བཤེས་མ་ཐོན་རྒྱུའི་མཚམས་ལ་སླེབས་ཡོད། དགེ་སློང་མ་འདུལ་བ་གཞིར་བཟུང་འགྲོ་དགོས་པ་ཞིག་ཡིན། ལྷག་པར་བོད་ལ་བར་སྐབས་ནས་སློབ་གཉེར་བྱ་རྒྱུར་དོ་སྣང་གསར་པ་ཞིག་བྱས་པ་མ་ཟད། ས་ཁུལ་ཁ་ཤས་ལ་ས་དགེ་བཀའ་རྙིང་བོན་དང་བཅས་པ་རིས་སུ་མ་ཕྱེ་བའི་སློབ་གཉེར་བྱ་རྒྱུ་དེ་དག་ཡོང་གི་ཡོད་པ་འདྲ་ཧ་ཅང་ཡག་པོ་རེད། དེ་དང་ཆབས་ཅིག་རྒྱ་ཡི་ཆོས་གྲོགས་དང་ང་ཚོ་སུ་ཞིག་ཡིན་རུང་སངས་རྒྱས་ཀྱི་ཆོས་ལ་ཤེས་ནས་དད་པ་ཐོབ་པ་བྱེད་དགོས་པར་བརྟེན་ཤེས་པར་གོ་བར་བྱེད་དགོས། གཙོ་བོ་བོད་ནས་གསར་དུ་འབྱོར་བ་ཁྱེད་རང་ཚོ་སོ་སོའི་ས་གནས་སུ་ལོག་སྟེ་རང་ཉིད་ཀྱི་གཉེན་ཉེ་ཚོར་སློབ་གཉེར་བྱ་རྒྱུ་གལ་ཆེན་པོ་རེད་ཅེས་བརྗོད་དགོས། མི་སྐྱ་ཕོ་མོ་ཚོས་ཀྱང་ཡིན་རུང་ཡིན་གཅིག་མིན་གཅིག་དཔེ་ཆ་ལྟ་དགོས། དེ་སྔ་བོད་ལ་ཡིན་ན། དཔེ་ཆ་ལྟ་དགོས་ཞེས་ན། སྤྱིར་རབ་བྱུང་དང་དེའི་ནང་ནས་བཤད་གྲྭ་ཆེན་པོ་ནང་གི་དགེ་འདུན་པ་ཚོས་ལྟ་རྒྱུ་མ་གཏོགས་སྤྱིར་བཏང་གི་གྲྭ་པ་དེ་དག་བློ་འཛིན་བྱ་རྒྱུ་མ་གཏོགས་དཔེ་ཆ་ལྟ་མི་དགོས་པ་ལྟ་བུ་མཐོང་ཚུལ་ཡོད་པས་དེ་རྗེས་ལུས་རེད། ངེས་པར་དུ་གཞུང་ཆེན་པོ་ལྟ་རྒྱུ་གལ་ཆེན་པོ་རེད། སོ་སོས་འགུལ་བསྐྱོད་གང་ཡང་མ་བརྒྱབ་པར་སངས་རྒྱས་ཀྱི་བསྟན་པ་རྒྱས་པར་ཤོག་ཅེས་པའི་ཡོང་རྒྱུ་གང་ཡང་མེད། ལུང་རྟོགས་བསྟན་པ་དེ་བཤད་སྒྲུབ་གཉིས་ཀྱི་སྒོ་ནས་འཛིན་དགོས་པ་ཞིག་ཡིན། སངས་རྒྱས་བཅོམ་ལྡན་འདས་མྱ་ངན་ལས་འདས་ཟིན་ཏེ་སྐུས་གསུང་བྱོན་གྱི་མ་རེད། སངས་རྒྱས་བཅོམ་ལྡན་འདས་ཀྱིས་ཞལ་ཆེམས་ལྟ་བུ་བཞག་པའི་བཀའ་འགྱུར་པོ་ཏི་དེ་དག་དང་དེ་རྣམས་ལ་ཀླུ་སྒྲུབ་ཡབ་སྲས་སོགས་ཀྱིས་འགྲེལ་པ་མཛད་ཡོད་དེ་དག་ལ་ང་ཚོས་སློབ་དེབ་ལ་རྩིས་ནས་སློབ་སྦྱོང་བྱེད་དགོས་ཞེས་བཀའ་སློབ་སྩལ་ཏེ་ཆོས་འབྲེལ་འཕྲོ་སྐྱོང་དབུ་འཛུགས་མཛད་ཡོད་པ་བཅས།།