༢༠༡༡ ཟླ་ ༡༡ ཚེས་ ༨་རེས་གཟའ་མིག་དམར།

༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༧ ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཕྱི་དྲོ་རྡ་ནས་ཕེབས་ཐོན་གྱིས་པ་ཀོར་བརྒྱུད་ཕྱི་ཚེས་ ༨ ཉིན་སྔ་དྲོ་ལྡི་ལིར་ཕེབས་འབྱོར་གནང་ཡོད། ཕྱི་ཚེས་ ༩ ཉིན་སྔ་དྲོ་ཚོུད་ ༩།༤༠ ཐོག་ལྡི་ལི་ནས་ཕེབས་ཐོན་གྱིས་ཕྱི་དྲོ་ཆུ་ཚོད་ ༤།༤༠ ཐོག་ཨི་ཊ་ལིའི་ས་ཁུལ་རོམ་དུ་ཕེབས་འབྱོར་གནང་རྒྱུ། ཕྱི་ཚེས་ ༡༠ ནས་ ༡༡ བར་ཉིན་གཉིས་རིང་ཨི་ཊ་ལི་གྲོས་ཚོགས་འཐུས་མི་སྐུ་ཞབས་(Gianni Vernetti) ཡི་ཚོགས་པ་(Alliance of Democrats ཞེས་པའི་(“Democracy Promotion and Human Rights”) བརྗོད་གཞི་ཐོག་ཚོགས་འདུ་གྲ་སྒྲིག་ཞུས་ཡོད་པ་དེར་གསུང་བཤད་གནང་རྒྱུའི་གཞུང་འབྲེལ་མགྲོན་འབོད་གནང་བ་ལྟར་གསུང་བཤད་གནང་རྒྱུ། ཚོགས་འདུའི་ནང་མང་གཙོའི་འབྲེལ་བའི་དབུ་ཁྲིད་རྣམ་པ་དང་། ཆབ་སྲིད་བ། སྲིད་བྱུས་གཏན་འབེབས་བྱེད་མཁན། ཆབ་སྲིད་ཚོགས་པའི་སྐུ་ཚབ། ཤེས་ཡོན་ཅན་བཅས་འདུ་འཛོམས་གནང་རྒྱུ་རེད་འདུག ཕྱི་ཚེས་ ༡༢  ཉིན་ཕྱི་དྲོ་རོམ་ནས་ཕེབས་ཐོན་གྱིས་ལྡི་ལི་དང་དེ་ནས་ཕྱི་ཚེས་ ༡༤ ཉིན་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས། །