༢༠༡༡ ཟླ་ ༡༢ ཚེས་ ༡༩ རེསགཟའ་ཟླ་བ།
༄༅། །ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་སྐུ་ཞབས་ཝག་ལེབ་ཧ་བེལ་(Vaclav Havel)མཆོག་འདས་གྲོངས་སུ་གྱུར་བར་བོད་མིའི་སྒྲིག་འཛུགས་བཀའ་ཤག་གིས་དམ་པ་ཁོང་གི་ལྕམ་སྐུ་ཌག་མར་ཧབ་ལོ་ཝ་(Mrs.Dagmar Havlova)མཆོག་ལ་ཐུགས་གསོའི་གནས་འཕྲིན་ཞིག་ཕུལ་བའི་ནང་འཁོད་དོན།  བོད་མིའི་སྒྲིག་འཛུགས་བཀའ་ཤག་གིས་ཕྱི་ལོ་ ༢༠༡༡ ཟླ་ ༡༢ ཚེས་ ༡༨ རེས་གཟའ་ཉི་མའི་ཉིན་སྲིད་འཛིན་ཟུར་པ་སྐུ་ཞབས་ཝག་ལབ་ཧ་ཝེལ་མཆོག་འདས་གྲོངས་སུ་གྱུར་བར་ཧ་ཅང་བློ་ཕམ་ཆེན་པོས་གདུང་སེམས་མཉམ་སྐྱེ་ཀྱི་སེམས་གསོ་ཞུ་བཞིན་ཡོད། དམ་པ་ཁོང་འདས་གྲོངས་སུ་གྱུར་བ་དེས་བོད་མི་ཚོར་སེམས་ཐག་ཉེ་བའི་གྲོགས་པོ་ཞིག་མེད་པ་གྱུར་ཡོད། སྲིད་འཛིན་ཟུར་པ་དམ་པ་ཁོང་གིས་ཕྱི་ལོ་ ༡༩༩༠ ལོར་ཅེཀ་སྤྱི་མཐུན་རྒྱལ་ཁབ་མང་གཙོར་གྱུར་འཕྲལ་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་གདན་འདྲེན་ཞུས་པར་བོད་མི་ཚོས་དགའ་འཚོར་ཆེན་པོས་རྗེས་དྲན་ཞུ་བཞིན་ཡོད། ཕྱི་ལོ་ ༢༠༠༣ ལོར་རྒྱལ་ས་པཱ་རཱག་ནང་དུ་རྒྱལ་སྤྱིའི་བོད་དོན་རྒྱབ་སྐྱོར་གྱི་ལོ་འཁོར་ཚོགས་ཆེན་ཐེངས་བཞི་པའི་ཐོག་སྲིད་འཛིན་དམ་པ་ཁོང་སྐུ་མགྲོན་གཙོ་བོར་གདན་འདྲེན་ཞུ་རྒྱུའི་སྐལ་བཟང་གི་གོ་སྐབས་ཤིག་ང་ཚོར་ཐོབ་བྱུང།
སྐབས་དེར་ཁོང་གིས་སེམས་འགུལ་ཤུགས་ཆེ་ཐེབས་དགོས་པའི་གཏམ་བཤད་ཅིག་སྤེལ་ཡོད། སྲིད་འཛིན་ཟུར་པ་དམ་པ་ཁོང་གིས་བོད་མིའི་རང་དབང་དང་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་སྐོར་གོ་རྟོགས་རྒྱ་ཁྱབ་ཏུ་སྤེལ་རྒྱུར་གཟེངས་སུ་ཐོན་པའི་བྱས་རྗེས་ལ་བཀའ་དྲིན་རྗེས་དྲན་མཚོན་སླད།  ཕྱི་ལོ་ ༢༠༠༤ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་འཛིན་ཟུར་པ་མཆོག་ལ་བདེན་པའི་འོད་སྣང་གི་གཟེངས་རྟགས་གསོལ་རས་སྩལ་ཡོད།  བོད་མིའི་སྒྲིག་འཛུགས་བཀའ་ཤག་དང་བོད་མི་རྣམས་ཀྱིས་དུས་རྟག་ཏུ་སྲིད་འཛིན་ཟུར་པ་དམ་པ་ཁོང་གི་བཀའ་དྲིན་སྙིང་བཅངས་ཐོག་སྨོན་ལམ་གསོལ་འདེབས་ཞུ་རྒྱུ་ཡིན། ཞེས་སོགས་འཁོད་ཡོད། གནས་འཕྲིན་ངོ་མ་དབྱིན་ཡིག་ནང་ཡོད་པ་དེར་རྩ་འཛིན་ཡོང་བ་ཞུ།།