༢༠༡༡ ཟླ་ ༡༢ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཧོན་སུར་རབ་རྒྱས་གླིང་དུ་རྟེན་གཞི་བྱས་པའི་རྒྱུད་སྨད་གྲྭ་ཚང་གི་གཙུག་ལག་ཁང་ནང་དད་ལྡན་ཆོས་ཞུ་བ་ཆིག་ཁྲི་བརྒལ་བར་མགོན་པོ་ཀླུ་སྒྲུབ་ཀྱི་རིམ་ལྔའི་འགྲེལ་པའི་ཆོས་འབྲེལ་མཇུག་སྒྲིལ་མཛད་གྲུབ་མཚམས་མགོན་པོ་གང་ཉིད་མཆོག་གིས་རྗེ་རིན་པོ་ཆེ་མཆོག་གི་གསུང་ལུང་འདྲེན་མཛད་པ་དང་འབྲེལ་བཀའ་སློབ་སྩལ་དོན། དཔལ་གསང་བའི་འདུས་པའི་རྫོགས་རིམ་ནི་རྣམ་མཁྱེན་རྒྱལ་བའི་གོ་འཕང་བསྒྲུབ་རྒྱུའི་ལམ་མཐར་ཐུག་དེ་ཡིན། ཆོས་གྲལ་དུ་བཞུགས་པ་རྣམས་ནས་བག་ཆགས་ཀྱི་ནུས་པ་ཆེན་པོ་འཇོག་ཐུབ། ད་ལྟའི་ང་ཚོས་འཆད་ཉན་བྱེད་བཞིན་པ་འདི་ནི་དཔལ་གསང་བའི་འདུས་པའི་རྫོགས་རིམ་གྱི་ལམ་བསྟན་པའི་གཞུང་ཞིག་ཡིན་སྟབས། འཆད་ཉན་བྱེད་ཐུབ་པ་དེ་ཧ་ཅང་སྐལ་པ་བཟང་པོ་རེད། མི་མང་ཚང་མས་དོན་དག་ཡོངས་སུ་རྫོགས་པ་རྟོགས་ཐུབ་རྒྱུ་ཁག་པོ་ཡིན། འོན་ཀྱང་བག་ཆགས་ཤིག་འཇོག་རྒྱུ་ཡོང་གི་རེད། དེ་བཞིན་སངས་རྒྱས་ཀྱི་གོ་འཕང་འཐོབ་རྒྱུར་གཙོ་བོ་བྱམས་སྙིང་རྗེ་བྱང་ཆུབ་སེམས་ལ་རྟེན་དགོས། སྤྱི་ཡོངས་ནས་བོད་མི་རྣམས་ཀྱིས་སྨོན་ལམ་ཚུན་ཆད་འདོན་སྐབས་ཀྱང་མ་འགྱུར་སེམས་ཅན་ཐམས་ཅད་ཅེས་བརྗོད་ནས་ཐེག་པ་ཆེན་པོའི་ཆོས་ཀྱི་བག་ཆགས་ཡོད་ནའང་ཉམས་ལེན་ཞན་པོ་ཡོད། དཔེར་ན། ཁ་ནས་སེམས་ཅན་ཐམས་ཅད་བརྗོད་བཞིན་དུ་དོན་དག་སེམས་ཅན་ལ་དམིགས་ནས་གནག་སེམས་དང་གནོད་སེམས། ཁོང་ཁྲོ། འགྲན་སེམས་ཡོང་གི་ཡོད་ལ་འཁྲུག་པ་རྒྱག་རྒྱུ་དང་། རྐུ་མ་བརྐུ་རྒྱུ། དེ་བཞིན་ཧམ་པ་ཤོད་རྒྱུ་སོགས་གཞན་ལ་གནོད་པ་བྱ་རྒྱུ་ཡོང་གི་ཡོད་པ་དེ་དག་ནི་རང་ཉིད་ལ་ཉམས་ལེན་གྱི་མ་འདང་བའི་སྐྱོན་ཡིན། མདོར་ན་ང་ཚོས་ཐེག་པ་ཆེན་པོའི་ཆོས་ཀྱི་བསླབ་བྱ་དེ་དག་ཉམས་ལེན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་བཀའ་སློབ་སྩལ་ཡོད། ཕྱེད་ཡོལ་མགོན་པོ་གང་ཉིད་མཆོག་གིས་ས་གནས་དེར་རྟེན་གཞི་བྱས་པའི་རྫོང་དཀར་ཆོས་སྡེ་དང་། ཨོ་རྒྱན་བསམ་གཏན་གླིང་དགོན་པར་གནས་གཟིགས་མཛད་ཡོད་པ་བཅས། །