༢༠༡༢ ཟླ་ ༡ ཚེས་ ༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༡ ཚེས་ ༦   ཉིན་གྱི་གནས་ཚུལ་བྱུང་བ་དེའི་ནང་དགེ་འདུན་པ་གཅིག་དང་མི་སྐྱ་གཅིག་ཡོད་ཁོངས་ནས་མི་སྐྱ་དེ་འདས་གྲོངས་སུ་གྱུར་འདུག ད་ལྟའི་ཆར་བོད་མི་དེ་གཉིས་ཀྱི་ཞིབ་ཕྲའི་གནས་ཚུལ་ཤེས་རྟོགས་གང་ཡང་བྱུང་མེད། འདས་པའི་ཟླ་བ་བཅུ་གཉིས་ནང་བོད་མི་བཅུ་བཞིས་རང་ལུས་མེར་སྲེག་བཏང་བའི་གནས་ཚུལ་བྱུང་ཡོད༌། ༢༠༠༨ ལོར་བོད་ནང་ཞི་བའི་ངོ་རྒོལ་དང༌། བཙན་བྱོལ་ནང་མ་འཆི་བར་ཀྱི་ཟས་བཅད་ངོ་རྒོལ་གྱི་ལས་འགུལ་རིམ་པ་སྤེལ་བར་བརྟེན་ྋགོང་ས་ྋསྐྱབས་མགོན་ཆེན་མཆོག་གིས་ང་ཚོ་ནང་པ་ཞིག་ཡིན་པ་དང༌། མིའི་ཚེ་སྲོག་རྩ་ཆེན་ཡིན་པའི་ཆ་ནས་བོད་ཕྱི་ནང་གཉིས་སུ་འུ་ཐུགས་ཐབས་ཟད་ཀྱི་ལས་འགུལ་རིགས་མི་སྤེལ་བའི་བཀའ་སློབ་ཕེབས་ཡོད། དེར་བརྟེན་བཀའ་ཤག་ནས་ཀྱང་ྋགོང་ས་ྋསྐྱབས་མགོན་ཆེན་པོ་མཆོག་གི་བཀའ་སློབ་ཇི་ཕེབས་འདི་བཞིན་བསྐྱར་ནན་ཞུ་གི་ཡོད། དེ་བཞིན་བོད་མིའི་སྒྲིག་འཛུགས་ངོས་ནས་བོད་ནང་གི་བོད་མི་ཚོས་ངོ་རྒོལ་བྱེད་རྒྱུའི་བརྒྱུད་སྐུལ་ནམ་ཡང་བྱེད་ཀྱི་མེད། གང་ལ་ཞེ་ན། བོད་ནང་གི་བོད་མི་རྣམས་རྒྱ་གཞུང་གི་གདུག་རྩུབ་ཅན་གྱི་བྱས་འབྲས་མྱོང་གི་ཡོད་པའི་དབང་གིས་ཡིན། བོད་ནང་རང་ལུས་མེར་སྲེག་གཏོང་དགོས་ཐུག་པའི་འགན་འཁྲི་ཡོངས་རྫོགས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་གཞུང་ཁོ་ནར་ཡོད།
རྒྱ་ནག་གཞུང་གིས་འགན་ཆ་ཚང་འཁྱེར་ཏེ་བོད་དང་བོད་མིའི་ཐོག་འཕྲལ་དུ་གུ་ཡངས་སྲིད་ཀྱི་བྱུས་ལག་བསྟར་བྱེད་དགོས།