༢༠༡༡ ཟླ་ ༡༡ ཚེས་ ༨ རེས་གཟའ་མིག་དམར།
༄༅། །བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཉི་ཧོང་ཁུལ་གྱི་མཛད་འཕྲིན་ཁག་ལེགས་པར་གྲུབ་རྗེས་ཕྱི་སོག་ནང་རྟེན་གཞི་བྱས་པའི་དགའ་ལྡན་ཐེག་ཆེན་ཆོས་གླིང་དགོན་གྱིས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ལོ་ ༢༠༡༡ ཟླ་ ༡༡ ཚེས་ ༧ རེས་གཟའ་ཟླ་བའི་དགོང་དྲོ་སོག་པོའི་རྒྱལ་ས་ཨུ་ལན་བྷ་དུར་ཆིབས་སྒྱུར་བསྐྱངས་ཡོད།
དེ་ཡང་མགོོན་པོ་གང་ཉིད་མཆོག་སོག་པོའི་ཡུལ་གྱི་གནམ་ཐང་དུ་༸ཞབས་སོར་འཁོད་སྐབས་དགའ་ལྡན་ཐེག་ཆེན་ཆོས་གླིང་དགོན་གྱི་མཁན་པོ་བགྲེས་གཞོན་རྣམ་པ་གཉིས་ཀྱིས་གཙོས་འབྲེལ་ཡོད་ལས་བྱེད་རྣམ་པས་ཕེབས་བསུ་གཟབ་རྒྱས་ཞུས་ཡོད་ཅིང་ཕྱི་དྲོ་ཆུ་ཚོད་ ༩།༡༠ ཐོག་རྒྱལ་ས་ཨུ་ལན་བྷ་དུའི་བཞུགས་གནས་མགྲོན་ཁང་དུ་༸ཞབས་སོར་བདེ་བར་འཁོད་ཡོད།
ཐེངས་འདིའི་༸གོང་ས་མཆོག་གིས་སོག་པོའི་ནང་ཉིན་གྲངས་གསུམ་རིང་བསྐྱང་རྒྱུའི་མཛད་འཆར་སྐོར་ལ་ཁལ་མུཀ་ནང་བསྟན་གྱི་གཙོ་འཛིན་ཏེ་ལོ་རིན་པོ་ཆེ་མཆོག་གིས་གསར་འགྱུར་བརྒྱུད་ལམ་ཁག་ནང་འགྲེལ་བརྗོད་ནང་དོན་ལྟར་ན། ༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་གཙོ་བོ་དེ་སོག་པོའི་ནང་ཡོད་པའི་མཐོ་རིམ་སློབ་གྲྭ་ཁག་གི་སློབ་ཕྲུག་ཚོར་བཀའ་སློབ་སྩལ་རྒྱུ་དང་། དེ་བཞིན་མང་ཚོགས་ལ་རྟེན་འབྲེལ་བསྟོད་པ་དང་ལམ་གཙོ་རྣམ་གསུམ་གྱི་ཆོས་འབྲེལ། ཕྱོགས་མཚུངས་མང་ཚོགས་ལ་སྤྱན་རས་གཟིགས་ཀྱི་བཀའ་དབང་དང་སྒྲོལ་དཀར་གྱི་ཚེ་དབང་སྩལ་རྒྱུའི་གོ་སྒྲིག་ཞུས་ཡོད་འདུག
གཞི་རྩའི་དགའ་ལྡན་ཐེག་ཆེན་ཆོས་གླིང་དགོན་དེར་ད་ལྟའི་ཆར་སློབ་གཉེར་གནང་མཁན་གྱི་དགེ་འདུན་པ་གྲངས་ ༡༠༠༠ བརྒལ་བ་ཡོད་འདུག་ལ་དགོན་པ་དེའི་མངའ་ཁོངས་སུ་བརྒྱུད་པ་གྲྭ་ཚང་དང་ལམ་རིམ་གྲྭ་ཚང་། སྨན་པ་གྲྭ་ཚང་སོགས་ཡོད་པ་རེད། དགོན་པ་དེའི་ཁོངས་ནས་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་ནང་སློབ་གཉེར་གནང་མཁན་དགེ་འདུན་པ་གྲངས་ ༤༠༠ བརྒལ་བ་དང་སེར་བྱེས་ནང་དགེ་འདུན་གྲངས་ ༦༠ ཙམ་ཡོད་འདུག དེ་བཞིན་སྨན་རྩིས་ཁང་དང་ཝར་ན་མཐོ་སློབ་སོགས་ཀྱི་ནང་དུའང་སློབ་གཉེར་བ་ཡོད་འདུག སོག་པོ་གཞུང་ལ་རྒྱ་ནག་གཞུང་ཕྱོགས་ནས་གནོན་ཤུགས་སྤྲད་མིན་ལ་མ་ལྟོས་པར་ཐེངས་འདིར་༸གོང་ས་མཆོག་གདན་འདྲེན་ཞུ་ཐུབ་པ་དེ་ནི་སོག་ཡུལ་དེ་བཞིན་མང་གཙོའི་གཞུང་ཞིག་ཡིན་པའི་རྣམ་པ་གསལ་སྟོན་ཐུབ་པར་ཁལ་མུཀ་ནང་བསྟན་གྱི་གཙོ་འཛིན་ཏེ་ལོ་རིན་པོ་ཆེ་མཆོག་གིས་རྗེས་སུ་ཡི་རང་གནང་ཡོད་པ་བཅས། །