༢༠༡༡ ཟླ་ ༡༢ ཚེས་ ༢༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༢༡ རེས་གཟའ་ལྷག་པའི་ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཨུ་རུ་སྤྱི་མཐུན་རྒྱལ་ཁབ་ཀྱི་ཐུ་ཝ་མངའ་སྡེའི་མཐོ་རིམ་སློབ་གྲྭས་ (Tuva State University) ༸གོང་ས་༸སྐྱབས་མགོན་ཆེན་པོ་མཆོག་ལ་གཙུག་ལག་སློབ་དཔོན་ཆེན་མོའི་མཁས་དབང་གི་ཕྱག་འཁྱེར་ (Professor Emeritus) འབུལ་ལམ་ཞུས་ཡོད།
སྐབས་དེར་ཁལ་མུཀ་ནང་བསྟན་གཙོ་འཛིན་ཏེ་ལོ་རིན་པོ་ཆེ་མཆོག་གིས་གསུང་བཤད་གནང་དོན། དེ་རིང་ཨུ་རུ་སུ་ནང་པ་ཚང་མའི་ཚབ་བྱས་ནས་ཐོག་མའི་འཆར་གཞི་ལ་ང་ཚོས་ལོ་གསུམ་གྱི་རིང་ལ་བཀའ་དབང་ཞུ་རྒྱུ་བྱས་པ་དེ་དེ་རིང་མཇུག་སྒྲིལ་བ་རེད། འོན་ཀྱང་ང་ཚོས་འདས་པའི་ལོ་གཉིས་རིང་ཆོས་ཞུ་བའི་གྲངས་འབོར་ལ་གཞིགས་ཚེ་མང་དུ་ཕྱིན་ཡོད། ཕན་ཐོགས་ཆེན་པོ་ཡོད་པའི་རྣམ་པ་འདུག དེར་བརྟེན་ངས་འདིར་འཁོད་ཆོས་ཞུ་བ་ཚང་མའི་ཚབ་ཞུས་ཏེ་བཀའ་ཆོས་མུ་མཐུད་གནང་སྐྱོང་ཡོང་རྒྱུའི་སྐྱབས་འཇུག་ཞུ་རྒྱུ་ཡིན་ཞེས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་ཡོད། ཅེས་ཞུས་རྗེས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། སྔ་མོ་ངོས་རང་ཐུ་ཝ་ལ་གཅིག་བསླེབས་པ་རེད། སྐབས་དེར་འགྱུར་བ་ཕྱིན་འཕྲལ་རེད། དེ་དུས་ཐུ་ཝའི་ནང་ལ་དངོས་གནས་རང་སྔ་མོ་བོད་དང་དམིགས་བསལ་ཐུན་མོང་མིན་པའི་འབྲེལ་བ་ཡོད་པའི་བག་ཆགས་དང་དད་པ་དམ་ཚིག་གི་འབྲེལ་བ་དམིགས་བསལ་ཡོད་པ་དེ་ཧ་ཅང་གསལ་པོ་རེད་འདུག སྐབས་དེའི་སྲིད་འཛིན་དེ་ཡང་ཧ་ཅང་ཡག་པོ་ཡོད། དེའི་རྗེས་སུ་ངོས་རང་ཨུ་རུ་སུའི་ས་ཁོངས་སུ་བར་སྐབས་འགྲོ་རྒྱུ་མ་བྱུང་བ་རེད། ད་ལྟ་རིན་པོ་ཆེས་བཤད་པ་ལྟར་ཆབ་སྲིད་ཀྱི་གནས་སྟངས་འོག་ནས་འགྲོ་ཐུབ་མེད་ཀྱང་ཐུ་ཝ་ས་ཁུལ་གཙོ་བོར་གྱུར་བའི་འདིར་ཁལ་མུཀ་དང་བྷུར་ཡ་ནས་དད་པ་ཅན་ཧ་ལམ་རྒྱུན་མ་ཆད་པར་ཡོང་གི་ཡོད། ལྷག་པར་ལོ་ཤས་རིང་ལ་ཆོས་འབྲེལ་བྱ་རྒྱུ་བྱུང་བ་རེད། དེ་རིང་འདིར་ཐུ་ཝ་གཙུག་ལག་སློབ་གྲྭ་ཆེན་མོའི་ཐོག་ནས་ངོས་ལ་མཁས་པའི་བྱ་དགའ་ཞིག་གོ་སྒྲིག་གནང་བ་རེད། ཐུགས་རྗེ་ཆེ་ཞུ་གི་ཡིན། རིན་པོ་ཆེས་གསུངས་པ་བཞིན་འདས་པའི་ལོ་འགའ་ཤས་དེའི་ནང་གི་ཉམས་མྱོང་ལ་གཞིགས་ན་སངས་རྒྱས་པའི་ཆོས་ལ་དོ་སྣང་བྱེད་རྒྱུ་དེ་ཇེ་ཆེ་ཇེ་ཆེར་འགྲོ་བཞིན་ཡོད་པ་དེ་ཧ་ཅང་གསལ་པོ་རེད། ས་ཐག་རིང་པོ་དེ་ནས་འདིར་ཡོང་བ་ལས་སླ་པོ་ཞིག་མེད། ཕྱོགས་གཅིག་ནས་ས་ཐག་རིང་པོ་དང་གཉིས་ནས་ལམ་གྲོན་འགྲོ་ཡི་ཡོད། དཀའ་ངལ་དེ་དག་གདོང་ལེན་བྱས་ནས་འདིར་ཡོང་གི་ཡོད། ཚང་མས་དོ་སྣང་བྱེད་སྐབས་གང་ལྟར་ངོས་རང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག དེའི་ནང་ནས་བྱང་ཆུབ་སེམས་ལ་མོས་པ་རྩེ་གཅིག་ཡོད་མཁན་ཞིག་གིས་ངོས་ནས་གཞན་ལ་ཕན་པ་བྱུང་ན་སྲོག་འཚོ་བའི་དགོས་དོན་ཚང་བ་རེད། ངོས་ཀྱིས་རྒྱུན་དུ་རང་གི་ལུས་ངག་ཡིད་གསུམ་གཞན་ལ་བདེ་བའི་རྐྱེན་དུ་འགྱུར་བ་ཞིག་ཡོང་བར་ཤོག་ཅེས་སྨོན་ལམ་རྒྱག་གི་ཡོད། འདིར་དངོས་སུ་ཁྱེད་ཚོས་དཀའ་ངལ་མང་པོ་ཁྱད་དུ་གསད་དེ་ཡོང་སྐབས་ངོས་ཀྱིས་ཁྱེད་ཚོར་ཕན་པ་བསྒྲུབ་རྒྱུ་དེ་ནང་པའི་དགེ་སློང་ཞིག་ཡིན་པའི་ངོས་ནས་འགན་ཞིག་ཀྱང་ཡོད། ལྷག་པར་ཐེག་པ་ཆེན་པོའི་བྱང་ཆུབ་ཀྱི་སེམས་ལ་བློ་སྦྱོང་མཁན་ཞིག་གི་ངོས་ནས་ལས་འགན་ཆགས་པར་བརྟེན། དགའ་ཞིང་སྤྲོ་ཞིང་ཆོས་འབྲེལ་བྱ་རྒྱུའི་ཁས་ལེན་གཙང་མ་ཡོད། བློ་བདེ་པོ་བྱས་ནས་བཞུགས། ཞེས་བཀའ་སློབ་སྩལ།
དེ་ཡང་༸གོང་ས་མཆོག་ལ་མཁས་དབང་གི་ཕྱག་འཁྱེར་དེ་བཞིན་འབུལ་ལམ་ཞུ་དགོས་དོན་གཙོ་བོ་ནི། མགོན་པོ་གང་ཉིད་མཆོག་གིས་ད་བར་སྐུ་ཚེ་ཧྲིལ་པོའི་རིང་ཚན་རིག་དང་འགྲོ་བ་མིའི་བཟང་པོའི་རིན་ཐང། ཆོས་ལུགས་མཐུན་སྒྲིལ། འགྲོ་བ་མིའི་རང་དབང་དང་ཁོར་ཡུག་སྲུང་སྐྱོབས་ཀྱི་གནད་དོན་ཐད་གཟེངས་སུ་ཐོན་པའི་མཛད་པ་རླབས་ཆེ་བསྐྱངས་དང་སྐྱོང་མུས་ཡིན་པར་བརྟེན་མཁས་དབང་གི་ཕྱག་འཁྱེར་དེ་བཞིན་འབུལ་ལམ་ཞུས་པ་ཞིག་ཡིན་འདུག་པ་བཅས།།
