༢༠༡༡ ཟླ་ ༡༡ ཚེས་ ༡ རེས་གཟའ་མིག་དམར།
༄༅།།  འདི་གར་ནང་སྲིད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༢༩ རེས་གཟའ་སྤེན་པ་སྔ་དྲོའི་ཆུ་ཚོད་ ༩།༠༠ ནས་དགོང་དྲོ་ཆུ་ཚོད་ ༧།༣༠ བར་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་དཔལ་ལྡན་ནང་སྲིད་བཀའ་བློན་མཆོག་གི་དབུ་བཞུགས་ཐོག་དབུས་ནང་སྲིད་ལས་ཁུངས་ཀྱི་ལས་བྱེད་ཡོངས་རྫོགས་ལྷན་འཛོམས་ཀྱིས་ལས་བྱེད་སོ་སོའི་ངོ་སྤྲོ་དང་འདས་པའི་ལོ་ལྔའི་རིང་གི་ཉམས་མྱོང༌། ད་ལྟའི་ལས་འགན། མ་འོངས་པའི་འཆར་སྣང་བཅས་མདོར་བསྡུས་སྙན་གསན་ཞུས་གྲུབ་རྗེས་ལས་བགོས་ཚན་པ་དྲུག་ཚོགས་ཆུང་དུ་བགོས་ཏེ་གྲོས་གཞི་དོན་ཚན།
༡།    སྡེ་ཚན་སོ་སོའི་ཁུངས་ནས་ལས་དོན་ཇི་གནང་གི་ཐོ་གཞུང་དང་དེ་དག་གི་གནད་འགག་ཆེ་ཆུང་ཇི་ཡིན།
༢།    ད་བར་ལས་དོན་ཞུས་སྐབས་དཀའ་ངལ་ལམ་འགོག་རྐྱེན་ཇི་འཕྲད།
༣།    མ་འོངས་པར་སྡེ་ཚན་དེ་རང་ལ་ཡར་རྒྱས་གཏོང་ཕྱོགས་ཀྱི་ལས་འཆར་ཇི་ཡོད།
༤།    ནང་སྲིད་ལས་ཁུངས་ལ་སྤྱི་སྨན་དགོངས་འཆར།
ཐོག་དགོངས་འཆར་ལྷུག་གསུངས་ཀྱིས་ཚན་པའི་འགན་འཛིན་སོ་སོ་ནས་རེ་རེ་བཞིན་སྙན་གསན་ཞུས་གནང་བ་བཅས་ཚན་པ་ནང་ཁུལ་བསམ་ཚུལ་བརྗེ་ལེན་གྱིས་ནང་ཁུལ་ལས་དོན་མ་རྟོགས་པ་མང་པོ་ཞིག་གསལ་རྟོགས་ཐུབ་པའི་ཕན་ཐོགས་བྱུང་ཡོད། ལྷག་པར་ནང་སྲིད་བཀའ་བློན་མཆོག་གིས་མཛད་འགན་བཞེས་ཕྱོགས་ལ་ཡང་གནད་ཆེའི་ས་བོན་བྱུང་བའི་དགྱེས་ཚོར་གྱིས་གསུང་བཤད་གནང་ཡོད་བ་དང་སྦྲགས་མ་འོངས་པར་ཚང་མས་ཁྱིམ་ཚང་གཅིག་གི་ནང་མི་ལྟར་གཞུང་མང་གི་ལས་སྒོར་ཧུར་སྐྱེད་ལྷག་བློ་ཆེ་བསྐྱེད་དགོས་པའི་ལམ་སྟོན་གསུང་བཤད་དང་བཅས་བཞུགས་མོལ་ཚོགས་འདུ་གྲོལ་ཡོད་པ་བཅས།།