༢༠༡༢ ཟླ་ ༡ ཚེས་ ༡༨ རེསགཟའ་ལྷག་པ།
༄༅། །ཇར་མན་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་སྐུ་ཞབས་མར་ཀོ་སི་ལོ་ནིང་(Markus Loning)མཆོག་ནས་རྒྱ་ནག་གཞུང་གིས་ད་ལྟ་བོད་ནང་དུ་འཛིན་བཞིན་པའི་སྲིད་བྱུས་དེར་བསྐྱར་ཞིབ་ཐོག་བོད་མི་ཚོར་རིག་གཞུང་དང་ཆོས་དད་རང་དབང་སྤྲོད་དགོས་པའི་རེ་འདུན་ཤུགས་ཆེ་བཏོན་ཡོད།
དེ་ཡང་ཁོང་གིས་དེང་སྐབས་བོད་མདོ་སྨད་རྔ་པ་ཀིརྟི་དགོན་པ་གཙོ་བོར་གྱུར་བའི་བོད་ཀྱི་ས་ཁུལ་ཁག་གི་ནང་དུ་བོད་མི་ཚོས་རང་ལུས་མེར་སྲེག་བསྟུད་མར་གཏོང་བཞིན་པའི་རྒྱུ་རྐྱེན་གཙོ་བོ་ནི་བོད་མི་ཚོ་ད་ལྟའི་སྲིད་བྱུས་འོག་འདོད་བློ་མི་ཁེངས་པའི་རྣམ་པ་ཤུགས་ཆེ་ཡོད་པར་བརྟེན་འ་ཆད་འུ་ཐུག་གི་གནས་སྟངས་སུ་གྱྱར་ཡོད་པ་གསལ་པོ་ཡིན་སྐོར་གསུངས་ཡོད།  གཞན་ཡང་ཁོང་གིས་རྒྱ་ནག་གཞུང་གིས་བོད་མི་ཚོར་འཛིན་བཞིན་པའི་དམ་བསྒྲགས་ཆེ་བའི་སྲིད་བྱུས་དེའི་འོག་བོད་མི་ཚོར་དཀའ་ངལ་འཕྲད་བཞིན་ཡོད་པར་བརྟེན། བོད་མི་ཚོའི་དཀའ་ངལ་དེ་སེལ་ཆེད་ངེས་པར་དུ་སྲིད་བྱུས་ལ་འགྱུར་བཅོས་བཏང་སྟེ་དམ་བསྒྲགས་འཕྲལ་མར་མཚམས་འཇོག་གིས་གུ་ཡངས་ལྡན་པའི་སྲིད་བྱུས་ལག་བསྟར་དགོས་རྒྱུ་གལ་ཆེ་ཡིན་སྐོར་སོགས་ཀྱི་རེ་འདུན་ཤུགས་ཆེ་བཏོན་ཡོད།
ཕྱོགས་མཚུངས་ཇར་མན་སྲིད་གཞུང་གིས་བོད་ནང་དུ་བོད་མི་ཚོའི་དངོས་ཡོད་གནས་ཚུལ་རྟོག་ཞིབ་ཆེད་རྒྱ་ནག་གཞུང་གིས་འགོག་རྐྱེན་གང་ཡང་མེད་པར་རྒྱལ་སྤྱིའི་གསར་འགོད་པ་དང་ཆབ་སྲིད་མི་སྣ། དེ་བཞིན་རྒྱལ་སྤྱིའི་གཞུང་འབྲེལ་མི་སྣ་ཆེད་གཏོང་དགོས་པའི་རེ་འདུན་བསྐྱར་ནན་བྱས་ཡོད་པ་བཅས།།