༢༠༡༡ ཟླ་ ༡༡ ཚེས་ ༢༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༣ ཉིན་ལྡི་ལིར་གནས་བཞུགས་བོད་མི་རྣམས་ཀྱིས་རྒྱལ་ས་ལྡི་ལིའི་ཏིན་མུར་ཏི་ནས་དབུ་འཛུགས་ཀྱིས་རྒྱ་ནག་གཞུང་ཚབ་ཀྱི་ཉེ་འགྲམ་བར་ཞི་བའི་གོམ་འགྲོས་དང་སྐད་འབོད་ཀྱི་ལས་འགུལ་སྤེལ་སྐབས་བོད་མི་མང་སྤྱི་འཐུས་ཚོགས་གཞོན་སློབ་དཔོན་བསོད་ནམས་བསྟན་འཕེལ་མཆོག་གིས་དབུས་སྤྱི་འཐུས་རྒྱུན་ལས་རྣམ་པ་དང་ཕྱོགས་བཞུགས་སྤྱི་འཐུས་ཁག་གཅིག་གིས་མཉམ་ཞུགས་གནང་འདུག སྐབས་དེར་སྤྱི་འཐུས་ཚོགས་གཞོན་མཆོག་གིས་ལྡི་ལིར་བོད་མི་རྣམས་ནས་ལྷག་དཀར་ཉིན་མོ་དང་སྟབས་བསྟུན་ལས་འགུལ་སྤེལ་བར་བསྔགས་བརྗོད་དང་སྦྲགས་གསུང་བཤད་གནང་དོན། ང་ཚོ་བོད་མི་མང་སྤྱི་འཐུས་རྒྱུན་ལས་ཀྱིས་གཙོས་ཕྱོགས་བཞུགས་སྤྱི་འཐུས་ཁག་གཅིག་སོགས་ནས་དེ་རིང་གི་ལས་འགུལ་འདིར་མཉམ་བྱེད་ཐུབ་པར་དགའ་པོ་བྱུང། ཕྱོགས་གཅིག་ནས་བོད་ནང་གི་བོད་མི་རྣམས་ཀྱི་གནས་སྟངས་ལ་གདུང་སེམས་མཉམ་སྐྱེ་མཚོན་ཆེད་ཡིན། དེ་བཞིན་བོད་ནང་གི་གནས་སྟངས་ཛ་དྲག་ཆགས་ཡོད་པར་བརྟེན།  རྒྱ་ནག་གཞུང་ནས་བོད་ནང་འདས་པའི་ལོ་ལྔ་བཅུ་དྲུག་ཅུ་ལྷག་ལག་བསྟར་བྱས་པའི་སྲིད་བྱུས་ལ་བསྐྱར་ཞིབ་བྱས་ནས་གུ་ཡངས་ཀྱི་སྲིད་བྱུས་ཤིག་བསྐྲུན་དགོས། ཕྱོགས་གཅིག་ནས་རྒྱལ་སྤྱིའི་ནང་གི་གསར་འགོད་པ་དང་ཚོགས་སྡེ་ཁག རང་དབང་ཅན་གྱི་སྡེ་མཚན་ཁག་གིས་བོད་མདོ་སྨད་རྔ་པ་གཙོ་བོར་གྱུར་བའི་བོད་ནང་གི་དངོས་ཡོད་གནས་སྟངས་ལ་རྟོག་ཞིབ་སླད་ཆེད་ཕེབས་གནང་དགོས་པའི་རེ་འདུན་ཞུ་བཞིན་ཡོད།  དེ་བཞིན་རྒྱ་ནག་གཞུང་ནས་བོད་ནང་དམ་བསྒྲགས་ཅན་གྱི་སྲིད་བྱུས་འཛིན་མུས་ཐོག་དམག་དཔུང་ཕོན་ཆེན་འགྲེམས་འཇོག་བྱས་པ་དེ་དག་ཆ་རྐྱེན་གང་ཡང་མེད་པར་ཕྱིར་འཐེན་བྱེད་དགོས། རྒྱ་ནག་གཞུང་གིས་བོད་ཐོག་མཁྲེགས་བཟུང་ཅན་གྱི་སྲིད་བྱུས་འཛིན་བཞིན་ཡོད་པ་ཧ་ཅང་གསལ་པོ་རེད། ནམ་རྒྱུན་རྒྱ་ནག་གཞུང་ནས་རྒྱལ་ཁབ་ཀྱི་བརྟན་ལྷིང་དང་འཆམ་མཐུན་སོགས་གལ་ཆེན་པོ་རྩིས་ཀྱི་འདུག དངོས་གནས་དྲང་གནས་དེ་ལྟར་རྩིས་ཀྱི་ཡོད་ན། བོད་ནང་ཡོད་པའི་བོད་མི་ཚོ་ཡང་འཆམ་མཐུན་དང་བདེ་སྐྱིད་དགོས་མཁན་ཞིག་ཡིན་སྟབས། བོད་ནང་གི་བོད་མིར་སྨྲ་བརྗོད་དང་འགྲོ་སྡོད་རང་དབང་གི་ཐོབ་ཐང་སྤྲོད་དགོས་པ་མ་ཟད། བོད་ཀྱི་ཆོས་དང་རིག་གཞུང་། སྐད་ཡིག་སོགས་ལ་རྒྱ་ནག་གཞུང་ནས་ངེས་པར་དུ་བརྩི་བཀུར་བྱེད་དགོས་ཞེས། སོགས་ཀྱི་གསུང་བཤད་གནང་འདུག་པ་བཅས། །