༢༠༡༡ ཟླ་ ༡༢ ཚེས་ ༢ རེས་གཟའ་པ་སངས།
༄༅།  འདི་གར་ཀོ་ལེ་གྷལ་དོན་ལྡན་གླིང་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། དེ་ཡང་ས་གནས་འཕྲོད་བསྟེན་སྨན་ཁང་དང་ས་གནས་འགོ་འཛིན་ལས་ཁང་གི་ཁྱབ་ཁོངས་ནང་མི་བདེ་དོན་ལས་གཞི་ཁང་ཐུན་མོང་གིས་གོ་སྒྲིག་འོག་ཕྱི་ལོ་ ༢༠༡༡ ཟླ་ ༡༢ ཚེས་ ༡ ཞོགས་པ་ཆུ་ཚོད་ ༩་༣༠ ཐོག་གཞིས་ཆགས་ཀྱི་ཚོགས་ཁང་ཆེན་མོའི་ནང་ས་གནས་འགོ་འཛིན་དང༌། འཕྲོད་བསྟེན་སྨན་ཁང་གི་འགན་འཛིན༌། ས་གནས་འཕྲོད་བསྟེན་སྨན་པ། ས་གནས་སྨན་རྩིས་ཁང་གི་སྨན་པ་རྣམ་གཉིས། འབྲེལ་ཡོད་ལས་བྱེད། མང་ཚོགས་བཅས་མི་གྲངས་བརྒྱ་སྐོར་ཙམ་ཞིག་མཉམ་འཛོམས་ཀྱིས་ཐོག་མར་ས་གནས་འཕྲོད་བསྟེན་སྨན་ཁང་གི་འགན་འཛིན་ལྷག་པ་ཚེ་རིང་ལགས་ཀྱིས་འཛམ་གླིང་གཉན་ནད་རེག་དུག་ཉིན་མོའི་ངོ་སྤྲོད་གསུང་བཤད་གནང་རྗེས་ས་གནས་འགོ་འཛིན་ཀརྨ་སེང་གེ་ལགས་ཀྱིས་དཔལ་ལྡན་འཕྲོད་བསྟེན་བཀའ་བློན་མཆོག་གིས་གསུང་བཤད་སྒྲོགས་སྦྱང་ཞུས་པ་དང་སྦྲགས་མང་ཚོགས་ལ་དུས་རྒྱུན་ནས་སོ་སོའི་ལུས་སེམས་གཉིས་ཀ་བདེ་ཐང་ཡོང་ཆེད་འཕྲོད་བསྟེན་ལ་ཐུགས་སྣང་གནང་གལ་ཆེ་སྐོར་སོགས་ལམ་སྟོན་གསུང་བཤད་གནང༌། དེ་རྗེས་ས་གནས་སྨན་རྩིས་ཁང་གི་སྨན་པ་ཆོས་ལྡན་ལགས་ཀྱིས་སྐྲན་ནད་ནད་གཞི་སྐོར་ཐོག་མའི་བྱུང་རྐྱེན་དང༌། ནད་རྟགས་ཇི་ཡོད། སྔོན་འགོག་ཐབས་ལམ་སོགས་སྐོར་གསུང་བཤད་གནང་ཡོད། དེ་བཞིན་ས་གནས་འཕྲོད་བསྟེན་སྨན་ཁང་གི་སྨན་པ་བློ་བཟང་བཀྲིས་ལགས་ཀྱིས་གཉེན་ནད་རེག་དུག་སྐོར་དང་སྐྲན་ནད་སོགས་ནད་རིགས་འདྲ་མིན་སྐོར་ Power point ལམ་ནས་འགྲེལ་བཤད་གོ་བདེ་བརྒྱབ་སྟེ་གོ་རྟོགས་གང་ལེགས་སྤེལ་ཐུབ་པ་བྱུང་ཡོད།  དེ་རྗེས་སྨན་རྩིས་ཁང་གི་སྨན་པ་རྟ་མགྲིན་བཟང་མོ་ལགས་ཀྱིས་ཟས་སྤྱོད་བསྟེན་ཚུལ་སྐོར་ལམ་སྟོན་འགྲེལ་བཤད་ཞིབ་ཕྲ་གནང༌། མཇུག་མཐར་མང་ཚོགས་ནས་དྲི་བ་བཏང་བ་ཁག་ལ་ལན་འདེབས་གནང་ཡོད། དེ་ཉིན་ནང་བདེ་ལས་ཁུངས་ནས་མང་ཚོགས་ལ་གསོལ་ཇ་དང་བཞེས་ཏོག་གོ་སྒྲིག་ཞུས་ཡོད་པ་བཅས།།