༢༠༡༡ ཟླ་ ༡༢ ཚེས་ ༢༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༢༦ ནས་ ༢༠༡༢ ཟླ་ ༡ ཚེས་ ༡ བར་དྷ་ཤོད་བོད་ཁྱིམ་སློབ་གྲྭར་བོད་ཀྱི་གྲོས་ཚོགས་དང་སྲིད་ཇུས་ཉམས་ཞིབ་ཁང་གིས་གོ་སྒྲིག་འོག་འཛིན་རིམ་བཅུ་གཅིག་གི་སློབ་ཕྲུག་ཚོར་བཙན་བྱོལ་བོད་མིའི་མང་གཙོ་དང་།  བོད་ནང་གི་དངོས་ཡོད་གནས་སྟངས་ངོ་སྤྲོད་ཀྱི་ཟབ་སྦྱོང་ཞིག་ཚུགས་བཞིན་ཡོད། ཟབ་སྦྱོང་ཐེངས་ ༨ པའི་སྐབས་འདིར་སློབ་གྲྭ་ཁག་ ༡༧ ནས་སློབ་ཕྲུག་བསྡོམས་ ༧༣ དང་དགེ་རྒན་གང་ཙམ་ཞིག་བཅས་མཉམ་ཞུགས་བྱས་ཡོད། དེ་ཡང་ཕྱི་ཚེས་ ༢༦ ཉིན་ཟབ་སྦྱོང་དབུ་འབྱེད་ཀྱི་མཛད་སྒོའི་སྐབས་བཀའ་བློན་ཁྲི་པ་མཁས་དབང་བློ་བཟང་སེང་གེ་མཆོག་གིས་ཤེས་ཡོན་དང་འབྲེལ་བའི་ལམ་སྟོན་གསུང་བཤད་གནང་བ་དང་། སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་ལམ་སྟོན་གསུང་བཤད། དེ་བཞིན་སྤྱི་འཐུས་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་ཚན་པ་སོ་སོའི་ལས་དོན་གནང་ཕྱོགས་སྐོར་སོགས་ངོ་སྤྲོད་གནང་ཡོད།
ཕྱི་ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་རང་དབང་ཅན་གྱི་སྡེ་ཚན་ཁག་གི་འབྲེལ་ཡོད་མཛད་གཙོ་ཁག་གཅིག་དང། ཤེས་རིག་ལས་ཁུངས་ཀྱི་ལས་བྱེད་ཁག་གཅིག་བཅས་ཀྱིས་མང་གཙོའི་ཀ་བ་གསུམ་གྱིས་སྤྱི་ཚོགས་ལ་དགེ་ཕན་ཇི་བྱུང་དང་གདོང་ལེན་བྱེད་དགོས་གང་ཡོད། མང་གཙོའི་ནང་རང་དབང་ཅན་གྱི་སྡེ་ཚན་དགོས་གལ་དང་ཕན་རླབས་ཇི་ཡོད། ཕྱི་ནང་མཐོ་སློབ་ཀྱི་སློབ་ཡོན་དང་མ་འོངས་མདུན་ལམ། མ་འོངས་པར་སོ་སོའི་དམིགས་ཡུལ་དང་མཚུངས་པའི་བོད་མིའི་སྤྱི་ཚོགས་ནང་འགན་འཁུར་བཞེས་ཕྱོགས། ཞེས་བརྗོད་གཞི་འདྲ་མིན་ཐོག་གསུང་བཤད་གནང་ཡོད།     ཕྱི་ཚེས་ ༢༨ ཉིན་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་གཡུང་དྲུང་བོན་གྱི་བྱུང་བ་སྙིང་བསྡུས་སྐོར་ངོ་སྤྲོད་གནང་བ་མ་ཟད། སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་བོད་ཀྱི་ཆོས་བརྒྱུད་ཆེན་པོ་བཞིའི་བྱུང་བ་སྙིང་བསྡུས་ངོ་སྤྲོད་གནང་ཡོད། ཕྱོགས་མཚུངས་སྐབས་དེར་སྨན་རྩིས་ཁང་གི་སྨན་རམས་པ་འཇམ་དབྱངས་སྒྲོལ་མ་ལགས་ཀྱིས་སྨན་རྩིས་ཁང་གི་ལས་དོན་ངོ་སྤྲོད་བཅས་གནང་གྲུབ་བསྟུན། ཟབ་སྦྱོང་བ་རྣམས་དབུས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིག་ཁང་དང། བཀའ་ཤག སྨན་རྩིས་ཁང་བཅས་ལ་ལྟ་སྐོར་ཁྲིད་ཡོད།
ཕྱི་ཚེས་ ༢༩ ཉིན་ཕྱི་དྲིལ་ཁོར་ཡུག་ཚན་པའི་ཉམས་ཞིབ་པ་ཚེ་རིང་དོན་གྲུབ་ལགས་ཀྱིས་བོད་དང་རྒྱལ་སྤྱིའི་ཁོར་ཡུག་གནས་སྟངས་སྐོར་དང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་འགྲོ་བ་མིའི་ཐོབ་ཐང་སྐོར་ངོ་སྤྲོད་དང།དགའ་ལྡན་གྲྭ་བག་བྲོ་ལགས་ཀྱིས་ཆབ་སྲིད་བརྩོན་པར་མནར་གཅོད་གཏོང་སྟངས་དང་ད་ལྟའི་བོད་ནང་གི་ཛ་དྲག་གནས་ཚུལ་སོགས་ངོ་སྤྲོད་གནང་རྗེས། ཟབ་སྦྱོང་བ་རྣམས་བཞུགས་སྒར་ཐེགས་ཆེན་ཆོས་གླིང་གཙུག་ལག་ཁང་དང་བོད་ཀྱི་འགྲེམས་སྟོན་ཁང་སོགས་ལ་ལྟ་སྐོར་ཁྲིད་རྒྱུ་ཡིན་འདུག
ཕྱི་ཚེས་ ༣༠ ཉིན་རྡ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་ནང་ཆོས་ཉམས་ལེན་བྱེད་ཕྱོགས་དང། བོད་ཀྱི་དཔེ་མཛོད་ཁང་གི་ངོ་སྤྲོད་གནང་རྒྱུ་ཡིན་འདུག ཕྱོགས་མཚུངས་དེ་ཉིན་ཆུ་ཚོད་ ༡༡།༣༠ ཐོག་ས་ཧཱ་ར་མཐོ་སློབ་ཀྱི་སློབ་དགེ་སྤྱི་འཐུས་བསོད་ནམས་རྒྱལ་མཚན་ལགས་ཀྱིས་ཕྱི་ལོ་ ༡༧༢༠ ནས་ ༡༩༥༩ བར་གྱི་བོད་ཀྱི་ལོ་རྒྱུས་ངོ་སྤྲོད་གནང་རྒྱུ་དང་སྤྱི་འཐུས་ཚོགས་གཙོ་མཆོག་གིས་བོད་མིའི་སྒྲིག་འཛུགས་ཀྱི་སྲིད་བྱུས་གལ་ཆེ་ཁག་ངོ་སྤྲོད་གནང་རྒྱུ་ཡིན་འདུག
ཕྱི་ཚེས་ ༣༡ ཉིན་ཕྱི་དྲིལ་ལས་བྱེད་སྐལ་ལྡན་མཚོ་མོ་ལགས་དང་མཚོ་མོ་ལགས་གཉིས་ཀྱིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡན་ལག་ལས་ཁུངས་ཁག་དང། ཡུ་རོབ་མཐུན་ཚོགས་བཅས་ཀྱི་སྒྲོམ་གཞིའི་ནང་བོད་དོན་འབྲེལ་ལམ་གནང་ཕྱོགས་སྐོར་ངོ་སྤྲོད་གནང་རྒྱུ་མ་ཟད། སྤྱི་འཐུས་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་༸གོང་ས་མཆོག་གི་མཛད་འཕྲིན་ཁག་ངོ་སྤྲོ་གནང་རྒྱུ་ཡིན་འདུག  ཕྱོགས་མཚུངས་དེ་ཉིན་ཚོགས་དྲུང་ལས་ཁུངས་ཀྱི་དྲུང་འཕར་བཀྲི་རྒྱ་མཚོ་ལགས་ཀྱིས་རྒྱ་ནག་གཞུང་དང་དམར་ཤོག་ཚོགས་པའི་སྒྲོམ་གཞི། བོད་དང་ཐད་ཀར་འབྲེལ་ཡོད་སྡེ་ཚན་ཁག་ངོ་སྤྲོད་གནང་རྒྱུ་ཡིན་འདུག གཞན་ཡང་སྐབས་དེར་འཕྲོད་བསྟེན་བཀའ་བློན་མཆོག་གིས་ནད་གཞི་སྔོན་འགོག་གི་ལམ་སྟོན་སྐོར་ངོ་སྤྲོད་ཀྱི་གསུང་བཤད་གནང་རྒྱུ་མ་ཟད། དབུས་བོད་མིའི་སྒྲིག་འཛུགས་ཀྱིས་ཊི་སྦི་དང་མྱོས་རྫས་སྐོར་གསར་སྐྲུན་གནང་བའི་གློག་བརྙན། ཀྱེ་མ་ལམ་ནོར་གྱི་སྐྱོ་གདུང། ཞེས་པ་དེ་སྟོན་རྒྱུ་ཡིན་འདུག  ཕྱི་ཚེས་ ༡ ཉིན་ཕྱི་དྲིལ་ཟུང་དྲུང་དོན་གྲུབ་རྒྱལ་པོ་ལགས་ཀྱིས་བོད་དོན་དྲིལ་བསྒྲགས་གནང་སྟངས་སྐོར་ངོ་སྤྲོད་གནང་རྒྱུ་དང། མཐར་ཟབ་སྦྱོང་ཐོག་ལེགས་སྤེལ་ཉེས་འགོག་གི་བསམ་འཆར་བསྡུ་རུབ་གནང་རྗེས་ཉིན་བདུན་གྱི་ཟབ་སྦྱོང་དང་འབྲེལ་བའི་ལས་རིམ་མཇུག་བསྡོམས་གནང་རྒྱུ་ཡིན་འདུག ཟབ་སྦྱོང་གི་ལས་གཞིའི་ནང་སློབ་ཕྲུག་རྣམས་གངས་སྐྱིད་དང་མེག་ལོར་སོགས་སུ་ཁྲིད་དེ་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་ཟུར་སྐྱོང་སྡེ་ཚན་ཁག་སོགས་ངོ་སྤྲོད་གནང་འཆར་ཡོད་པ་མ་ཟད། ཟབ་སྦྱོང་གི་ལས་རིམ་མཐའ་མར་ཕྱི་ཟླ་ ༡ ཚེས་ ༢ ནས་ ༤ བར་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་གྱི་སྙན་གྲགས་ཆེ་བའི་འགྲེམས་སྟོན་ཁང་དང་རྒྱ་གར་དབུས་གཞུང་གི་གྲོས་ཚོགས་ཀྱི་ཚོགས་ཁང་སོགས་སུ་ལྟ་སྐོར་ཁྲིད་རྒྱུ་མ་ཟད། རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་གྱི་མཐོ་སློབ་གྲགས་ཅན་ཁག་གཅིག་གི་ནང་ལྟ་སྐོར་ཁྲིད་རཊཡུ་ཡིན་འདུག ཕྱོགས་མཚུངས་ཟབ་སྦྱོང་བ་སློབ་མ་རྣམས་ནས་ཀྱང་མི་མང་ལས་འགུལ་ནང་དུ་མཉམ་ཞུགས་གནང་འཆར་ཡོད་འདུག་པ་བཅས།།