༢༠༡༡ ཟླ་ ༡༢ ཚེས་ ༢ རེས་གཟའ་པ་སངས།
༄༅། །དེང་སྐབས་བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་སེང་གེ་མཆོག་དབྱིན་ཡུལ་ཁུལ་དུ་གཞུང་དོན་ཕྱོགས་ཕེབས་སྐབས་དང་བསྟུན། ཕྱི་ལོ་ ༢༠༡༡ ཟླ་ ༡༡ ཚེས་ ༣༠ ཉིན་བྷི་བྷི་སི་གསར་འགྱུར་བརྙན་འཕྲིན་བརྒྱུད་ལམ་གྱི་གསར་འགོད་པ་མི་ཤལ་ཧུ་སེན་གྱིས་ཨེ་ཤི་ཡའི་ལས་རིམ་ཨིམ་ཕེག་ཊི་ཨི་ཤི་ཡ་(Impact Asia)ཞེས་པའི་ལེ་ཚན་ཐོག  བཀའ་ཁྲི་བློ་བཟང་སེང་གེ་མཆོག་དང་དྲི་བ་དྲིས་ལན་གྱི་ལེ་ཚན་དེ་རྒྱ་ནག་གི་རྒྱལ་ས་པེ་ཅིང་དུ་དགོང་དྲོའི་ཆུ་ཚོད་ ༩།༣༠ ཙམ་ལ་བྷི་བྷི་སི་བརྙན་འཕྲིན་བརྒྱུད་སྟོན་སྐབས་གློ་བུར་དུ་རྒྱ་ནག་གཞུང་གིས་དམ་བསྒྲགས་བྱས་རྐྱེན་བརྙན་འཕྲིན་ནང་གང་ཡང་མ་གསལ་བར་ནག་ཐོམ་མེར་གྱུར་ཡོད། འོན་ཀྱང་པེ་ཅིང་མི་མང་ཚོས་བཀའ་ཁྲི་མཆོག་ཁྱུག་ཙམ་མཐོང་ཐུབ་ཡོད། སྐབས་དེར་བཀའ་ཁྲི་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་མང་ཚོགས་ཀྱིས་འོས་འདེམས་བྱས་པའི་བཀའ་བློན་ཁྲི་པར་རྩིས་སྤྲོད་མཛད་ཚུལ་དང། གཞིས་ལུས་བོད་མི་ཚོས་རང་ལུས་མེར་སྲེག་བཏང་བའི་དོན་རྐྱེན། དེ་བཞིན་རྒྱ་ནག་གི་དཔལ་འབྱོར་སྟོབས་ཤུགས་འཕེལ་རྒྱས་འགྲོ་བཞིན་པར་བརྟེན།  བོད་ཀྱི་གནད་དོན་སེལ་རྒྱུའི་རེ་བ་ཡོད་སྐོར་སོགས་ཀྱི་ཐོག་གསལ་བཤད་གནང་ཡོད། དེ་རྗེས་བཀའ་ཁྲི་མཆོག་གིས་རྒྱ་ནག་གཞུང་གྱིས་བྱེད་ཕྱོགས་ལ་འགྲེལ་བརྗོད་གནང་དོན། བྱེད་སྟངས་དེ་ནི་བོད་ཀྱི་དངོས་ཡོད་དཀའ་ངལ་ལ་རྒྱ་ནག་གཞུང་གིས་འཇིགས་སྣང་བྱེད་བཞིན་པ་དང་བོད་ཀྱི་གནད་དོན་དེ་བཞིན་འཛམ་གླིང་ཕྱི་ཙམ་མ་ཟད། རྒྱ་ནག་རང་ཉིད་ཀྱི་མང་ཚོགས་ལའང་བོད་ཀྱི་གནད་དོན་ཟེར་བ་ཞིག་མེད་ཁུལ་གྱིས་སྦས་གསང་བྱ་རྒྱུའི་རྣམ་འགྱུར་བསྟན་ཡོད་པ་ཧ་ཅང་གསལ་པོ་རེད་ཅེས་གསུངས་ཡོད།།