༢༠༡༡ ཟླ་ ༡༡ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༡༣ ཉིན་རྡ་ས་བོད་ཀྱི་ཟློས་གར་ཚོགས་ཁང་དུ་འོད་དཀར་དྲ་ཚིགས་ཀྱིས་གོ་སྒྲིག་ཐོག་སྐབས་དང་པོའི་བོད་ཀྱི་སྙན་ངག་སྒྲོགས་སྦྱང་འགྲན་ཚོགས་ཀྱི་མཐའ་མའི་འགྲན་བསྡུར་གནང་ཡོད།
དེ་ཉིན་ཕྱི་དྲོ་ཆུ་ཚོད་ ༦ ཐོག་སྐུ་མགྲོན་དུ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་ངག་དབང་འཕེལ་རྒྱལ་མཆོག་དང་། ཁྲིམས་ཞིབ་པ་གཞན་ངག་དབང་ཐུབ་བསྟན་མཆོག བོད་མི་མང་སྤྱི་འཐུས་ཚོགས་གཞོན་སློབ་དཔོན་བསོད་ནམས་བསྟན་འཕེལ་མཆོག་དང་སྤྱི་འཐུས་རྒྱུན་ལས་ཁག་གཅིག ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་དང་། གཞུང་འབྲེལ་མིན་པའི་ཚོགས་པ་ཁག་གི་ལས་སྣེ་དང་མི་མང་བཅས་ཁྱོན་མི་གྲངས་ ༥༠༠ བརྒལ་བ་ལྷན་འཛོམས་ཀྱི་ཐོག་མར་བོད་རྒྱལ་ཁབ་དང་མི་རིགས་ཆེད་འདས་གསོན་དཔའ་བོ་དཔའ་མོ་རྣམས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་རྗེས་བོད་རྒྱལ་ཁབ་ཆེན་མོའི་རྒྱལ་གླུ་བཏང། དེ་ནས་འོད་དཀར་དྲ་ཚིགས་ཀྱི་སྤྱི་ཁྱབ་འགན་འཛིན་ཤིང་བཟའ་རིན་པོ་ཆེས་སྙན་ངག་འགྲན་ཚོགས་ཀྱི་ངོ་སྤྲོད་གནང་བའི་ནང། སྙན་ངག་འགྲན་ཚོགས་ཀྱི་ལས་འགུལ་འདི་དག་བོད་མི་རིགས་ཀྱི་སྐད་ཡིག་སྲུང་སྐྱོབ་ཀྱི་ཆ་རྐྱེན་ཞིག་ཡིན་པ་མ་ཟད། མི་རིགས་ཀྱི་འཐབ་རྩོད་ནང་ཤེས་ཡོན་གྱི་འཐབ་རྩོད་བྱ་རྒྱུ་གལ་ཆེ་ཡིན། དེང་བོད་ནང་རང་ལུས་མེར་སྲེག་བཞིན་པའི་དཔའ་བོ་དཔའ་མོ་རྣམས་ལ་མྱ་ངན་མཚོན་ཆེད་དུ་ཡིན་ཞེས་སོགས་ཀྱི་གསུང་བཤད་གྲུབ་བསྟུན་སྙན་ངག་འགྲན་ཚོགས་ཀྱི་ཤན་འབྱེད་པ་བཞི་ཡོད་པ་རྣམས་རེར་བཞིན་ངོ་སྤྲོད་ཀྱི་མདུན་དུ་ཕེབས་རྗེས་འགྲན་ཞུགས་པ་མི་སྣ་བརྒྱད་ཀྱིས་སོའི་སོའི་ཉམས་འགྱུར་ལྡན་པའི་སྙན་ངག་གི་བརྗོད་གཞི་འདྲ་མིན་ཐོག་སྒྲོགས་སྦྱང་ཞུས་གྲུབ་མཚམས་བོད་མི་མང་སྤྱི་འཐུས་ཚོགས་གཞོན་མཆོག་དང་། ཤེས་རིག་དྲུང་ཆེ། དབུས་གཞོན་ནུའི་ཚོགས་གཞོན་བཅས་ཀྱིས་བྱ་དགའ་རིམ་པ་དང་པོར། ཧིན་སྒོར་ཁྲི་དྲུག་དང་། རིམ་པ་གཉིས་པར། ཧིན་སྒོར་ཁྲི་བཞི། རིམ་པ་གསུམ་པར། ཧིན་སྒོར་ཁྲི་གཉིས་བཅས་ཁག་སོ་སོར་གནང་རྗེས་ཕུལ་བྱུང་མི་སྣ་ལྔ་ལ་བྱ་དགའ་དང་། དེ་བཞིན་འགྲན་ཨང་ཐོབ་པ་ ༢༧ ཁོངས་སུ་ཚུད་མཁན་གྱི་འགྲན་ཞུགས་པ་རྣམས་ལ་ཕྱག་འཁྱེར་བཅས་གནང་ཡོད། ཐེངས་འདིའི་འོད་དཀར་དྲ་ཚིགས་ཀྱི་སྐབས་དང་པོའི་སྙན་ངག་འགྲན་ཚོགས་དེ་བཞིན་དུས་ཡུན་ཟླ་དྲུག་རིང་བཙན་བྱོལ་བོད་མིའི་ཤེས་ཡོན་གྱི་བསྟི་གནས་སྦེལ་ཀོབ་དང་། མོན་གྷོ། ཝར་ཎ་མཐོ་སློབ། མ་སུ་རི། ས་རཱ་མཐོ་སློབ། གོ་པལ་པུར་དང་སུ་ཇཱ་སློབ་གྲྭ རྡ་ས་བཅས་ཀྱི་ས་གནས་བརྒྱད་ལ་ཆེད་བསྐྱོད་ཀྱི་ཐོག་མར་འགྲན་ཞུགས་ནང་ཁྱོན་མི་གྲངས་ ༢༡༥ འཛུལ་ཞུགས་གནང་འདུག་པ་དང་། དངོས་གཞིའི་འགྲན་བསྡུར་ནང་མི་གྲངས་ ༩༨ ཚུད་འདུག མཐའ་མའི་འགྲན་བསྡུར་ནང་མི་གྲངས་ ༢༧ ཚུད་ཡོད་པ་ནང་ནས་རྩེ་ཕུད་བརྒྱད་དཔྱད་འདེམས་ཀྱིས་ཉིན་འདིར་མཐའ་མའི་འགྲན་བསྡུར་ནང་ཨང་རིམ་དང་པོ་གཉིས་པ་གསུམ་པ་བྱ་དགའ་དང་། དེ་བཞིན་ཕུལ་བྱུང་ལྔ་ལ་བྱ་དགའ་ཐོབ་གནང་ཡོད་པ་བཅས། །