༢༠༡༡ ཟླ་ ༡༢ ཚེས་ ༡༥ རེས་གཟའ་ཕུར་བུ།
༄༅། །འདི་གར་ཤེས་རིགས་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༡ ཚེས་ ༢༨ ཉིན་ཧར་སྤར་པུར་དུ་རྟེན་གཞི་བྱས་པའི་ཟླ་བ་རིན་འབྱུང་(Dawa Rinjue School Society,Herbertpur,Dehradun) སློབ་གྲྭའི་འགན་འཛིན་སྐུ་ཞབས་བསོད་ནམས་དབང་འདུས་ལགས་སུ་རྒྱ་གར་སྒེར་གྱི་སློབ་གྲྭའི་སྤྱི་མཐུན་ཚོགས་པ་(Independent School`s Federation Of India)ནས་ཕྱི་ལོ་ ༢༠༡༠ །༢༠༡༡ ལོའི་ཤེས་ཡོན་ཐོག་ཕུལ་བྱུང་ཞབས་འདེགས་བསྒྲུབས་པའི་བྱ་དགའ་གསོལ་རས་གནང་ཡོད་འདུག དེ་ཡང་སྐུ་ཞབས་བསོད་ནམས་དབང་འདུས་ལགས་ལ་བྱ་དགའ་དེ་བཞིན་རྒྱ་གར་དབུས་གཞུང་ཤེས་རིག་་ལས་ཁུངས་ཀྱི་རྒྱུན་ལས་ཚོགས་གཙོ་དང་གྲོས་ཚོགས་ཀྱི་འཐུས་མི་གཅིག་ལྕོགས་སྐུ་ཞབས་ཨོ་སི་ཀར་ཕར་ནི་ཌེ་སི་ (Shri.Oscar Fernandes) ལགས་ཀྱིས་གནང་ཡོད། སྐབས་དེར་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་ཚོགས་གཙོ་སྐུ་ཞབས་ཝི་ནིཏ་ཇོ་ཤི་(Shri Vineet Joshi) ལགས་ཀྱང་ཕེབས་ཡོད། སྐུ་ཞབས་བསོད་ནམས་དབང་འདུས་ལགས་ནི་ཟླ་བ་རིན་འབྱུང་སློབ་གྲྭའི་འགན་འཛིན་ཡིན་ཞིང། སློབ་གྲྭ་དེ་ཨུཏྟར་ཁཎྜ་མངའ་སྡེའི་ཧར་སྤར་པུར་ས་གནས་སུ་ཡོད་ལ། ཕྱི་ལོ་ ༡༩༩༡ ལོར་བཙུགས་པའི་སྒེར་གྱི་སློབ་གྲྭ་ཞིག་ཡིན། སློབ་གྲྭ་དེ་འགོ་འཛུགས་སྐབས་སློབ་ཕྲུག་ ༡༢ དང་དགེ་ལས་གསུམ་ལས་མེད་ཀྱང་ད་ཆ་སྔོན་འགྲོ་ནས་འཛིན་རིམ་བཅུ་པའི་བར་སློབ་མ་གྲངས་ ༧༠༠ དང་དགེ་ལས་གྲངས་ ༢༠ ཡོད་འདུག སློབ་གྲྭ་དེའི་ནང་སློབ་ཕྲུག་ཕལ་མོ་ཆེ་ས་གནས་ཡུལ་མི་ཡིན་འདུག་པ་བཅས།།