༢༠༡༡ ཟླ་ ༡༡ ཚེས་ ༡༨ རེས་གཟའ་པ་སངས།
༄༅།།  འདི་གར་ཨོ་སི་ཊོ་ལི་ཡའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨོ་སི་ཊོ་ལི་ཡའི་སི་ཌི་ནིའི་ཁུལ་དུ་གནས་སྡོད་རྒྱ་ནག་གི་སྲིད་དོན་ལ་ཞིབ་འཇུག་གནང་མཁན་རྒྱ་རིགས་བུད་མེད་ཁྲིན་ཧོང་ཞིན་ནས་བོད་མིར་རྒྱབ་སྐྱོར་དང་གདུང་སེམས་མཉམ་སྐྱེའི་དཔྱད་རྩོམ་ཞིག་སྤེལ་ཡོད་པ་དང་།  ཨོ་སི་ཊོ་ལི་ཡར་གནས་བཞུགས་བོད་མི་ལྷ་སྡེ་གནམ་ལོ་ཡག་གིས་དཔྱད་རྩོམ་ཀྱི་ནང་དོན་ཁག་བོད་ཡིག་ཐོག་བསྒྱུར་ཡོད།  དེ་ཡང་དཔྱད་རྩོམ་ནང་ཕྱི་ལོ་  ༢༠༡༡ ལོའི་ཟླ་ ༣ པ་ནས་བཟུང་ད་བར་བོད་ནང་བོད་མི་ ༡༡ ཙམ་གྱིས་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་བོད་ཐོག་བཟུང་བའི་མི་རིགས་དང་ཆོས་ལུགས་སྲིད་བྱུས་ལ་ངོ་རྒོལ་བྱས་འདུག ད་ལྟའི་ཆར་ཉུང་མཐར་མི་་དྲུག་འདས་གྲོངས་ཕྱིན་ཡོད་པ་དང་།  ཁོང་རྣམ་པས་རང་ལུས་མེར་སྲེག་གཏོང་སྐབས་ང་ཚོར་ཆོས་དད་རང་དབང་དགོས།”༸གོང་ས་ཏཱ་ལའི་བླ་མ་མཆོག་བོད་ལ་གདན་འདྲེན་ཞུ་དགོས།”༸གོང་ས་ཏཱ་ལའི་བླ་མ་མཆོག་སྐུ་ཚེ་ཁྲི་ལོར་བརྟན་པར་ཤོག”བོད་ལ་རང་དབང་དགོས་པ་དང་རྒྱལ་ཁབ་སླར་གསོ་བྱེད་དགོས་སོགས་ཀྱི་འབོད་ཚིག་བསྒྲགས་ཡོད་ཅེས་དཔྱད་རྩོམ་ནང་འཁོད་འདུག
ཁྲིན་ཧུང་ཞིན་གྱི་དཔྱད་རྩོམ་ནང་ད་དུང་མི་མང་པོ་ཞིག་གིས་བདེ་སྐྱིད་ལྡན་པའི་བོད་མིས་རང་ཉིད་ཀྱི་གཅེས་པའི་ཚེ་སྲོག་མཇུག་བསྡུ་བའི་ལམ་ནས་བདེ་སྐྱིད་ཀྱི་འཚོ་བ་རྒྱབ་ཏུ་དོར་བཞིན་ཡོད་དམ། ནང་ཆོས་ལ་དད་ཅིང་ཚེ་སྲོག་ལ་བརྩི་བཀུར་དང་།  ལོ་ངོ་བརྒྱ་ཕྲག་མང་པོར་འགྲན་སེམས་དོར་ནས་ནང་ཆོས་ཉམས་ལེན་གནང་མཁན་དགེ་འདུན་པ་རྣམས་ཀྱིས་གཅིག་རྗེས་གཉིས་མཐུད་ངང་རང་ལུས་མེར་སྲེག་བཏང་སྟེ་ཚེ་སྲོག་མཇུག་བསྡུ་དགོས་ཐུག་པ་རེད་དམ་སོགས་འདྲི་སྲིད་པས།  དྲི་བ་འདི་དག་གི་རྒྱབ་ལྗོངས་སུ་འཛམ་གླིང་མི་དམངས་ཀྱིས་མིག་མཐར་མཆི་མ་འཁོར་ནས་ལོ་ངོ་ ༦༠ རིང་མཐོང་བའི་དོན་དངོས་ནི། བོད་ཀྱིས་མི་རབས་བརྒྱུད་ནས་རང་ཉིད་ཀྱི་རྩ་ཆེན་ཚེ་སྲོག་དང་ཟུངས་ཁྲག་གིས་སྡུག་བསྔལ་དང་བོད་མིའི་ལོ་རྒྱུས་ཐོག་ཟིན་ཐོ་བཀོད་ཡོད་པ་མ་ཟད། རྒྱ་དམར་གཞུང་གིས་རྫུན་གཏམ་ལ་ངོ་རྒོལ་བྱེད་བཞིན་པ་ཞིག་རེད་ཅེས་དཔྱད་རྩོམ་ནང་འཁོད་འདུག
ཡང་ཨོ་སི་ཊོ་ལི་ཡའི་རྒྱ་རིགས་བུད་མེད་ཁྲིན་ཧུང་ཞིན་གྱིས་སྤེལ་བའི་དཔྱད་རྩོམ་ནང་དུས་རབས་སྔོན་མའི་ལོ་རབས་ ༨༠  རྗེས་ནས་བོད་ནང་གི་དགོན་པ་མང་པོ་ཞིག་སླར་གསོ་བྱས་ཡོད་ནའང། སྲིད་གཞུང་གིས་དགོན་པའི་ནང་ཞུགས་མཁན་གྱི་ལོ་ཚད་དང་ཆོག་མཆན་ལེན་དགོས་པའི་སྲིད་བྱུས་ལག་བསྟར་བྱས་ཡོད་པ་མ་ཟད། ད་དུང་རྒྱལ་གཅེས་རིང་ལུགས་དང་ཁྲིམས་ལུགས་སློབ་གསོ་ནི་དགོན་པ་ཁག་གིས་ངེས་པར་དུ་སློབ་སྦྱོང་བྱེད་དགོས་པའི་སློབ་ཚན་དུ་བསྒྱུར་ཡོད། ལྷག་པར་དུ་བོད་མིའི་སེམས་ཁོངས་སུ་༸གོང་ས་ཏཱ་ལའི་བླ་མ་མཆོག་ལ་སྐྱོན་བརྗོད་བྱེད་རྒྱུ་ནི་བསམ་བློའི་འཁྱེར་ཕྱོགས་ལ་བརྟག་པའི་འགག་སྒོ་ཞིག་ཏུ་བཟོས་འདུག་ཅེས་དང་།
རྒྱ་ནག་གཞུང་གིས་སྤེལ་བའི་རྒྱབ་ཤ་དཀར་པོའི་དེབ་ནང་དུ་བོད་མིར་རྩ་བའི་ཐོབ་ཐང་སྣ་ཚོགས་ཡོད་པ་འགྲེལ་བཤད་བརྒྱབ་ཡོད་ལ་བདེ་སྐྱིད་ཀྱི་འཚོ་བར་རོལ་བཞིན་པར་ཡང་ཡིག་ཐོག་བཀོད་ཡོད།   འོན་ཀྱང་དོན་དངོས་སུ་བདེ་སྐྱིད་ཀྱི་འཚོ་བའི་ནང་དུ་ལོ་མང་པོ་རིང་བོད་ཐོག་ལག་བསྟར་བྱས་པའི་དྲག་གནོན་བསྡུས་ཡོད་ལ། ཁྲིམས་འགལ་གྱི་འཛིན་བཟུང་དང་ཡང་དག་མ་ཡིན་པའི་བཅད་ཁྲའང་འདུས་ཡོད།  རྒྱ་ནག་གཞུང་གི་མ་འོངས་སྲིད་འཛིན་ཞི་ཅིན་ཕིང་ཉེ་སྔོན་ལྷ་སར་འཚམས་འདྲིར་འབྱོར་སྐབས། བོད་མིར་ཐུག་འཕྲད་བྱས་མེད་ལ་དགོན་པའི་ནང་དུའང་བསྐྱོད་མེད། དེ་ལས་ལྡོག་སྟེ་ས་གནས་ཉེན་རྟོག་པ་དང་དམག་མི། ཆབ་སྲིད་མི་སྣ་དང་ཁྲིམས་འཛིན་དཔོན་རིགས་ཁག་ལ་ཐུག་འཕྲད་བྱས་ཡོད། བྱེད་ཐབས་དེ་ནི་རྒྱ་དམར་གཞུང་གིས་བོད་ཐོག་དྲག་རྩུབ་གཉའ་གནོན་གྱི་ཆོད་སེམས་ཕྱི་རོལ་ལ་བསྟན་ཡོད་ཅེས་དང་། དཔྱད་རྩོམ་དེའི་ནང་ད་དུང་བོད་མིས་དུས་རབས་སྔོན་མའི་ལོ་རབས་ ༥༠ ནང་རྒྱ་ནག་གཞུང་གི་དམག་དཔུང་གིས་རྩུབ་སྤྱོད་དང་མེ་སྒྱོགས་ཀྱི་ཁ་གཏད་དུ་ལངས་པ་ནས་བཟུང།  དུས་རབས་ཕྱེད་ཀའི་རིང་རང་ཉིད་ཀྱི་བླ་ན་མེད་པའི་ས་གཞི་དང་ཆོས་དད། ལོ་ངོ་སྟོང་ཕྲག་རིང་གི་ཤེས་རིག  མི་རིགས་ཀྱི་བརྒྱུད་འཛིན་བཅས་ཀྱི་ཆེད་དུ་ངོ་རྒོལ་མཚམས་འཇོག་བྱེད་མྱོང་མེད་ལ། མི་རབས་ནས་མི་རབས་མཐུད་ནས་ཚེ་སྲོག་དང་ཟུངས་ཁྲག་གི་རིན་དོད་ལ་མི་ཕངས་པར་གུས་བསྟོད་དང་མིག་ཆུ་ཤོར་བའི་བོད་མིའི་ལོ་རྒྱུས་ཀྱི་ཤོག་ལྷེ་མཐུད་ནས་འབྲི་བཞིན་ཡོད་ལ། ལོ་མཇུག་ལ་སླེབས་ལ་ཉེ་བའི་སྐབས་འདིར་ང་ཚོའི་སེམས་པ་ཕྱི་ལོ་ ༢༠༡༡ ལོར་བོད་ཀྱི་དཔའ་བོ་དཔའ་མོ་རྣམ་པས་ཟུངས་ཁྲག་གིས་བྲིས་བའི་ལོ་རྒྱུས་སྟེང་བཀོད་ཡོད་ཅེས་དཔྱད་རྩོམ་ནང་བཀོད་འདུག་པ་བཅས།།