༸གོང་ས་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་མཆོག་དང་མཇལ་འཕྲད་མཛད་པ།

གསར་ལས་ཁང་གི་གསར་འགོད་པས།

༢༠༡༡-༡༢-༡༢

༢༠༡༡ ཟླ་ ༡༢ ཚེས་ ༡༢ རེས་གཟའ་ཟླ་བ།

ཕྱི་སྲིད་བློན་ཆེན་མཆོག་དང་ལྷན།

༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༡༠ རེས་གཟའ་སྤེན་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་སྐུ་ཞབས་ཝག་ལབ་ཧ་ཝེལ་(Vaclav Havel)མཆོག་གིས་ཇི་ལྟར་གསོལ་འདེབས་ཞུས་དོན་ལྟར་རྒྱལ་ས་པ་རཱག་(Prague)ཏུ་༸ཞབས་སོར་འཁོད་ཡོད། སྐབས་དེར་༸གོང་ས་མཆོག་དང་སྲིད་འཛིན་ཟུར་པ་རྣམ་གཉིས་ཆུ་ཚོད་གཅིག་ཙམ་རིང་སྲིད་འཛིན་ཟུར་པའི་ལས་ཁུངས་སུ་མཇལ་འཕྲད་ཀྱིས་སྲིད་འཛིན་ཟུར་པ་མཆོག་ལ་མཇལ་དར་དང་བཀྲ་ཤིས་རྟགས་བརྒྱད་ཀྱི་འཁོར་ལོ་རྩིབས་བརྒྱད་གཅིག་ཀྱང་ཕྱག་རྟགས་སུ་སྩལ་ཡོད། གྲོས་མོལ་སྐབས་མགོན་པོ་གང་ཉིད་མཆོག་གིས་སླར་ཡང་སྲིད་འཛིན་ཟུར་པ་མཆོག་དང་མཇལ་འཕྲད་ཀྱི་གོ་སྐབས་བྱུང་བར་ཧ་ཅང་ཐུགས་དགྱེས་ཚོར་ཆེན་པོ་བྱུང་ཡོད་སྐོར་དང། སྲིད་འཛིན་ཟུར་པ་མཆོག་གིས་མང་གཙོ་དང་འགྲོ་བ་མིའི་ཐོབ་ཐང་།

སྲིད་འཛིན་ཟུར་པ་མཆོག་དང་ལྷན།

དེ་བཞིན་བོད་ཀྱི་གནད་དོན་བཅས་ལ་ཆོད་སེམས་བརྟན་པོས་རྒྱབ་སྐྱོར་གནང་བར་ཡི་རང་བསྔགས་བརྗོད་མཛད་པ་དང་སྦྲགས་བཀའ་སྩལ་དོན། སྐུ་ཉིད་མཆོག་ནི་ང་ཚོའི་སྙིང་སྟོབས་ཀྱི་འབྱུང་ཁུངས་ཤིག་ཆགས་ཡོད་ཅེས་བཀའ་སྩལ་བ་དང། ཕྱོགས་མཚུངས་སྲིད་འཛིན་ཟུར་པ་མཆོག་ནས་ཀྱང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཡུལ་དེར་ཆིབས་སྒྱུར་བསྐྱངས་པར་བཀའ་དྲིན་ཆེ་ཞུས་པ་མ་ཟད།

ཅེཀ་སྤྱི་མཐུན་རྒྱལ་ཁབ་ཀྱི་ཆབ་སྲིད་པ་ཚོས་ཕྲན་བུ་འཛེམས་སྲིད་ཀྱང་མང་ཚོགས་རྣམས་ཀྱིས་༸གོང་ས་ཏཱ་ལའི་བླ་མ་མཆོག་ལ་ཧ་ཅང་དགའ་མོས་ཆེན་པོ་བྱེད་བཞིན་ཡོད་སྐོར་སྙན་སྒྲོན་ཞུས་པ་མ་ཟད། སྲིད་འཛིན་ཟུར་པ་མཆོག་གིས་བོད་མིའི་ཆབ་སྲིད་ཀྱི་དབུ་ཁྲིད་འཕོ་འགྱུར་འགྲོ་བཞིན་པ་དེར་དོ་སྣང་བྱེད་བཞིན་ཡོད་པ་མ་ཟད། འགྱུར་བ་དེ་ནི་དུས་དང་འཚམ་པ་ཞིག་ཡིན་ཞེས་གསུངས་སྐབས། ༸གོང་ས་མཆོག་གིས་ཆབ་སྲིད་སྐུ་དབང་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་མཛད་པ་དེ་གཞན་གྱིས་གནོན་ཤུགས་འོག་ནས་མིན་པར་དགའ་ཞིང་སྤྲོ་ཞིང་སྤོབས་པའི་ངང་ནས་མཛད་པ་ཞིག་ཡིན་སྐོར་བཀའ་སློབ་སྩལ་བ་མ་ཟད།

ས་གནས་བོད་མི་ཚོས་ཕེབས་བསུ་ཞུ་བཞིན་པ།

བོད་ནང་གི་བོད་མི་གཞོན་སྐྱེས་ཚོར་བོད་མིའི་ལ་རྒྱ་ཧ་ཅང་ཤུགས་ཆེན་པོ་འཛིན་བཞིན་ཡོད་སྐོར་སོགས་ཀྱི་བཀའ་སློབ་སྩལ།
ཕྱི་ཚེས་ ༡༡ ཉིན་ཐོག་མར་༸གོང་ས་མཆོག་གིས་རྒྱལ་ས་པ་རཱག་གི་ཚོགས་ཁང་(Prague Congress Centre) དུ་རྙོག་འཛིང་ཆེ་བའི་འཛམ་གླིང་ནང་བདེ་སྐྱིད་འཚོལ་ཐབས།

ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་བ་དང། ཉིན་རྒྱབ་རྒྱལ་ས་པ་རཱག་གི་མགྲོན་ཁང་ཞིག་ནང་དུ་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་སྐུ་ཞབས་ཀ་རེལ་ཤ་ཝར་ཛན་བྷག་(karel Schwarzenberg)མཆོག་དང་མཇལ་འཕྲད་གྲུབ་མཚམས། བློན་ཆེན་མཆོག་གིས་སི་ཊི་ཀེ་(CTK)ཞེས་པའི་གསར་འགོད་པར་མཇལ་འཕྲད་ཀྱིས་རྒྱུན་ལྡན་ལྟར་མཛའ་བརྩེ་ལྡན་པ་ཞིག་བྱུང་བ་མ་ཟད། ཁོང་ལ་བློ་སྤོབས་སྐྲུན་ཡོད་ལུགས་བརྗོད་ཡོད།

༸གོང་ས་མཆོག་གིས་མང་གཙོ་དང་འགྲོ་བ་མིའི་ཐོབ་ཐང་སྐོར་བཀའ་སློབ་སྩོལ་བཞིན་པ།

ཐེངས་འདིའི་༸གོང་ས་མཆོག་ཅེཀ་སྤྱི་མཐུན་རྒྱལ་ཁབ་ཏུ་ཉིན་གསུམ་གྱི་མཛད་རིམ་གོ་སྒྲིག་ཞུ་མཁན་དེ་ནི་ཕ་རམ་ ༢༠༠༠(Forum 2000 Foundation)ཞེས་པའི་ཐེབས་རྩ་ཡིན་འདུག

ཕྱོགས་མཚུངས་དེ་ཉིན་ཅལ་སི་གཙུག་ལག་སློབ་ཁང་གི་སྒྱུ་རྩལ་ཚན་པའི་བསྟི་གནས་ཁང་གི་ཚོགས་ཁང་ཞིག་ཏུ་(Charles University)རྒྱ་ནག་ཐོག་བགྲོ་གླེང་ཚོགས་འདུ་ཞིག་གོ་སྒྲིག་གནང་བ་དེར་༸གོང་ས་མཆོག་ཆིབས་སྒྱུར་བསྐྱངས་ཏེ་བཀའ་སློབ་སྩལ་ཡོད། བགྲོ་གླེང་ཚོགས་འདུ་དེའི་སྐབས་ཨི་རན་གྱི་བུད་མེད་མང་གཙོ་དོན་གཉེར་བ་དང་དེ་སྔ་ནོ་བེལ་ཞི་བདེའི་གཟེངས་རྟགས་ཐོབ་མྱོང་མཁན་ལྕམ་ཤི་རིན་ཨི་བྷ་ཌི་(Shirin Ebadi)མཆོག་དང།

འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ཀྱི་སྙན་ཐོ་ཕྱོགས་སྒྲིག་གནང་མཁན་གྱི་འགན་འཛིན་ལས་རོགས་སྐུ་ཞབས་སི་ཊེ་ཕན་ཧ་སེལ་(Stephane Hessels)མཆོག་དང། རྒྱ་རིགས་མང་གཙོ་དོན་གཉེར་བ་སྐུ་ཞབས་ཅང་ཅི་ལི་བཅས་མཉམ་ཞུགས་གནང་ཡོད། བགྲོ་གླེང་ཚོགས་འདུའི་སྐབས་ཕྱག་འཁྱེར་གྱི་ཡོངས་འབབ་ཇི་བྱུང་རྣམས་བོད་མིའི་སློབ་གྲྭ་ཁག་ཏུ་ཞལ་འདེབས་གནང་རྒྱུ་ཡིན་འདུག་པ་བཅས།།

གསར་གནས།