༄༅། །འདི་གར་ཕྱི་ལོ་ ༢༠༡༡ ཟླ་ ༡༡ ཚེས་ ༡༠ ཉིན་བལ་ཡུལ་མཆོད་འཇོར་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན་ལྟར་ན། བོད་མི་མང་སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་ལགས་དང་། འཇམ་དབྱངས་བཟོད་པ་ལགས་གཉིས་བལ་ཡུལ་ཁུལ་གྱི་བོད་མིའི་གཞིས་ཆགས་དང་སྒྲིག་འཛུགས་ཁག་ལ་འཚམས་གཟིགས་གྲུབ་རྗེས་ཕྱི་ལོ་ ༢༠༡༡ ཟླ་ ༧ ཚེས་ ༢༡ ཉིན་རྒྱ་གར་དུ་ཕྱིར་ལོག་ཕེབས་སྐབས་བལ་ཡུལ་ཀ་ཐ་མན་གྲུ་གནམ་ཐང་ནས་བལ་ཡུལ་ (Bhadrapur) རྦ་རྡར་སྤུར་བར་གནམ་ཐོག་བསྐྱོད་རྒྱུའི་(Budha Air)རྦུ་རྡ་གནམ་གྲུའི་ལག་འཁྱེར་ཡོད་ཀྱང་བལ་ཡུལ་གནམ་ཐང་ནང་བསྐྱོད་སྐབས་དེ་གའི་གནམ་གྲུའི་ལས་བྱེད་ནས་འཇམ་དབྱངས་བཟོད་པ་ལགས་སུ་རྒྱ་གར་གཞུང་གི་ (Liaison Office) ལེ་སེན་ལས་ཁུངས་ནས་ངོ་སྤྲོད་ཕྱག་འཁྱེར་སྤྲད་ཡོད་པ་དེ་སྟོན་སྐབས་རྩིས་མེད་ཀྱིས་ཕྱིའི་རྒྱལ་ཁབ་ཀྱི་མི་སེར་གཅིག་པའི་གནམ་གྲུའི་གླ་སྤྲོད་དགོས་བཤད་པ་དང༌། སྐབས་དེར་ཁོང་གཉིས་ཆབ་སྲིད་མི་སྣ་ལ་བརྟེན་འགོག་རྐྱེན་གཞན་འཕྲད་སྲིད་པས་གནམ་ཐང་དུ་ཕྱི་རྒྱལ་མི་རིགས་སྤྱི་མཚུངས་ཨ་སྒོར། ༡༥༧།༠༠ འབབ་བལ་སྒོར། ༡༠༩༩༠།༠༠ ཐམ་པ་སྤྲོད་དགོས་བྱུང་ཡོད། བལ་ཡུལ་དང་རྒྱ་གར་ནང་གནས་སྡོད་བོད་མི་ཚོར་བལ་ཡུལ་གྱི་ཡུལ་མི་དང་རྒྱ་གར་མི་སེར་སྤྱི་མཚུངས་གནམ་གྲུའི་གླ་ཆ་ལེན་དགོས་པ་ལས་ཕྱི་རྒྱལ་ཡུལ་མི་གནམ་གྲུའི་གླ་ཨ་སྒོར་ཐོག་ལེན་ཆོག་གི་མེད། དེར་བརྟེན་བལ་ཡུལ་མཆོད་འཇོར་ས་གནས་འགོ་འཛིན་དང་ལས་དྲུང་གཉིས་ཀྱི་རྦུ་རྡ་གནམ་གྲུའི་དབུས་ལས་ཁུངས་སུ་ངོ་བཅར་གྱིས་ཁྲིམས་དང་མི་མཐུན་པ་དང་བོད་མིར་བརྙས་བཅོས་སམ་མཐོང་ཆུང་ལྟ་བུ་བརྩི་འཇོག་གི་དངུལ་འབོར་འཕར་མ་བླངས་པ་དེ་ཁྲིམས་འགལ་ཡིན་པ་དང་བོད་མི་སྐྱབས་བཅོལ་བར་མཐོང་ཆུང་དང་བརྙས་བཅོས་བཏང་བར་གསལ་བཤད་ཡིག་ཐོག་དགོས་སྐོར་ཞུ་སྙན་ཕུལ་བར་བརྟེན། མཐར་ནོར་འཁྲུལ་ངོས་ལེན་གྱི་དངུལ་འཕར་མ་བལ་སྒོར། ༧༦༠༠།༠༠ ཕྱིར་སྤྲོད་གནང་ཡོད་པ་དང་། ཕྱིན་ཆད་དེ་འདྲའི་ནོར་འཁྲུལ་བསྐྱར་དུ་མི་ཡོང་བའི་ཆེད་འབྲེལ་ཡོད་ལས་བྱེད་ཚོར་ལམ་སྟོན་བཀོད་ཁྱབ་གནང་རྒྱུའི་ཞལ་བཞེས་གནང་ཡོད། དེར་བརྟེན་རྒྱ་གར་དང་བལ་ཡུལ་དུ་ཡོད་པའི་བོད་མི་སྐྱབས་བཅོལ་བ་ཚོ་བལ་ཡུལ་རྒྱལ་ཁབ་ནང་ཁུལ་གནམ་གྲུའི་ནང་བསྐྱོད་སྐབས་ཡུལ་མི་སྤྱི་མཚུངས་ལས་གླ་ཆ་འཕར་མ་སྤྲོད་མི་དགོས་ཞེས་བོད་མི་སེར་སྐྱ་ཡོངས་ལ་གསལ་བཤད་དང་དེ་འདྲའི་རིགས་ཀྱི་དཀའ་ངལ་འཕྲད་ཚེ་བལ་ཡུལ་མཆོད་འཇོར་ས་གནས་འགོ་འཛིན་ལས་ཁུངས་སུ་འབྲེལ་བ་གནང་འཐུས་དང༌། དཀའ་ངལ་སེལ་ཐབས་ཁྲིམས་མཐུན་རོགས་རམ་ཞུ་རྒྱུ་ཡིན་པའི་གསལ་བསྒྲགས་སུ། །