༢༠༡༢ ཟླ་ ༡ ཚེས་ ༢༤ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༡ ཚེས་ ༢༣ ཉིན་འདི་གར་ཐེ་ཝན་བོད་ཀྱི་དོན་ཁང་གིས་བཏང་གནས་ནང་འཁོད་དོན། དེ་ཉིན་རྒྱའི་ལོ་གསར་ཚེས་གཅིག་འཁེལ་བ་དང་བསྟུན་ཐེ་སྡོད་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་དང་། ས་གནས་བོད་ཀྱི་གཞོན་ནུའི་ཚོགས་གཙོ་བསྟན་འཛིན་ཆོས་འཕེལ་སོགས་ཐེ་སྡོད་བོད་མི་ཁག་གཅིག་གིས་སྦག་སྦག་བཞོན་ཏེ་ཐེ་ཝན་རྒྱལ་ས་ཐའེ་པེ་སོགས་མི་ཚོགས་མང་བའི་ཁྲོད་བོད་དོན་ངོ་སྤྲོད་ཀྱི་ལས་འགུལ་ཞིག་སྤེལ་བ་རེད། སྔ་དྲོ་ཆུ་ཚོད་ ༡༠ པའི་ཐོག་ཐེ་ཝན་རང་དབང་ཐང་ཆེན་ནས་ལས་འགུལ་འགོ་འཛུགས་གནང་བ་དང་། བོད་རིགས་ཚོགས་པའི་ཚོགས་གཞོན་སྐལ་བཟང་ལྷུན་གྲུབ་ལགས་ཀྱིས་གསར་འགོད་པར་ལས་འགུལ་འདི་སྤེལ་བའི་དགོས་དམིགས་ངོ་སྤྲོད་གནང་དོན། ཐོག་མར་རྒྱའི་ལོ་གསར་ལ་ཐེ་ཝན་མི་མང་ལ་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་ཆབས་ཅིག ང་ཚོ་བོད་པ་ཚོ་ལོ་གསར་གཏོང་ཐབས་བྲལ་བ་སྟེ། བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པ་མ་ཟད། ཕྱི་ལོ་ ༢༠༠༩ ལོ་ནས་ད་བར་བོད་མི་བཅུ་བདུན་གྱིས་བོད་བསྟན་པ་ཆབ་སྲིད་དོན་དུ་རང་གི་གཅེས་པའི་ལུས་སྲོག་མཆོད་སྦྱིན་དུ་ཕུལ་བ་དང་། ཕྱི་ལོ་ ༢༠༡༢ ལོ་གསར་པ་འཁོར་མ་འདིའི་ནང་བོད་མི་བཞི་ཡིས་ལུས་སྲོག་མཆོད་སྦྱིན་དུ་ཕུལ་བ་རྣམས་འདས་གྲོངས་སུ་གྱུར་བ་སོགས་དཔའ་བོ་དེ་དག་གི་སྙིང་སྟོབས་ལ་རྗེས་དྲན་དང་།     ཁོང་རྣམ་པའི་མངོན་འདོད་འཛམ་གླིང་མི་མང་ལ་ངོ་སྤྲོད་ཆེད་ལས་འགུལ་འདི་སྤེལ་བ་ཡིན་པའི་གནས་ཚུལ་འགྲེལ་བརྗོད་དང། ལས་འགུལ་བ་ཚོས་སྐད་གསང་མཐོན་པོས་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ། སྦག་སྦག་གི་གཡས་གཡོན་གཉིས་སུ་བོད་ཀྱི་རྒྱལ་དར་དང་། ལས་འགུལ་གྱི་འབོད་ཚིག་ཁག་དཔྱངས་ཏེ་གྲོང་ཁྱེར་ནང་སྦག་སྦག་བཞོན་ནས་ཡིག་ཆ་འགྲེམས་སྤེལ་བྱེད་པར་བསྐྱོད་ཡོད། དེ་ཉིན་གནམ་གཤིས་གྲང་ངར་ལྡན་ལ་ཆར་རླུང་ཆེ་ཡང་བོད་མི་རྣམས་ཀྱིས་དཀའ་ངལ་ལ་མ་འཛེམ་པར་ཕྱི་དྲོ་ཆུ་ཚོད་ལྔ་པ་བར་བོད་དོན་གྱི་ལས་འགུལ་སྤེལ་ཡོད་པ་བཅས།