༢༠༡༡ ཟླ་ ༡༡ ཚེས་ ༡ རེས་གཟའ་མིག་དམར།
༄༅། ཕྱི་ལོ་ ༢༠༡༡ ཟླ་ ༡༠ ཚེས་ ༣༡ ཉིན་རྡ་ས་ཡོངས་གླིང་སྔོན་འགྲོའི་སློབ་གྲྭའི་ནང་འཕྲོད་བསྟེན་ལས་ཁུངས་ནས་གོ་སྒྲིག་ཐོག་སློབ་གྲྭའི་ལས་བྱེད་དང་ཕྲུ་གུའི་ཕ་མ་རྣམས་ལ་སྨན་བཅོས་ལྟ་སྐྱོང་ལས་གཞིའི་སྐོར་ལ་གོ་རྟོགས་སྤེལ་ཡོད།
དེ་ཉིན་ཕྱི་དྲོ་ཆུ་ཚོད་ ༤།༣༠ ཐོག་བོད་མི་མང་སྤྱི་འཐུས་ཟླ་བ་ཚེ་རིང་ལགས་ཀྱིས་སྨན་བཅོས་ལྟ་སྐྱོང་ལས་གཞིའི་སྐོར་ལ་གོ་རྟོགས་སྤེལ་དགོས་པའི་ངོ་སྤྲོད་ཐུང་ངུ་གནང་རྗེས་འཕྲོད་བསྟེན་ལས་ཁུངས་ཀྱི་དྲུང་འཕར་ཚེ་རྒྱལ་ལགས་ཀྱིས་གསུང་བཤད་གནང་བའི་སྙིང་དོན་ནི། བཙན་བྱོལ་བོད་མིའི་ཆེད་ལས་གཞི་གསར་པ་འདིས་སྤྱི་ཚོགས་འཕྲོད་བསྟེན་ལ་ཁེ་ཕན་ཇི་ཡོད་དང་། གཞུང་གི་དགོངས་པ་གང་ཡིན། མང་ཚོགས་སྒེར་ལ་ཁེ་ཕན་ཇི་ཡོད། ད་ལྟའི་བཙན་བྱོལ་བོད་མིའི་འཕྲོད་བསྟེན་གནས་སྟངས་ཀྱི་དཀའ་ངལ་ལ་བལྟོས་ཏེ་སྨན་བཅོས་ལྟ་སྐྱོང་ལས་གཞིའི་ཞིབ་འཇུག་རིམ་པ་གནང་བའི་མཇུག་འབྲས་ངོ་སྤྲོད་དང་སྦྲགས་སྨན་བཅོས་ལྟ་སྐྱོང་ལག་ལེན་ཡག་པོ་ཡོང་བར་སྤྱི་ཚོགས་ཧྲིལ་པོའི་འཕྲོད་བསྟེན་དང་། བྱེ་བྲག་སྒེར་སོ་སོའི་འཚོ་བའི་འཕྲོད་བསྟེན་ལ་རག་ལུས་ཡོད་སྐོར་དང་། ད་ལྟའི་གདོང་ལེན་གྱི་ཐབས་བྱུས། དགོས་ངེས་ཀྱི་ཉེན་སྲུང་འདིས་མི་རྒན་གཞོན་དང་དབུལ་ཕྱུག་དབྱེ་བ་མེད་པར་ཚང་མར་ཁྱབ་ཀྱི་ཡོད་པ་མ་ཟད་། སྨན་བཅོས་ལྟ་སྐྱོང་གི་ཚོགས་མིའི་འོས་ཆོས་དང་། ལོ་རེའི་བསྡུ་དངུལ་ཆ་བགོས་གནང་སྟངས།  ནད་པ་ཚབས་ཆེ་རིགས་རྒྱ་གར་སྨན་ཁང་ཆེ་བ་ཁག་ལ་བསྟེན་གཏུགས་ཀྱི་འབྲེལ་མཐུད་ཡོད་པ། འཕྲོད་བསྟེན་ལས་གཞིའི་སྤྱི་ཚོགས་སྨན་བཅོས་ལྟ་སྐྱོང་ཉེན་སྲུང་དེའི་དམིགས་ཡུལ་ནི་ཚོང་དང་ཁེ་ཕན་མ་ཡིན་པར་རྒན་འཁོགས་རང་ལོ་ ༧༠ བརྒལ་བ་ཡིན་ཡང་སྨན་བཅོས་ཉེན་སྲུང་གི་ལྟ་སྐྱོང་ཐུབ་པ་བྱས་ཏེ་བོད་མིའི་ཟས་སྤྱོད་ལ་གཞིགས་པའི་ནད་གཞིའི་གལ་གནད་ལ་ཞིབ་འཇུག་གིས་རྒྱ་གར་སྤྱི་ཚོགས་དང་མི་འདྲ་བའི་ཁྱད་པར་དང་། ལོ་རེའི་འཕྲོད་བསྟེན་ལས་ཁུངས་ནས་སྨན་གྲོན་ཧིན་སྒོར་འབུམ་བརྒྱ་ཙམ་འགྲོ་གི་ཡོད་པ་དེ་དག་ས་གནས་ཉམ་ཐག་ལ་སོགས་ཐོབ་ཆེད་དང་། རྒྱ་གར་ནང་དུ་གནས་སྡོད་བཙན་བྱོལ་མི་མང་གང་མང་མཉམ་ཞུགས་དགོས་པའི་འབོད་སྐུལ་སོགས་ཀྱི་ངོ་སྤྲོད་གསུང་བཤད་་གནང་རྗེས་དྲིས་བ་དྲི་ལན་གནང་ཡོད་པ་བཅས།།