༢༠༡༡ ཟླ་ ༡༡ ཚེས་ ༢༥ རེས་གཟའ་པ་སངས།
༄༅། །རྒྱ་གར་ནང་སྒྱུ་རྩལ་དང་ཤེས་ཡོན་ཅན་གྱི་ཐོག་ལ་ཕྱག་ལས་གནང་མཁན་གྱི་ཌེ་ཡ་ཝ་ཊི་མོ་ཌེའི་ཐེབས་རྩ་ཁང་ནས་འདི་ལོ་ལོ་འཁོར་མའི་(Dayawati Modi Award) ཌེ་ཡ་ཝ་ཊི་མོ་ཌེ་ཞེས་པའི་བྱ་དགའ་དེ་བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་རྒྱལ་ས་ལྡི་ལིིར་རྟེན་གཞི་བྱས་པའི་ (Shri Satya Sai) ཞེས་པའི་ཚོགས་ཁང་ནང་ཕྱི་ལོ་ ༢༠༡༡ ཟླ་ ༡༢ ཚེས་ ༢ ཉིན་འབུལ་ལམ་ཞུ་རྒྱུ་ཡིན་པའི་གསལ་བསྒྲགས་སྤེལ་འདུག
དེ་ཡང་ཐེབས་རྩ་ཁང་ནས་སྤེལ་བའི་གསལ་བསྒྲགས་ནང་འཁོད་དོན།  བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་བྱ་དགའ་འབུལ་ལམ་ཞུ་དགོས་པའི་དམིགས་ཡུལ་གཙོ་བོ་ནི། ༸གོང་ས་ཏཱ་ལའི་བླ་མ་མཆོག་གིས་འཛམ་གླིང་ཡོངས་ལ་ཞི་བདེ་དང་བཟོད་བསྲན། དེ་བཞིན་སྤྱི་ཚོགས་བདེ་དོན་ཆེད་སྐུ་ཚེ་ཧྲིལ་པོ་མཛད་འཕྲིན་རྒྱ་ཆེ་བསྐྱངས་དང་སྐྱོང་བཞིན་པར་ངོས་འཛིན་ཞུ་ཆེད་ཡིན།  ཕྱོགས་མཚུངས་བྱ་དགའ་དེ་ནི་རྒྱ་གར་ནང་སྒྱུ་རྩལ་དང་རིག་གཞུང་སོགས་ཀྱི་ཆེད་དུ་དངུལ་འབོར་ཆེ་ཤོས་ཀྱི་བྱ་དགའ་ཞིག་ཡིན་པ་མ་ཟད། དེའི་ནང་ཧིན་སྒོར་འབུམ་གཉིས་ལྷག་ཙམ་ཞིག་དང་དངུལ་གྱི་གཟེངས་རྟགས་འབུལ་ལམ་ཞུ་རྒྱུ་ཡིན་འདུག
སྤྱིར་བཏང་བྱ་དགའ་དེ་བཞིན་ཐོག་མར་ཕྱི་ལོ་ ༡༩༩༤ ལོར་གནང་འགོ་བཙུགས་པ་དང་། བྱ་དགའ་བཞེས་མཁན་གྲགས་ཅན་མི་སྣ་མང་དག་ཅིག་ཡོད་ཁོངས་ནས་མ་ངྷར་ཊལ་རི་ས་དམ་པ་དེ་ཉིད་ལ་ཡང་ཕུལ་མྱོང་ཡོད་པ་བཅས།