༢༠༡༢ ཟླ་ ༡ ཚེས་ ༡༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༡ ཚེས་ ༡༦ ཉིན་རྒྱ་ནག་ཏུ་རྟེན་གཞི་བྱས་པའི་ཨ་རིའི་གཞུང་ཚབ་པ་སྐུ་ཞབས་གྷེ་རི་ལོཀ་(Gary Locke)མཆོག་གིས་པི་བྷི་ཨེ་སི་(PBS) ཞེས་པའི་ཨ་རིའི་མང་ཚོགས་བརྙན་འཕྲིན་ཁང་གི་གསར་འགོད་པ་ཅར་ལི་རོ་སི་(Charlie Rose)ལགས་ཀྱིས་དྲི་བར་ལན་འདེབས་གནང་སྐབས། ད་ལྟའི་རྒྱ་ནག་དམར་པོའི་སྲིད་གཞུང་འོག་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་ཐེར་འདོན་གནང་སྟེ་སྐྱོན་བརྗོད་ཤུགས་ཆེ་གནང་ཡོད།
དེ་བཞིན་གཞུང་ཚབ་མཆོག་གིས་སྔ་ལོ་དཀྱིལ་ཤར་ཡུལ་གྲུ་དང་བྱང་ཨ་ཕི་རི་ཁ་སོགས་ཀྱི་ནང་མང་ཚོགས་ཀྱིས་གཅིག་བསྡུས་ལམ་ལུགས་ལ་ཞི་རྒོལ་གྱི་སྒེར་ལངས་ཆེན་པོ་བྱས་པའི་དོན་རྐྱེན་བྱུང་རྗེས་རྒྱ་ནག་ཏུ་མང་གཙོའི་ལས་འགུལ་བ་དང་ཆབ་སྲིད་ཀྱི་བསམ་ཚུལ་མི་མཐུན་པའི་མི་སྣ། ཁྲིམས་རྩོད་པ་སོགས་ལ་རྒྱ་ནག་དམར་པོའི་སྲིད་གཞུང་གི་འགོ་ཁྲིད་ཚོས་དམ་བསྒྲགས་ཤུགས་ཆེ་རུ་བཏང་བ་དེ་ནི་དེང་སྐབས་འཛམ་གླིང་ཡུལ་གྲུ་གང་སར་མང་ཚོགས་ཀྱི་སྒེར་ལངས་བྱས་དང་བྱེད་མུས་ཀྱི་དོན་རྐྱེན་དེར་སེམས་འཚབ་བྱེད་བཞིན་པའི་རྣམ་པ་ཧ་ཅང་གསལ་པོ་ཡིན་པ་མ་ཟད། དེང་སྐབས་རྒྱ་ནག་ནང་དུ་དམར་པོའི་སྲིད་གཞུང་གི་དཔོན་རིགས་ཚོས་འཇིགས་སྣང་ཧ་ཅང་བྱེད་དགོས་པའི་མང་ཚོགས་སྒེར་ལངས་དཔེར་ན། སྨན་དང་འོ་མའི་བཟོ་གྲྭ་ཁག་གཅིག་གིས་འོ་མ་དང་སྨན་ནང་དུག་རྫས་བསྲེ་ལྷད་བྱས་རྗེས་བྱིས་པ་གཙོ་བོར་གྱུར་བའི་མི་མང་པོར་ནད་གཞི་ཕོག་རྐྱེན་མང་ཚོགས་ཀྱིས་ཁྲིམས་རྩོད་པ་བརྒྱུད་འབྲེལ་ཡོད་བཟོ་གྲྭའི་བདག་པོར་དྲང་བདེན་དགོས་པའི་ཁྲིམས་གཏུག་བྱེད་སྐབས། རྒྱ་ནག་སྲིད་གཞུང་གིས་ཁྲིམས་རྩོད་པ་དེ་དག་འཛིན་བཟུང་བཀག་ཉར་བྱས་ཏེ་དམ་བསྒྲགས་བྱས་ཡོད་ཅེས་གསུངས། གཞན་ཡང་བོད་དོན་དང་འབྲེལ་ནས་གསུང་དོན། གལ་ཏེ་གཏན་འཁེལ་བྱུང་བ་ཡིན་ན་ངོས་ཀྱིས་ཨ་རིའི་བོད་དོན་དམིགས་བསལ་འབྲེལ་མཐུད་མ་མཆོག་དང་གྲོས་མོལ་གྱིས་བོད་རྒྱའི་དབར་གྱི་བསམ་ཚུལ་མི་མཐུན་པ་རྣམས་སེལ་ཏེ་བོད་ཀྱི་ཆོས་དང་སྐད་ཡིག བོད་མིའི་ཐུན་མིན་ངོ་བོ་བཅས་སྲུང་སྐྱོབ་ཡོང་ཆེད་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་རྒྱ་ནག་དཔོན་རིགས་དབར་གྲོས་མོལ་གནང་རྒྱུར་འབད་བརྩོན་ཞུ་རྒྱུ་ཡིན་ཞེས་གསུངས་ཡོད་པ་བཅས།།