༢༠༡༡ ཟླ་ ༡༡ ཚེས་ ༣ རེས་གཟའ་ཕུར་བུ།

༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཀོ་ཡ་སན་དུ་རྟེན་གཞི་བྱས་པའི་ཀོ་ཡ་སན་གཙུག་ལག་སློབ་ཁང་དུ་རྡོར་དབྱིངས་ཀྱི་བཀའ་དབང་ཉིན་མཐའ་མར་ཉི་ཧོང་མི་མང་གིས་གཙོས་དད་ལྡན་ཆོས་ཞུ་བ་རྣམས་ལ་སེམས་ཅན་གཞན་ལ་ཕན་པ་སྒྲུབ་ཆེད་བྱང་ཆུབ་སེམས་དཔའི་སྡོམ་པ་འབོགས་ཆོག་མཛདཡོད། སྐབས་དེར་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། བདེ་སྐྱིད་ཀྱི་རྩ་བ་ནི་རང་གི་སེམས་དུལ་མིན་ལ་རག་ལུས་ཡོད། བྱམས་བརྩེ་དང་གཞན་ལ་ཕན་པ་སྒྲུབ་ན་བདེ་སྐྱིད་བསྐྲུན་ཐུབ། དེ་ལས་ལྡོག་སྟེ་སོ་སོ་རང་ཉིད་ཁོ་ནའི་ཁེ་ཕན་བསྒྲུབ་ཆེད་སེམས་ཅན་གཞན་ལ་གནོད་པ་བྱས་ན་བདེ་སྐྱིད་བསྐྲུན་མི་ཐུབ། དེ་བཞིན་སྡུག་བསྔལ་གྱི་རྒྱུ་ཡང་རང་ཉིད་ཀྱི་སེམས་མ་དུལ་བར་རང་དོན་གཉེར་བྱེད་མི་གཞན་ལ་ཁོང་ཁྲོ་ལང་བ་སོགས་ཡོང་གི་ཡོད།

གལ་ཏེ་ང་ཚོས་རང་དོན་ཙམ་མིན་པར་བསམ་བློ་རྒྱ་ཆེ་ས་ནས་བཏང་སྟེ་སྤྱི་ཚོགས་ཁྱོན་ཡོངས་ཀྱི་བདེ་དོན་ཆེད་བསམ་བློ་བཏང་བ་ཡིན་ན།  ཕྱིས་སུ་རང་ལ་དཀའ་ངལ་ཇི་འདྲ་ཞིག་འཕྲད་ཀྱང་དཀའ་ངལ་དེར་སུན་གཙེའི་ཚོར་སྣང་དེ་ཙམ་ཡོང་གི་མ་རེད། ཅེས་སོགས་ཀྱི་བཀའ་སློབ་སྩལ་རྗེས་༸གོང་ས་མཆོག་ཚོགས་ཁང་ནས་ཆིབས་སྒྱུར་བསྐྱངས། སྐབས་དེར་དད་ལྡན་ཆོས་ཞུ་བ་རྣམས་ཀྱིས་རྣམ་གྲྭ་དགེ་འདུན་པས་བཞེངས་པའི་རྡུལ་མཚོན་དཀྱིལ་འཁོར་ལ་ངོ་མཚར་ཆེན་པོས་མཇལ་ཁ་ཞུས་ཡོད།

དེ་བཞིན་བོད་ཆས་གྱོན་པའི་ཉི་ཧོང་གི་བུད་མེད་ཅིག་གིས་འདི་གའི་གསར་འགོད་པར་འགྲེལ་བརྗོད་གནང་དོན། ང་རང་དུས་རྒྱུན་དུ་གཞན་ལ་བྱམས་བརྩེ་སྒོམ་རྒྱུར་འབད་བརྩོན་བྱེད་བཞིན་ཡོད། དེ་ཡང་དེ་རིང་༸གོང་ས་མཆོག་གི་བཀའ་དབང་ཞུས་རྗེས་དམིགས་ཡུལ་བཟང་པོ་དེ་ལག་བསྟར་བྱེད་རྒྱུར་སེམས་ཤུགས་ཆེ་རུ་ཕྱིན་སོང་། ཞེས་འགྲེལ་བརྗོད་གནང་ཡོད། ཡང་ཊོཀ་ཁྱོའི་ཉེ་འགྲམ་གྱི་ཆི་བ་ཞིང་ཆེན་ (Chiba Prefecture) ནས་ཡིན་པ་སྐུ་ཞབས་ཡུ་ཧེ་ཡ་མ་ཛ་ཀི་ (Mr.Yuhei Yamazaki) ལགས་ཀྱིས་གསུང་དོན། ཉི་ཧོང་ནང་འབྱུང་བའི་གནོད་སྐྱོན་ཕོག་པའི་དུས་སྐབས་འདིར་༸གོང་ས་མཆོག་ཆིབས་སྒྱུར་བསྐྱངས་པ་འདིས་རྐྱེན་ངན་བྱུང་བའི་མི་མང་རྣམས་དཀའ་ངལ་ལས་གྲོལ་རྒྱུར་ཕན་ཐོགས་ཆེན་པོ་བྱུང་ཡོད། ངས་༸གོང་ས་མཆོག་ལ་ང་ཚོར་དཀའ་ངལ་འཕྲད་སྐབས་འདི་གར་ཆིབས་སྒྱུར་བསྐྱངས་པར་ཡི་རང་བསྔགས་བརྗོད་ཞུ་བཞིན་ཡོད། ཅེས་འགྲེལ་བརྗོད་གནང་ཡོད་པ་བཅས།།