༢༠༡༢ ཟླ་ ༡ ཚེས་ ༡༠ རེས་གཟའ་མིགདམར།
༄༅། །འདི་ག་བོད་ཡིག་ཚན་པའི་གསར་འགོད་པས་གནས་མཆོག་རྡོ་རྗེ་གདན་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡ ཚེས་ ༧ ཉིན་གྱི་དགོང་དྲོ་ཆུ་ཚོད་ ༥།༣༠ ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་གོ་སྒྲིག་ཐོག་བཀའ་བློན་ཁྲི་པ་བློ་བཟང་སེང་གེ་མཆོག་གིས་སྣེ་ལེན་ཁང་གི་སྡོད་སྒུར་དུ་བོད་ནས་གསར་དུ་ཕེབས་པའི་དད་ལྡན་ཆོས་ཞུ་བ་རྣམས་ཀྱི་གཙོས་ཁྱོན་མི་གྲངས་ཁྲི་གཅིག་བརྒལ་བར་གསུང་བཤད་གནང་ཡོད།
དེ་ཡང་གོང་ཚེས་ཉིན་བཀའ་ཁྲི་མཆོག་གིེས་དབུས་ཆོས་རིག་བཀའ་བློན་མཆོག་དང་ནང་སྲིད་བཀའ་བློན་མཆོག བདེ་སྲུང་བཀའ་བློན་མཆོག དཔལ་འབྱོར་བཀའ་བློན་མཆོག ཕྱི་དྲིལ་བཀའ་བློན་མཆོག འཕྲོད་བསྟེན་བཀའ་བློན་མཆོག་བཅས་ལྷན་ཞུགས་ཀྱིས་ཐོག་མར་ཕྱི་དྲིལ་ལས་ཁུངས་ཀྱི་དྲུང་འཕར་བཀྲིས་ལགས་ཀྱིས་གསུང་བཤད་གོ་སྒྲིག་ཞུས་དགོས་པའི་རྒྱུ་མཚན་ངོ་སྤྲོད་གནང་གྲུབ་མཚམས། བཀའ་ཁྲི་མཆོག་གིས་འདིར་འདུས་མི་མང་ལ། གནས་ཁྱད་པར་ཅན་རྡོ་རྗེ་གདན་དུ་བོད་ནས་ངལ་བ་ཁྱད་བསད་ཐོག་ཕེབས་པའི་བོད་རིགས་སྤུན་ཟླ་རྣམས་ལ་ཐོག་མར་བཀའ་ཤག་ལྷན་རྒྱས་ཀྱི་ངོས་ནས་འཚམས་འདྲིའི་བཀྲིས་བདེ་ལེགས་ཞུས་པ་དང་ཆབས་ཅིག་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་མང་གཙོའི་ལམ་ནས་འོས་འདེམས་བྱས་པའི་འགོ་ཁྲིད་ལ་ཆབ་སྲིད་ཀྱི་འགན་དབང་ཡོངས་རྫོགས་གསོལ་རས་སྩལ་ཡོད་སྐོར་དང༌། དེ་བཞིན་བཀའ་ཤག་སྐབས་བཅུ་བཞི་པའི་ངོས་ནས་འབྱུང་འགྱུར་ལོ་ཉི་ཤུའི་ནང་བོད་ནང་ནས་ཁྱད་ལས་པ་འབུམ་གཅིག་ཐོན་ཐུབ་རྒྱུའི་རེ་བ་བྱེད་བཞིན་ཡོད་སྐོར་གསུངས་པ་མ་ཟད། བཙན་བྱོལ་ནང་ནས་ཁྱད་ལས་པ་ཁྲི་གཅིག་ཐོན་ཐུབ་རྒྱུའི་དམིགས་ཚད་བཟུང་ཡོད། ཕྱོགས་མཚུངས་ཉེ་ཆར་སླར་ཡང་ཨ་མདོ་རྔ་པ་ཁུལ་དུ་མི་གཉིས་ཀྱི་རང་ལུས་མེར་སྲེག་བཏང་བར་བོད་མིའི་སྒྲིག་འཛུགས་ཀྱི་བཀའ་ཤག་ལ་སེམས་འཚབ་ཡོད། འདས་པའི་ཟླ་བ་བཅུ་གཉིས་ནང་བོད་མི་བཅུ་བཞིས་རང་ལུས་མེར་སྲེག་བཏང་བའི་གནས་ཚུལ་བྱུང་ཡོད་སྐོར་སོགས་ཀྱི་གསུང་བཤད་གནང་བར་མི་མང་གིས་དགའ་བསུ་ཚད་མེད་ཞུས་ཡོད། དེ་རྗེས་སྣེ་ལེན་ཁང་གི་འགན་འཛིན་ངག་དབང་ནོར་བུ་ལགས་ཀྱིས་འདིར་འདུས་མི་མང་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུུས་ཡོད། དེ་བཞིན་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་དང་ཕྱི་དྲིལ་ལས་ཁུངས་ཀྱི་དྲུང་ཆེ་རྣམ་གཉིས་ཀྱང་ཆེད་བཅར་ཞུས་ཡོད།
ཕྱོགས་མཚུངས་ཕྱི་དྲིལ་ལས་ཁུངས་སྒྲ་བརྙན་སྡེ་ཚན་ནས་ཕྱི་ཚེས་ ༢ ནས་འགོ་འཛུགས་ཀྱིས་དད་ལྡན་ཆོས་ཞུ་བ་རྣམས་ལ་ྋགོང་ས་མཆོག་གིས་གང་ཉིད་སྐུའི་ཡང་སྲིད་སྐོར་དང་སྲོག་ཆགས་ཀུན་ལ་བྱམས་བརྩེ་སོགས་ཀྱི་གློག་བརྙན་ཁྱོན་མི་འདྲ་ཁག་བཅུ་གཅིག་དགོང་དྲོ་ཆུ་ཚོད་ ༦ པའི་ཐོག་བསྟན་དང་སྟོན་མུས་ཡིན་འདུག་པ་བཅས།
