༢༠༡༡ ཟླ་ ༡༡ ཚེས་ ༨ རེས་གཟའ་མིག་དམར།

༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༤ ཉིན་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་གཙོས་ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས་དང། ལྷོ་སྤྱི་བཀྲ་ཤིས་ཕུན་ཚོགས་ལགས་བཅས་རྒྱ་གར་ལྷོ་ཕྱོགས་བྷེང་ག་ལོར་དུ་རྟེན་གཞི་བྱས་པའི་ལས་རིགས་སྦྱོང་བརྡར་བསྟི་གནས་ཁང་(Institute for small trade learning) ལ་གཟིགས་སྐོར་དུ་ཕེབས་ཏེ་སློབ་ཕྲུག་རྣམས་དང་ཐུག་འཕྲད་གནང་ཡོད་པ་མ་ཟད། བཀའ་བློན་མཆོག་གིས་ཚེམ་བཟོ་དང། མཛེས་བཟོ། ཤིང་བཟོ། ཀམ་པུ་ཊར་ཚན་པ་བཅས་སུ་གཟིགས་སྐོར་གནང་ཡོད། དེ་བཞིན་ལས་རིགས་སྦྱོང་བརྡར་བསྟི་གནས་ཁང་གི་འཛིན་སྐྱོང་འགན་འཛིན་དང་ལྷན་ལས་རིགས་འདྲ་མིན་གྱི་བརྗོད་གཞིའི་ཐོག་གོ་བསྡུར་ལྷུག་པོ་གནང་རྗེས། ནང་སྲིད་བཀའ་བློན་མཆོག་དང་དྲུང་ཆེ་རྣམ་གཉིས་ཀྱིས་སློབ་ཕྲུག་དང་ལས་བྱེད་རྣམས་ལ་གསུང་བཤད་གནང་ཡོད།
་ལས་རིགས་སྦྱོང་བརྡར་བསྟི་གནས་ཁང་དེ་ནི་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་གྱི་ལས་གཞིའི་
ཁྱབ་ཁོངས་སུ་ཡོད་པ་དང། ལས་གཞི་འདིའི་འོག་གཞོན་སྐྱེས་ལས་མེད་རྣམས་ལ་ལས་རིགས་འདྲ་མིན་ཐོག་སྦྱོང་བརྡར་སྤྲོད་བཞིན་འདུག ད་བར་སྦྱོང་བརྡར་ཁང་དེ་ནས་སློབ་ཕྲུག་གྲངས་ ༨༡༣ ཙམ་ལ་སྦྱོང་བརྡར་སྤྲད་ཡོད། དེ་ཡང་བུ་ ༤༣༢ དང་། བུད་མེད་ ༣༨༡ ཙམ་ལ་ལས་རིགས་འདྲ་མིན་གྱི་སྦྱོང་བརྡར་མཐར་ཕྱིན་པ་སྤྲད་ཡོད་པ་མ་ཟད། ཉེ་ལམ་སློབ་ཕྲུག་གྲངས་ ༢༢ ཙམ་ཞིག་ལས་རིགས་སྦྱོང་བརྡར་ཁང་དེར་འཛུལ་ཞུགས་བྱས་ཡོད་པའི་ཁོངས་བུད་མེད་ ༡༡ དང་བུ་ ༡༡ ཡོད་པ་བཅས།།