༢༠༡༡ ཟླ་ ༡༢ ཚེས་ ༢༧ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༢༤ ཉིན་སྔ་དྲོ་སྤྱི་འཐུས་ཚོགས་གཙོ་མཆོག་གིས་གནས་མཆོག་རྡོ་རྗེ་གདན་དུ་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་ཆེན་ཐེངས་གཉིས་པར་གཞིས་ལུས་ཇོ་ནང་དགོན་པ་
ཁག་གཅིག་གི་སྐུ་ཚབ་དང་འཕགས་ཡུལ་ཇོ་ནང་པའི་མཁན་བརྒྱུད་རྣམ་པས་ལྷན་ཚོགས་དབུ་འབྱེད་དང་གསུང་བཤད་གནང་གྲུབ་རྗེས་ཇོ་ནང་པའི་སྐུ་ཚབ་ཁག་གཅིག་དང་ལྷན་ཁོང་ཚོའི་རེ་འདུན་བཏོན་པ་ལྟར་ཟུར་ཚོགས་གནང་། ཉིན་རྒྱབ་ཆུ་ཚོད་ ༢ ཐོག་དབུ་མའི་ལམ་ལས་འགུལ་ཁང་གི་གོ་སྒྲིག་ཐོག་གནས་མཆོག་རྡོ་རྗེ་གདན་ཞེ་ཆེན་དགོན་པའི་མེ་ཏོག་ལྡུམ་རྭའི་ནང་སྤྱི་འཐུས་ཚོགས་གཙོ་མཆོག་གིས་བོད་ནས་ཕེབས་པའི་ཆོས་ཞུ་བ་གཙོ་བོར་གྱུར་བའི་དུས་དབང་ལ་ཕེབས་མཁན་སེར་སྐྱ་མི་མང་རྣམས་ལ་གསུང་བཤད་གནང་ཡོད།
དེ་ཡང་སྤྱི་འཐུས་ཚོགས་གཙོ་མཆོག་གིས་གསུང་བཤད་གནང་དོན། ༸གོང་ས་མཆོག་གིས་ལོ་ངོ་ ༣༦༩ འཁོར་བའི་བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱི་ཆབ་སྲིད་ཐུགས་འགན་མཚམས་འཇོག་མཛད་དེ་དམངས་གཙོ་ཚད་ལྡན་ཞིག་ཏུ་སྐྱོད་ཡོད་ཅིང་། སྤྱིར་ནོར༸གོང་ས་མཆོག་གིས་ལྔ་བཅུ་ང་གྲངས་ནས་བོད་པའི་སྲིད་བྱུས་བཅོས་བསྒྱུར་གྱི་ཐུགས་འདུན་ཡོད་ཀྱང་ལེགས་འགྲུབ་བྱུང་ཐུབ་མེད། བོད་པ་བཙན་བྱོལ་དུ་འབྱོར་མ་ཐག་ཕྱི་ལོ་ ༡༩༦༠ ལོའི་ཟླ་ ༩ ཚེས་ ༢ ཉིན་ནས་བོད་མི་མང་སྤྱི་འཐུས་ལྷན་ཚོགས་འཛུགས་གནང་ཛད་ཅིང། ཕྱི་ལོ་ ༡༩༦༡ ལོར་མང་གཙོའི་རང་བཞིན་ལྡན་པའི་བོད་པའི་རྩ་ཁྲིམས་ཟིན་བྲིས་གསལ་བསྒྲགས་བསྐྱངས། བརྒྱད་ཅུ་གྱ་གྲངས་ནང་༧གོང་ས་མཆོག་གིས་བོད་པར་སྲིད་བློན་དང་། གྲོས་ཚོགས་གོང་འོག ཆབ་སྲིད་ཚོགས་པ། སྤྱི་འཐུས་མང་དུ་གཏོང་དགོས་མིན་སོགས་ལ་གོ་བསྡུར་གནང། དེ་བཞིན་ཕྱི་ལོ་ ༡༩༩༡ ལོར་བཅའ་ཁྲིམས་གཏན་འབེབས་དང་ཕྱི་ལོ་ ༢༠༠༡ ལོར་བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་བྱས་ཡོད་སྐབས་དེ་ནས་༧གོང་ས་མཆོག་གིས་ཁོང་ཕྱེད་བགྲེས་ཡོལ་ཡིན་བཀའ་སློབ་ཕེབས་ཡོད་ཅིང་། འདི་ལོའི་ཕྱི་ཟླ་ ༣ པའི་ནང་བགྲེས་ཡོལ་ཆ་ཚང་གི་ངོ་བོའི་ཐོག་ནས་ཆབ་སྲིད་ཀྱི་ཐུགས་འགན་ཡོངས་སུ་མཚམས་འཇོག་མཛད་དེ་བླ་མ་དང་བླ་བྲང་གིས་གཞུང་འཛིན་རྒྱུའི་དུས་ཚོད་ཡོལ་ཟིན་པ་དང་། མ་འོངས་པར་གནས་སྟངས་གང་འདྲ་བྱུང་ཡང་དཀའ་ངལ་མི་འཕྲད་པའི་ཆེད་ཡིན་སྐོར་ངོ་སྤྲོད་དང་། དེ་བཞིན་ད་ལྟའི་བཀའ་བློན་ཁྲི་པ་ནི་གཞུང་གི་འགན་འཛིན་རེད། མ་འོངས་པར་འགྱུར་བ་གང་འདྲ་ཞིག་གཏོང་དགོས་མིན་དེ་བོད་དུ་ལོག་རྒྱུ་བྱུང་ན་ཐག་གཅོད་མཁན་ཁྱེད་རྣམ་པ་རེད་ང་ཚོ་རྒྱ་གར་དང་ཕྱི་རྒྱལ་ཁག་ནས་སྐྱེས་བ་དག་གིས་འདི་དང་དེ་ཟེར་ནས་བཤད་ན་ཏག་ཏག་བསྡད་ཀྱི་མེད། ༸གོང་ས་མཆོག་གི་དགོངས་གཞི་ཡང་དེ་ལྟར་རེད། དེ་ཡང་དབུ་མའི་ལམ་གྱི་སྐོར་ལ། སྤྱིར་བོད་པ་ཚོའི་སེམས་སུ་སྡུག་བསྔལ་མང་པོ་ཞིག་ཡོད་ཀྱང་། བོད་པའི་དཀའ་རྙོག་སེལ་རྒྱུར་རྒྱ་ཆེ་ས་ནས་དགོངས་བཞེས་ཀྱིས་རྒྱལ་སྤྱིའི་འགྱུར་བ་དང་རྒྱ་ནག་གི་གནས་བབ། བོད་ནང་གི་དཀའ་ངལ་ཚང་མར་ཞིབ་ཚགས་ཀྱིས་བོད་པའི་དཀའ་ངལ་སེལ་རྒྱུར་རྒྱ་ནག་དང་སྐད་ཆ་མ་བཤད་པར་ཡོང་ཐབས་མེད་པར་སོང། རྒྱ་ནག་དང་སྐད་ཆ་བཤད་རྒྱུར་ཕྱོགས་གཉིས་ཀར་ཁེ་ཕན་ཡོད་པའི་ཐོག་བསམ་བློ་གཏོང་དགོས་པ། རྒྱ་ནག་གི་སེམས་འཚབ་ཆེ་ཤོས་རྒྱ་ནག་གོང་བུ་གཅིག་གྱུར་འཐོར་རྒྱུ་དེ་དང་། བོད་མིའི་སེམས་འཚབ་ཆེ་ཤོས་བོད་
ནང་རྒྱ་མིས་ཁེངས་ཏེ་བོད་པའི་ཁོར་ཡུག་དང་། ཆོས། རིག་གཞུང་གིས་མཚོན་པའི་མི་རིགས་ཀྱི་ངོ་བོ་རྩ་བརླག་ཏུ་འགྲོ་བཞིན་ཡོད་པ་དེ་ཡིན་སྟབས། རྒྱ་ནག་གི་གོང་བུ་གཅིག་གྱུར་ལ་མི་གནོད་པ་ཞིག་དང་། བོད་པའི་ཆོས་དང་རིག་གཞུང་སྲུང་སྐྱོབ་ཐུབ་པ་ཞིག་གི་ཐོག་བསམ་བློ་བཏང་སྟེ། དབུ་མའི་ལམ་བརྒྱུད་བོད་པའི་རང་སྲིད་རང་སྐྱོང་ཐོག་ཤུགས་རྒྱག་གི་ཡོད། གལ་སྲིད་ང་ཚོས་བོད་རང་བཙན་རྩོད་པ་ཡིན་ན་རྒྱ་ནག་གཞུང་དམངས་ཀྱིས་མོས་མཐུན་ཡོང་རྒྱུ་ཕར་ཞོག་རྒྱལ་སྤྱིའི་ཐོག་ནས་ཀྱང་རྒྱབ་སྐྱོར་མེད་པ་ཆགས་རྒྱུའི་ཉེན་ཁ་ཡོད་སྐོར་དང་། དེ་བཞིན་དེང་སྐབས་རྒྱ་གཞུང་གིས་དམིགས་ཡུལ་ལྡན་པའི་ཐོག་ནས་བོད་པའི་འབྲོག་པ་མང་པོ་ཞིག་གྲོང་བརྡལ་ཅན་དུ་བསྒྱུར་ཏེ་གཞོན་སྐྱེས་མང་པོ་ལས་མེད་དང་། ཆང་རག་ཐ་མག་ལ་རོལ་ཏེ་རྒྱན་འཛུགས་ཤོ་རྒྱག་ཁྱབ་གདལ་ཆེན་པོ་ཆགས་ཏེ་རེ་ཟུང་རྒྱན་འཛུགས་ཤོ་རྒྱག་གིས་རྒྱུ་དངོས་རྫོགས་ཏེ་འཁོན་འཛིང་བྱེད་པ་སོགས་ཀྱི་གནས་སྟངས་ཐབས་རྡུག་སྣ་ཚོགས་འབྱུང་བཞིན་ཡོད་པ་དེ་དག་ནི་རྒྱ་ནག་གི་སྲིད་ཇུས་ངན་པའི་དམིགས་ཡུལ་སྒྲུབ་བཞིན་ཡོད་པས་དེ་ལ་དགོངས་པ་བཞེས་དགོས་ཚུལ་དང་། དེ་བཞིན་བོད་ནང་ཛ་དྲག་གི་གནས་སྟངས་དང་འབྲེལ་བའི་ཐོག་ནས་རྒྱལ་སྤྱིའི་ནང་བཀའ་སྤྱི་གཉིས་ཀྱི་ལས་འགུལ་ཇི་སྤེལ་སོགས་ཀྱི་སྐོར་གསུང་བཤད་གནང་གྲུབ་རྗེས། དབུ་མའི་ལམ་མི་མང་ལས་འགུལ་ཁང་གི་འགན་འཛིན་གཞོན་པ་སྤྱི་ཟུར་ཡོན་ཏན་རྒྱ་མཚོ་ལགས་ཀྱིས་ཐུགས་རྗེ་ཆེ་ཞུས་ཡོད་པ་བཅས།།
