༢༠༡༡ ཟླ་ ༡༢ ཚེས་ ༢ རེས་གཟའ་པ་སངས།
ཀརྨ་དགོན།
༄༅། །འདི་གར་ཕྱི་ལོ་ ༢༠༡༡ ཟླ་ ༡༢ ཚེས་ ༢ ཉིན་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་བཏང་གནས་ནང་འཁོད་དོན། བོད་རང་སྐྱོང་ལྗོངས་ཟེར་བའི་ཁོངས་ཆབ་མདོ་ས་ཁུལ་ཆབ་མདོ་རྫོང་ཀརྨ་ཤང་ཀརྨ་དགོན་ཆེན་ནི། ཕྱི་ལོ་ ༡༡༨༦ ལོར་ཀརྨ་པ་སྐུ་ཕྲེང་དང་པོ་དུས་གསུམ་མཁྱེན་པ་མཆོག་གིས་ཕྱག་བཏབ་གནང་བ་དང་། རིག་གནས་གསར་བརྗེའི་སྐབས་རྒྱ་འཇང་ཧོར་གསུམ་གྱི་ལོ་རྒྱུས་དང་ལྡན་པ་ཡིན་ཟེར་ནས་ལྷ་ཁང་ཆུང་ཆུང་ཞིག་ལས་གཞན་ཚང་མ་གཏོར་སྐྱོན་བཏང་ཡོད་འདུག
ཕྱི་ལོ་ ༡༩༨༠ ནང་རྒྱ་ཡི་སྲིད་ཇུས་ལྷོད་སྐབས་དགོན་སྡེ་གཞན་དང་གཅིག་མཚུངས་ཞིག་གསོ་གནང་ཡོད་པ་དང་། གྲྭ་གྲངས་ ༢༠༠ ནས་ ༣༠༠ བར་དང། བཤད་སྒྲུབ་གཉིས་ལྡན། བཤད་གྲྭ་བ་ ༨༠ ཙམ་ཡོད་འདུག
ཕྱི་ལོ་ ༢༠༡༡།༡༠།༢༦ ཐོ་རངས་ཀརྨ་ཤང་དུ་འབར་རྫས་གས་གཏོར་བྱུང་བའི་གནས་ཚུལ་ཐོན་རྗེས་ཀརྨ་དགོན་དུ་དམིགས་བསལ་དམ་བསྒྲགས་ཀྱིས་འགྲུལ་བསྐྱོད་དང་བརྒྱུད་ལམ་ཡོངས་རྫོགས་བཀག་སྡོམ་བྱས་ཞིང་། རིམ་བཞིན་མཁན་པོ་རྣམ་སྲས་བསོད་ནམས་དང། མཁན་པོ་བློ་གྲོས་རབ་གསལ་གཉིས་ཀ་འཛིན་བཟུང་བྱས་པས་མ་ཚད་གྲྭ་པ་ ༧༠ ཙམ་བཀག་ཉར་བྱས་ཚུལ་འདུག
ཕྱི་ལོ་ ༢༠༡༡།༡༢།༡ ཉིན་ཀརྨ་ཤང་གྱིང་ཐང་གྲོང་སྡེ་ནས་ཡིན་པ་དེ་སྔོན་ཀརྨ་དགོན་གྱི་གྲྭ་པ་བསྟན་འཛིན་ཕུན་ཚོགས་ལགས་ཀྱིས་ཀརྨ་ཤང་དུ་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་བྱས་སྟབས་རྨས་སྐྱོན་ཤིན་ཏུ་ཚབས་ཆེན་ཕོག་ནས་གསོན་དཀའ་བའི་གནས་སུ་གྱུར་ཡོད་པ་དང། རྒྱ་དམག་གིས་འཛིན་བཟུང་བྱས་ཏེ་ཆབ་མདོར་དམག་མིའི་སྨན་ཁང་ཞིག་ཏུ་ཁྲིད་ནས་ནང་མི་གཉེན་འབྲེལ་སུ་ལ་ཡང་འབྲེལ་གཏུགས་བྱེད་བཅུག་གི་མེད་པ་རེད་འདུག
ཁོང་གིས་རང་ལུས་མེར་སྲེག་མ་བཏང་སྔོན་གྱི་ཉིན་ཤས་ནས་འབྲེལ་ཡོད་ཁག་ལ་ད་སྐབས་རྒྱ་གཞུང་གིས་ཀརྨ་དགོན་པའི་མཁན་པོ་དང་དགེ་འདུན་པ་རྣམས་འཛིན་བཟུང་བྱས་པ་དང། བོད་མིར་དམ་བསྒྲགས་ཤུགས་ཆེར་བྱེད་བཞིན་པ་འདི་དག་ལ་བཟོད་ཐབས་རྩ་བ་ནས་མེད་སྐོར་བཤད་ཡོད་འདུག
ཁོང་རང་ལོ་ ༤༦ དང་བཟའ་ཟླའི་མིང་སྒྲོལ་མ། ཕྲུ་གུ་བུ་ ༢ དང་བུ་མོ་ ༡ ཡོད་པ་དང། ཁོང་གིས་རང་ལུས་མེར་སྲེག་གཏོང་སྐབས་སྐད་འབོད་དང། ཡིག་ཆ་ཡང་བཀྲམ་ཡོད་གནས་འདུག་ཀྱང་ཞིབ་ཕྲ་ཤེས་རྟོགས་བྱུང་མེད་པ་བཅས། །
