༢༠༡༢ ཟླ་ ༡ ཚེས་ ༥ རེས་གཟའ་ཕུར་བུ།
༄༅། འདི་ག་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། །ཕྱི་ལོ་ ༢༠༡༢ ཟླ་ ༡ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དབང་ཐང་ཆེན་དུ་སྔ་དྲོ་ཆུ་ཚོད་ ༨ པའི་ཐོག་ཕྱི་རྒྱལ་ཡུལ་གྲུ་ཁག་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་སྟོང་ཚོ་མང་པོར་ལམ་སྟོན་བཀའ་སློབ་སྩལ་དོན། ད་རེས་དུས་ཚོད་མེད་ཁར་ཁྱེད་རང་ཚོ་མང་པོ་ཞིག་འདིར་ཕེབས་ཡོད། ཁྱེད་ཚོ་དང་ལྷོད་ལྷོད་བྱས་ནས་ཐུག་རྒྱུའི་གོ་སྐབས་བྱུང་མེད་པར་བརྟེན་ཚང་མར་ངོས་ཀྱི་ཧེ་ལོ་(Hello)ཞེས་འཚམས་འདྲི་ཞུ་རྒྱུ་ཡིན། ངོས་ཀྱིས་རྒྱ་རིགས་ཆོས་གྲོགས་ཕོ་མོ་ཚོ་དང་བོད་ནས་ཕེབས་པའི་ཆོས་ཞུ་བ། དེ་བཞིན་ཧི་མཱ་ལ་ཡི་རི་རྒྱུད་ནས་ཕེབས་པའི་ཆོས་ཞུ་བ་ཚོ་དང་ཁ་སེང་ཐུག་རྒྱུ་བྱུང། ད་རིང་འདིར་འཛམ་གླིང་ཡུལ་གྲུ་འདྲ་མིན་ནས་ཆོས་ཞུར་ཕེབས་པའི་ཁྲོད་ཤི་རི་ལན་ཀ་དང་ཐའི་ལན་ཌི། ལའོ་སི། དེ་བཞིན་ཨུ་རུ་སུ་སྤྱི་མཐུན་རྒྱལ་ཁབ་ཁོངས་སུ་ཡོད་པའི་རྒྱལ་ཁབ་དེ་དག་སྲོལ་རྒྱུན་ནས་ནང་པའི་རྒྱལ་ཁབ་ཆགས་ཡོད། དེ་མིན་འདིར་རྒྱལ་ཁབ་གཞན་ནས་ཕེབས་པ་རྣམས་ཀྱི་ཕ་མེས་ཆོས་དེ་དཀྱིལ་ཤར་ཡུལ་གྲུ་ནས་དར་ཁྱབ་བྱུང་བའི་ཇིའུ་དང་ཡེ་ཤུ། དེ་བཞིན་ཁ་ཆེའི་ཆོས་ལུགས་ཡིན། ཆོས་ལུགས་དེ་དག་དཀྱིལ་ཤར་ཡུལ་གྲུ་ནས་རིམ་བཞིན་དར་འཕེལ་བྱུང་སྟེ་དེང་སྐབས་ཆོས་ལུགས་དེ་དག་འཛམ་བུ་གླིང་གི་ཆོས་ལུགས་ལྟ་བུ་ཆགས་ཡོད། ཕྱོགས་མཚུངས་ཤར་ཕྱོགས་ནས་ཀྱང་ཧིན་དུའི་ཆོས་དང་ལྷག་པར་ནང་ཆོས་དེ་དག་སྲོལ་རྒྱུན་ནས་ཨེ་ཤི་ཡའི་ཆོས་ལུགས་ཡིན་ནའང་དེང་སྐབས་འཛམ་གླིང་ནང་མི་མང་པོས་དོ་སྣང་ཆེན་པོ་བྱེད་བཞིན་ཡོད། དེར་བརྟེན་གོང་བརྗོད་འཛམ་གླིང་གི་ཆོས་ལུགས་གཙོ་ཆེ་བ་རྣམས་འགྲོ་བ་མི་རིགས་སྤྱིའི་ཆོས་ལུགས་ཆགས་ཡོད། ད་ཆ་འཛམ་གླིང་ནང་མི་འབོར་ཐེར་འབུམ་བདུན་ཡོད་པ་རྣམས་གཞི་རྩའི་ཆ་ནས་ལུས་སེམས་དང་སེམས་ཚོར་གང་གི་ཆ་ནས་འགྲོ་བ་མི་ཡིན་པ་གཅིག་མཚུངས་ཆགས་ཡོད། དེ་འདྲ་ཡིན་པའི་རྒྱུ་མཚན་གྱི་དཔེ་མཚོན་ཡོངས་གྲགས་ཤིག་བརྗོད་ན་ང་ཚོ་མའི་མངལ་ནས་བཙས་སྟངས་དང་མཐར་འཆི་སྟངས་སོགས་ལ་ཤར་ཕྱོགས་དང་ནུབ་ཕྱོགས་སོགས་ཀྱི་ཁྱད་པར་གང་ཡང་མེད། ཚང་མས་བདེ་བ་འདོད་པ་དང་སྡུག་བསྔལ་མི་འདོད་པ་ཡང་གཅིག་མཚུངས་ཤིག་ཆགས་ཡོད། འཛམ་གླིང་གི་མི་འབོར་ཐེར་འབུམ་བདུན་ཡོད་པ་རྣམས་རེ་རེར་བདེ་བ་བསྒྲུབ་རྒྱུ་དང་སྡུག་བསྔལ་སེལ་ཏེ་མི་ཚེ་བདེ་སྐྱིད་ལྡན་པ་ཞིག་འཚོལ་རྒྱུའི་ཐོབ་ཐང་ཆ་ཚང་ཡོད། ཐོབ་ཐང་དེ་དག་ང་ཚོའི་གཞི་རྩའི་ཐོབ་ཐང་ཆགས་ཡོད།
གནའ་དུས་སྐབས་བཀྲེས་སྐོམ་དང་ནད་ཀྱི་འཇིག་པ་སོགས་ཀྱིས་ཐད་ཀར་རང་ཉིད་ལ་བདེ་སྡུག་ཀྱི་ཚོར་བ་ཤུགས་ཆེན་པོ་འབྱིན་པར་བརྟེན་དཀའ་ངལ་དེ་དག་ལས་རྒྱལ་ཆེད་གཙོ་བོ་ཕྱི་དངོས་པོའི་མཐུན་རྐྱེན་ཡིན་པ་ཤེས་ཡོད། དེ་ནས་རིམ་བཞིན་མི་རྣམས་ཀྱིས་ཚན་རིག་དང་འཕྲུལ་ཆས་སོགས་ལ་བརྟེན་ནས་ཕྱི་དངོས་པོའི་མཐུན་རྐྱེན་དེ་དག་ཡར་རྒྱས་ཧ་ཅང་ཕྱིན་པ་དང་ཆབས་ཅིག་ཕྱི་དངོས་པོའི་རྣམ་གཞག་དང་འབྲེལ་བའི་ཤེས་ཡོན་གྱི་ཚད་གཞི་དེ་ཡང་ཡར་རྒྱས་ཚད་མཐོན་པོར་བསླེབས་ཡོད། དུས་རབས་ ༢༠ སྨད་ཆའི་ནང་མི་ཚེ་བདེ་སྐྱིད་ལྡན་པ་ཟེར་བ་དེ་གཙོ་ཆེ་ཤོས་སེམས་ནང་ཞི་བདེ་ཡོད་མིན་ལ་རག་ལས་ཡོད་པ་དེ་ཤེས་རྟོགས་བྱུང་ཡོད། ཕྱི་དངོས་པོའི་མཐུན་རྐྱེན་གྱི་ཆ་ནས་འབྱོར་བ་ཧ་ཅང་ཆེན་པོ་ཞིག་ཡིན་ནའང་བསམ་བློའི་ནང་འཇིགས་སྣང་དང་དངངས་སྐྲག་ཡོད་པར་བརྟེན། ཞེ་སྡང་དང་རེ་དོགས་ཀྱིས་གྲོགས་མེད་ཁྱེར་རྐྱང་དུ་ལུས་མཁན་དེ་རིགས་ཡོང་བཞིན་ཡོད། དཔལ་འབྱོར་གྱི་ཆ་ནས་མི་དེར་དངུལ་ཨ་སྒོར་ཐེར་འབུམ་མང་པོའི་བདག་པོ་ཡིནའང་སེམས་ནང་བདེ་བས་ཕོངས་པ་དེ་འདྲ་ཡོང་བཞིན་ཡོད་པ་ང་ཚོས་མཐོང་ཆོས་སུ་ཡོད། དེར་བརྟེན་དུས་རབས་ ༢༠ སྨད་ཆའི་སྐབས་ནས་རྒྱུ་མཚན་གཉིས་ཀྱི་ཐོག་ནས་ནང་བསམ་བློར་དོ་སྣང་གསར་པ་ཞིག་བསླེབས་འགོ་བཙུགས་ཡོད།
རྒྱུ་མཚན་དང་པོ་དེ་ཕྱི་དངོས་པོ་དཔལ་འབྱོར་སོགས་ཀྱི་སེམས་ནང་བདེ་བ་བསྐྲུན་རྒྱུའི་ཚབ་ཏུ་སྡུག་བསྔལ་འཕར་མ་སྐྲུན་བཞིན་ཡོད་པ་དང། རྒྱུ་མཚན་གཉིས་པ་དེ་ཚན་རིག་པས་བརྟག་དཔྱད་ཀྱི་ལམ་ནས་དེང་སྐབས་འཛམ་གླིང་ནང་ཚན་རིག་པ་གྲགས་གྲས་ཁག་གཅིག་གི་རྣམ་དཔྱོད་ཀྱི་སྩལ་ལས་སེམས་ཚོར་གྱི་རྣམ་གཞག་དེ་དག་མི་ཚེའི་ནང་བདེ་བ་བསྒྲུབ་རྒྱུར་ཧ་ཅང་གལ་ཆེན་པོ་ཆགས་ཡོད་པ་ཉམས་ཞིབ་ཐོག་ནས་རིམ་བཞིན་གསལ་རྟོགས་ཐུབ་ཡོད། མི་སྒེར་པ་གཅིག་ཡིན་ནའང་འདྲ་ནང་མི་གཅིག་ཡིན་ནའང་འདྲ། དེ་བཞིན་སྤྱི་ཚོགས་ཀྱི་གནས་བབས་གང་གི་ཆ་ནས། ལོ་ན་རྒན་གཞོན་བར་གསུམ་དང། དབུལ་ཕྱུག་བར་གསུམ་སོགས་ཀྱི་ཁྱད་གང་ཡང་མེད་པར་ཇི་སྲིད་སེམས་ནང་ཞི་བདེ་མེད་ཚེ་རང་ཉིད་ཀྱི་མི་ཚེའི་ནང་བདེ་བ་མེད་པ་དེ་ཤེས་རྟོགས་ཐུབ་པ་བྱུང་སྟེ། ད་ཆ་སྨན་གྱི་ཚན་རིག་ཉམས་ཞིབ་པ་ཚོས་སེམས་ནང་ཞི་བདེ་སྐྲུན་ཐབས་ཇི་འདྲ་ཡིན་མིན་གྱི་ཐབས་ལམ་ལ་དོ་སྣང་ཧ་ཅང་བྱེད་བཞིན་ཡོད། རྒྱུ་མཚན་དེ་དག་ལ་བརྟེན་ནས་དེང་སྐབས་མི་མང་པོ་ཞིག་དང་ལྷག་པར་ཚན་རིག་པ་མང་པོས་ནང་སེམས་དང་སེམས་ཚོར་གྱི་རྣམ་གཞག་ལ་གཞི་ནས་དོ་སྣང་གསར་པ་ཞིག་བྱེད་འགོ་བཙུགས་ཡོད་པ་མ་ཟད། ནང་ཤེས་པའི་འགྲོ་སྟངས་ལ་ཉམས་ཞིབ་བྱས་ཏེ་སེམས་ཚོར་དང་འབྲེལ་བའི་དཀའ་ངལ་དེ་དག་ལ་གདོང་ལེན་བྱ་རྒྱུའི་ཐབས་ལམ་འཚོལ་བཞིན་ཡོད། སེམས་ཀྱི་དཀའ་ངལ་གདོང་ལེན་བྱ་རྒྱུའི་ཐབས་ལམ་དེ་མྱོས་རྫས་སྤྱོད་རྒྱུའི་མཚོན་པའི་རིགས་དེ་དག་འཕྲལ་སེལ་གྱི་ཐབས་ལམ་ཞིག་ལས་ཐབས་ལམ་ངོ་མ་ཆགས་མེད། ཐབས་ལམ་ངོ་མ་དེ་ནང་གི་བསམ་བློའི་ཐོག་ནས་ཡོང་དགོས། གང་ཡིན་བརྗོད་ན་སེམས་ནང་གི་དཀའ་ངལ་མང་ཆེ་བ་སེམས་ཚོར་དང་འབྲེལ་ནས་ཡོང་བཞིན་ཡོད་པར་བརྟེན་དཀའ་ངལ་དེ་དག་སེལ་རྒྱུའི་ཐབས་ལམ་ཡང་དག་པ་དེ་ཡང་ནང་གི་བསམ་བློའི་ཐོག་ནས་ཡོང་ཐབས་བྱེད་དགོས། དེར་བརྟེན་ནང་གི་བློ་སྦྱོང་རྒྱུར་དོ་སྣང་བྱེད་མཁན་ཇེ་མང་ཇེ་མང་དུ་འགྲོ་བཞིན་ཡོད། སྐབས་འདིར་ཆོས་ཁས་ལེན་མིན་གྱི་ཁྱད་པར་གང་ཡང་མེད། རྒྱུ་མཚན་དེར་བརྟེན་ནང་ཆོས་ཀྱི་གཙོས་པའི་རྒྱ་གར་གྱི་ཆོས་ལུགས་ནང་ཞི་གནས་དང་ལྷག་མཐོང་གི་ལྟ་གྲུབ་ནང་སེམས་ཀྱི་རྣམ་གཞག་སྐོར་སློབ་སྦྱོང་བྱ་རྒྱུ་ཡོད། ནང་ཆོས་ནས་ཀྱང་དེ་དེ་བཞིན་དུ་ནང་སེམས་རྒྱུད་དང་འབྲེལ་བའི་རྣམ་གཞག་སྐོར་ལས་སྨོན་ལམ་རྒྱག་རྒྱུ་དང་འདོན་པ་འདོན་རྒྱུ་ཙམ་མིན། ནང་ཆོས་ཀྱི་ལག་ལེན་ངོ་མ་དེ་བློ་སྦྱོང་རྒྱུ་དེ་ཡིན་ཞེས་སོགས་ཀྱི་བཀའ་སློབ་སྩལ་ཡོད་པ་བཅས།།
